Уымӕн рохгӕнӕн нӕй!

0
257

1941 азы хурхӕтӕны мӕйы 22 бон райсомы цыппар сахатыл немыцаг фашисттӕ ӕрбабырстой нӕ бӕстӕмӕ. Райдыдта Фыдыбӕстӕйы Стыр хӕст. Уыцы ӕнамонд хабарӕй цавддуртау фесты адӕм. Знӕгтӕ хъӕутӕ ӕмӕ горӕттыл калдтой бомбӕтӕ. Сӕ танктӕ ӕмӕ фистӕг ӕфсад бырстой размӕ. Зӕхх рызти сӕ быны. Райгуырӕн бӕстӕ мады ад кӕны ӕмӕ йӕ тугдзых знаджы ӕрдонгтӕй бахъахъхъӕнынмӕ сыстадысты Советон бӕстӕйы ӕппӕт адӕмтӕ. 1941 азы Цӕгат Ирыстонӕй цыфыддӕр знагимӕ тохмӕ фӕцыдысты 40 186 адӕймаджы. ӕдӕппӕт та 1941-1945 азты нӕ республикӕйӕ хӕсты цӕхӕрмӕ ӕрвыст ӕрцыдис 89 934 адӕймаджы. Уыдонӕй тохы быдырӕй сӕ фыдӕлты уӕзӕгмӕ нал сыздӕхтысты 45 500 хӕстоны. Сӕ сӕртӕ нывондӕн ӕрхастой Райгуырӕн бӕстӕйы сӕраппонд. Уыцы ӕдзард хӕстонтимӕ уыдысты мӕ уарзон хъӕу Елхоты фӕсивӕд дӕр.

Бирӕ дзурӕн ис Елхоты тыххӕй. ӕрӕнцадис Цӕгат Ирыстоны ӕмӕ Кӕсӕг-Балхъары арӕныл ӕрдзы хъӕбысы. Йӕ галиувӕрсты размӕ тындзгӕ згъоры цӕугӕдон Терк.

Канд йӕ ӕрдзы рӕсугъддзинадӕй нӕу хъуыстгонд Елхот. Ам, ӕрджынарӕджы, цы карз хӕстытӕ ӕрцыд, уыдон баззадысты историйы. 1942 азы 24 августы немыцаг балбирӕгътӕ схӕццӕ сты Елхотмӕ. Нӕ хӕцӕг ӕфсад ӕрлӕууыд сӕ ныхмӕ. Хъӕу ӕртӕ хатты ист цыдис къухӕйкъухмӕ. Знаджы хӕдтӕхджытӕ калдтой бомбӕтӕ, фашисттӕ ӕхстой сармдзантӕй. Автоматты нӕмгуытӕ ихуарӕгау кодтой. Дур дурыл нал баззад. Бӕстӕ артау сыгъд. Гитлеронтӕ ӕппӕт тыхтӕй бырстой размӕ, сӕ быцъынӕг тыдтой Грозна ӕмӕ Бакуйы нефтмӕ, фӕлӕ сӕ бӕрзӕйсаст фӕкодтой не ‘фсӕдтӕ, стыр хъӕбатырдзинад равдисгӕйӕ. Бирӕ цардбӕллон фӕсивӕд бацарӕфтыд уыцы карз хӕстыты. Абон дӕр ма ӕмбисондӕн хӕссынц ӕрджынарӕг хъахъхъӕнджыты лӕгдзинад. Сӕ номыл ам ӕвӕрд ис номарӕн егъау цыртдзӕвӕн.

Елхоты номимӕ ма баст у иу цымыдисаг цау, кӕцыйы тыххӕй мӕ фӕнды лӕмбынӕгдӕр радзурын. Цӕвиттон, цалынмӕ немыц хъӕумӕ не ‘схӕццӕ сты, уӕдмӕ цӕрджытӕй бирӕтӕ алыгъдысты: чи — хъӕдмӕ, чи та — ӕндӕр рӕттӕм. Йӕ къухы кӕмӕн нӕ бафтыд алидзын, уыдонимӕ уыдис Джиоты Нуца дӕр. Бӕргӕ, амондджыныл нымадтой сӕхи йӕ цардӕмбал Садуллӕимӕ, 1940 азы декабры сын дунейы рухсмӕ, бирӕ кӕмӕ ӕнхъӕлмӕ кастысты, уыцы чызг куы фӕзынд, уӕд. Сӕвӕрдтой йыл ном Хадизӕт. Фӕлӕ афӕдзы ӕрдӕджы фӕстӕ райдыдта Фыдыбӕстӕйы Стыр хӕст ӕмӕ тохы быдырмӕ фӕцыдис Садуллӕ. Нуца та иннӕ елхотӕгтимӕ иумӕ къахта акъоппытӕ, ӕххуыс кодта хъахъхъӕнӕн фидӕрттӕ аразынмӕ.

