Волгоград ӕмӕ Ирыстоны ӕхсӕн бастдзинӕдтӕ

0
249

«Иры Стыр Ныхас» куыст аразы алы адӕмыхӕттыты ‘хсӕн хӕлардзинады бастдзинӕдтӕ фидардӕр кӕныныл. Ныр дӕр республикӕмӕ йӕ хъӕппӕрисӕй ссыдысты кадджын уазджытӕ Волгоградӕй ӕмӕ цалдӕр боны ӕмархайд кодтой, республикӕйы цы ахсджиаг цаутӕ цӕуы Уӕлахизы Бонмӕ, уым ӕмӕ ӕндӕр культурон мадзӕлтты. Делегацийы уӕнгтӕ сты культурӕйы кусджытӕ, Волгограды алы нациты ӕхсӕнадон организациты разамонджытӕ, Хӕлардзинады хӕдзары минӕвӕрттӕ. Семӕ — зындгонд нывгӕнӕг Владислав КОВАЛЬ, Волгограды Хӕлардзинады хӕдзары сӕргълӕууӕг ФӕРНИАТЫ Хъазыбег, Волгограды Хӕлардзинады хӕдзары “Хистӕрты Ныхас»-ы сӕрдар ДАУЫРАТЫ Арсен.

РЦИ-Аланийы национ ахастдзинӕдты фарстаты фӕдыл министр Цуциты Аслан, нӕ республикӕйы Хӕлардзинады хӕдзары сӕрдар Хъоцыты Георги, «Иры Стыр Ныхас»-ы уӕнгтӕ ӕмӕ нӕ республикӕйы цӕрӕг алы адӕмыхӕттыты диаспорӕты сӕргълӕуджытимӕ цӕлхӕмбырдӕй ӕрныхас кодтой ахсджиаг фарстатыл ӕмӕ дарддӕры бастдзинӕдтыл. Волгограды Хӕлардзинады хӕдзары сӕргълӕууӕг Фӕрниаты Хъазыбег ӕмӕ Хъоцыты Георги бафыстой сӕ къухтӕ дарддӕры ӕмгуыстады бадзырды.

Уазджытӕ архайдтой, Уӕлахизы кадӕн Джызӕл- мӕ фӕндагыл ӕфсӕддон историон-мемориалон комплекс «Барбашовы фӕз» байгом кӕныны.

РЦИ-Аланийы Нывгӕн- джыты цӕдисы равдыстыты залы байгом Владислав Ковалы сфӕлдыстадон куыстыты равдыст «Твердь» Сталинград знагӕй куы ссӕрибар, уый 75 азы юбилейы кадӕн. Владислав у УФ-йы сгуыхт нывгӕнӕг, Волгограды облӕсты Кадджын гражданин, Уӕрӕсейы Нывгӕнджыты академийы кадджын уӕнг. Йӕ ном хъуыстгонд у канд Уӕрӕсейы нӕ, фӕлӕ фӕсарӕнты дӕр. Ирыстон ын уӕлдай уарзон у, уымӕн ӕмӕ райгуырд Дзӕуджыхъӕуы. Фондз азы йыл куы цыд, уӕд йӕ бинонтӕ раивтой сӕ цӕрӕн бынат Волгоградмӕ.

— Мӕ арф ӕнкъарӕнтӕ мӕ миддунейы цӕджджина- гау фыцынц. Ирыстоны нӕ уыдтӕн 64 азы, фӕлӕ, сабийӕ кӕмыты хъазыдтӕн, уыдон хорз хъуыды кӕнын, Цӕстытыл уайы уӕды Дзӕуджыхъӕу, Хетӕгкаты Къостайы номыл фӕлладуадзӕн парчы уӕды ӕддаг бакаст, Сабырдзинады проспект. Уый диссаг у, фӕлӕ мӕхи хъуыды кӕнын, афӕдз мыл куы цыд, уӕдӕй. Суанг ацы фӕрныг зӕххыл фыццаг къахдзӕфтӕ куыд акодтон, уый дӕр. — зӕгъы Владислав Коваль. Сывӕллонау цин кодта Ирыстоныл, уынгты цӕуджытыл ӕмӕ-иу, йӕ риуыдзаг сулӕфгӕйӕ, йӕ цӕсгом ныррухс.