Æрджынарӕг хъахъхъӕнджытимӕ уыдис 84- ӕм Денджызон хицӕн ӕхсӕг бригад дӕр. Иу мӕйдар ӕхсӕв бригады сгарджыты къорд фехъуыста хъӕуы хуссар кӕрон иу хӕлд хӕдзарӕй сывӕллоны кӕуын. Хистӕр лейтенант Александр Лымак ӕмӕ ефрейтор Николай Чуев хъуызгӕ бацыдысты кӕртмӕ ӕмӕ сагъдауӕй баззадысты, ӕвирхъау ныв фенгӕйӕ. Зӕххыл хуыссыдис мард сылгоймаг, йӕ цуры та стъолы къахмӕ баст уыдис хъӕццулы тыхтӕй къаннӕг чызг.

Салдӕттӕ рӕвдз бауадысты сывӕллонмӕ, фӕлӕ сӕ амондӕн афоныл ауыдтой, сабийӕ иуварсмӕ цы тел адаргъ, уый. Куыд рабӕрӕг, афтӕмӕй немыцаг тугдзыхтӕ сӕ фӕстӕмӕ цыды рӕстӕг сывӕллонмӕ минӕ бабастой, цӕмӕй йӕ не ‘фсӕддонтӕ куы ирвӕзын кӕной, уӕд сыл схӕца. Ахӕм ӕгъатыр уыдысты знӕгтӕ: не взӕрстой, зӕронд у, ӕви — сывӕллон.

Салдӕттӕ сабийы хъавгӕ суӕгъд кодтой минӕйӕ, рахастой йӕ ӕмӕ йӕ радтой санитарон ротӕмӕ. Уым ын йе ‘схъисцӕф дзӕбӕх кодта санинструктор Фуад Сайфуллин. Суанг ма кӕмдӕр ссардта сӕгъ дӕр ӕмӕ йын лӕвӕрдта ногдыгъд ӕхсыр, цӕмӕй йӕхиуыл фӕхӕца, уый тыххӕй.

Гъе, афтӕ, кӕй фервӕзын кодтой, уыцы сывӕллон сси полчъы иумӕйаг чызг. Иууылдӕр ыл узӕлыдысты, ӕрхъӕцмӕ йыл нӕ хъӕцыдысты. Скодтой йын райгуырды тыххӕй ӕвдисӕндар дӕр. Схуыдтой йӕ Эльхотӕ, цӕмӕй зона, кӕм ӕй ссардтой, уыцы хъӕу. Мыггаг ын радтой Морская, ома, йӕ фервӕзын кодтой денджызонтӕ, фыды ном та — Анатольевна, бригады комиссар Анатолий Даниловмӕ гӕсгӕ.

Фӕлӕ йын ӕрджынарӕджы бирӕ уадзӕн нӕ уыдис, уымӕн ӕмӕ хӕст цыди дарддӕр. Ин- нӕ сывӕллӕттимӕ йӕ иумӕ раздӕр арвыстой Бруты хъӕумӕ — Елхотӕй 20 километры дарддӕр. Уый фӕстӕ та сабиты аластой ӕдас ранмӕ — Гуырдзыстонмӕ.

Рауадис афтӕ, ӕмӕ йӕ уыцы рӕстӕг та агуырдта йӕ ныййарӕг мад Джиоты Нуца. Фӕлӕ бынтон дзӕгъӕлы уыдис йӕ фыдӕбон… 1943 азы тъӕнджы мӕйы немыц фӕлыгъдысты Ирыстоны зӕххӕй. Рацыд дзӕвгар рӕстӕг ӕмӕ Елхоты хъӕусоветы ӕххӕстком исын райдыдта фыстӕджытӕ сывӕллоны ирвӕзынгӕнджытӕй. Фӕндыдис сӕ сбӕлвырд кӕнын йӕ дарддӕры хъысмӕт. Ӕцӕг ын ничи ницы зыдта, кӕм ӕмӕ цы. ӕрмӕстдӕр Стыр Уӕлахизӕй 25 азы куы рацыд, уӕд зындгонд ирон фыс- сӕг Дзаттиаты Тотырбеджы ӕмӕ Цӕгат Ирыстоны зӕххыл чи фӕмард, уыцы гуырдзиаг хӕстон Спиридон Сичинавӕйы чызг Нателлӕ иумӕйаг хъарутӕй ссардтой Эльхотӕ Морскаяйы фӕд.

Гуырдзыстоны чызджы радтой Сурамийы сывӕллӕтты хӕдзармӕ. Уый фӕста та ӕндӕр ранмӕ. Хорз ӕмӕ архивты баззадысты, Цӕгат Ирыстонӕй цы сабиты баластой, уыдоны гӕххӕттытӕ. Уӕдмӕ Хадизӕт-Эльхотӕ сси Русудан, мыггаг ӕмӕ йын фыды номӕн та радта йӕхи мыггаг ӕмӕ ном, йӕ цӕст ӕм чи дардта, уыцы милиционер Кудзаты Васили. Нателлӕ йыл куы сӕмбӕлд, уӕд Русудан уыдис моймӕцыд. Куыста Тбилисы хуыйӕн фабричы. Йӕ ӕнтыстджын фӕллойы тыххӕй хорзӕхджынгонд ӕрцыд майданӕй. Ӕппӕт уыцы хабӕрттӕ Нателлӕ фехъусын кодта Тотырбегӕн. Уый та бацагуырдта Джиоты Нуцайы. Русуданы къам ын куы равдыстой, кӕцы ист ӕрцыд, нырма сывӕллӕтты хӕдзары уӕвгӕйӕ, уӕд Нуца хъӕлӕсы дзагӕй ныккӕугӕйӕ, загъта: «Уый мӕ Хадизӕт у!». Мады зӕрдӕ зонаг у, ӕмӕ базыдта, ацал ауал азы цы хъӕбулы агуырдта, уый.

Сӕ фыццаг фембӕлд уыдис 1971 азы тъӕнджы мӕйы 13 бон. Цы ӕнкъарӕнтӕ сӕм уыдаид сӕ дыууӕмӕ дӕр, уый сӕхи йеддӕмӕ ничи зоны!

Уыцы аз Стыр Уӕлахизы бон Елхоты Джиоты Хадизӕт фембӕлд йӕ ирвӕзынгӕнджытимӕ — 84-ӕм Денджызон хицӕн ӕхсӕг бригады ветерантимӕ: сгарӕг Николай Чуев, булкъонтӕ Федор Волошин ӕмӕ Алексей Зублин, медицинон зонӕдты доктор Фуад Сайфуллин ӕмӕ иннӕтимӕ. Ацы фембӕлд цӕмӕй сӕнтыстаид, ууыл зӕрдиагӕй бацархайдтой партийы Кировы райкомы секретартӕ Хосонты Къоста ӕмӕ Батиаты Изӕтбег, Елхоты хъӕусоветы ӕххӕсткомы сӕрдар Карсанты Ӕхболат.

Рӕстӕг цӕуы ӕмӕ йемӕ хӕссы ивддзинӕдтӕ дӕр. Нуца амард 1977 азы, фӕстӕдӕр та — йӕ цардӕмбал. Джиоты Хадизӕт — Эльхотӕ Морская — Кудзаты Русудан цӕры Тбилисы, йӕ чызг Ритӕ — Италийы. Йӕ хъӕбулы хъӕбул Ноннӕ йӕ ӕххуысхъуаг нӕ уадзы.

Мӕ радзырдыл ма бафтаудзынӕн уый, ӕмӕ Эльхотӕйы бӕллиц уыдис, цӕмӕй ма иу хатт уӕддӕр йӕ къухы бафта йӕ райгуырӕн хъӕу бабӕрӕг кӕнын. Уыцы стыр лӕвар ын скодта Цӕгат Ирыстоны хицауад. Йӕ курдиат балӕвӕрдыл ӕххӕст суткӕ дӕр нӕ рацыди, афтӕмӕй йын сцӕттӕ кодтой сӕрмагонд гӕххӕтт, цӕмӕй йын Уӕрӕсемӕ ӕрбацӕуӕны бар уа, уый тыххӕй. Сӕххӕст йӕ бӕллиц: Стыр Уӕлахизы радон юбилей бӕрӕг кодта Ирыстоны. Куыд ӕнхъӕлмӕ касти уыцы бонмӕ! ӕнхъӕлмӕ йын кастысты йӕхимӕ дӕр.

2012 азы ӕрбацыдис Русудан Ритӕйы чызг Ноннӕимӕ. Дзӕуджыхъӕуы Сӕрибары фӕзы парады фӕстӕ сӕмбӕлд хӕсты ветерантимӕ. Цы ӕрӕмысыдаиккой, уый та сын уыдис. Фембӕлд республикӕйы уӕды Сӕргълӕууӕг Мамсыраты Таймуразимӕ дӕр. Дзӕуджыхъӕуӕй та йӕ фӕндаг уыд ӕрджынарӕгмӕ. Ам ӕм, Монументы раз, ӕнхъӕлмӕ кастысты Елхоты хъӕуы цӕрджытӕ, Кировы районы разамынд, ӕхсӕнадон организациты минӕвӕрттӕ. Ирон ӕгъдаумӕ гӕсгӕ йыл сӕмбӕлдысты ӕртӕ уӕливыхимӕ. Кировы районы администрацийы сӕргълӕууӕг Батиаты Хъазыбег ӕмӕ газет «Размӕ»-йы бӕрнон секретарь Къубалты Солтан та буц уазӕгӕн скодтой зӕрдылдарӕн лӕвар.

Фыдыбӕстӕйы Стыр хӕсты советон адӕм цы хъизӕмӕрттӕ, фыдбонтӕ баййӕфтой, уыдонӕн рохгӕнӕн нӕй. Нӕй рохгӕнӕн, лӕгсырдтимӕ тохы йӕ адзал чи ссардта, Советон бӕстӕйы уыцы милуангай иузӕрдион хъӕбулты нӕмттӕ. Уыдонӕй алчидӕр у Хъӕбатыр.

 

Фыццаг кары къорды архайӕг ТОХЪМАЙТЫ Аринæ, 19 азы

ОСТАВЬТЕ ОТВЕТ

Please enter your comment!
Please enter your name here