Равдыст байгом кӕныны размӕ фысымтӕ уазджытыл сӕмбӕлдысты ӕртӕ уӕливыхы ӕмӕ бӕгӕныйы къусимӕ. Зӕрдиагӕй сын ракуывта «Иры Стыр Ныхас»-ы сӕрдар Кучиты Руслан.

Ирыстонимӕ ӕнгом культурон бастдзинӕдтыл зӕрдиагӕй кӕй кусынц ӕмӕ хӕлардзинады хидтӕ аразыныл кӕй архайынц, уый фӕдыл уазджытӕн РЦИ-Аланийы Сӕргълӕууӕг Битарты Вячеславы номӕй Владислав Ковалӕн Цуциты Аслан зӕрдиаг арфӕтимӕ радта Кады гӕххӕтт ӕмӕ зӕрдылдарӕн лӕвӕрттӕ. Кады гӕххӕттытӕ сын саккаг кодтой Национ ахастдзинӕдты фарстаты фӕдыл министрад, «Хӕлардзинады Хӕдзар», «Иры Стыр Ныхас» ӕмӕ Нывгӕнджыты цӕдис.

Уазджыты равдысты сӕ аивадӕй бабуц кодтой кӕфтыты ансамбль «Горец»-ы кафджытӕ, хӕстон зарджытӕ акодтой ансамбль «Фидӕн»-ы артисттӕ.

Аив ӕмӕ мидисджын уыдысты Цуциты Асланы, Нывгӕнджыты цӕдисы сӕрдар Мӕргъиты Таймуразы, «Иры Стыр Ныхас»-ы сӕрдар Кучиты Русланы, «Иры Стыр Ныхас»-ы сӕрдары хӕдивӕг, ацы мадзал кӕй хъӕппӕрисӕй ӕрцыд арӕзт, уый Дзекъойти Юрийы, нывгӕнӕг Гасынты Жоржы раныхас.

Нывгӕнӕджы уацмыстӕм аивадуарзджытӕ бакастысты цымыдисӕй. Зӕгъын хъӕуы уый дӕр ӕмӕ Уӕрӕсейы цы регионалон, ӕмӕ муниципалон гербтӕ ис, уыдонӕн сӕ 80 проценты автор у Владислав. У эмблемӕты, тырысаты сфӕлындыны дӕсны. Сныв кодта 500 куыстӕй фылдӕр. У нывкӕнынады аивады ног хуыз «Трансформер- Арт»-ы бындурӕвӕрӕг. Йӕ сфӕлдыстады ахсджиаг бынат ахсы Чырыстон дины темӕ. Кӕттӕгтыл «И сотворил Бог человека», «Искушение», «Адам», «Изгнание», «Свет Георгия» ӕмӕ иннӕты ирдӕй бӕрӕг дарынц йӕ арф зонындзинӕдтӕ ӕмӕ ӕнкъарӕнтӕ. Ис сӕ философон хъуыды. Йӕ уарзондзинад ӕмӕ ахаст ӕрдзмӕ хъары алы нывӕй дӕр. Арӕхдӕр ӕвдисы денджыз, хӕхтӕ, бӕлӕстӕ, мӕргътӕ. Уыдон иууылдӕр ӕвдисӕн сты нывгӕнӕджы миддунейы хъӕздыгдзинад, сыгъдӕгдзинад ӕмӕ бӕркадӕн.

Владислав Коваль стыр бузныг зӕгъы, йӕ бӕллиц, Ирыстонмӕ ссӕуын ын Ныхасы уӕнгтӕ кӕй сӕххӕст кодтой, ӕмӕ йыл Ирыстон, хи хъӕбулау кӕй бацин кодта, уымӕй. Равдыст бабӕрӕггӕнӕн уыдзӕн 10 маймӕ.

ХЕТӔГКАТЫ Оксанӕ

Авторы ист къамтӕ

ОСТАВЬТЕ ОТВЕТ

Please enter your comment!
Please enter your name here