БИТАРТЫ Вячеслав: “Мадæлон æвзагæн лæггад кæнын у стыр æмæ бæрнон куыст”

0
74

 

Афтæ куы зæгъæм, æмæ Хетæгкаты Къостайы номыл паддзахадон университеты ирон филологийы факультет у, æмбал кæмæн нæй, йæ ахадындзинад абарæн кæмæн нæй ахæм, уæд нæ фæрæдийдзыстæм. Ацы бонты бæрæг кæны йæ 95 азы юбилей. Æнусы бæрц иу фæлтæр иннæмæн цæстыгагуыйау хъахъхъæнгæйæ, дæттынц ирон æвзаг æмæ литературæйы тыххæй зонындзинæдтæ, фыст цæуынц уацмыстæ æмæ ахуыргæнæн чингуытæ. Кæд фыццаг бакастмæ гæсгæ ацы дæсныйад уыйас агуырд нæ цæуы, уæддæр алы аз дæр факультеты къæсæрæй æрбахизынц æрыгон чызджытæ æмæ лæппутæ. Факультеты ивгъуыд, йæ абоны уавæры тыххæй бæстон ныхас рауадис, университеты цы кадджын æмбырд конд æрцыдис, уым.

 

Бæрæгбон фидауы арфæтæй, уымæ гæсгæ уал фыццагдæр, уыдон райхъуыстысты. «Ахуырады ацы факультетæн ис хи, сæрмагонд, бынат. Ардыгæй цардмæ ракъахдзæф кодтой бирæ номдзыд адæймæгтæ, уыдон абон дæр бæрзонд хæссынц ирон æвзаджы тырыса, йæ райрæзты сæ бавæрд у ахъаззаг. Мадæлон æвзагæн лæггад кæнын у стыр æмæ бæрнон куыст. Нæ сæйрагдæр хæстæй абон иу у, ног специалисттæ хъомыл кæнын, кæд уый хуымæтæг хъуыддаг нæу, уæддæр ыл хъуамæ иумæйагæй бацархайæм», — загъта йæ арфæйы ныхасы Республикæ Цæгат Ирыстон-Аланийы Сæргълæууæг Битарты Вячеслав. Куыд бафиппайдта, афтæмæй йæхæдæг æппынæдзух йæ хъус дары, нæ республикæйы мадæлон æвзагимæ цыдæриддæр хъуыддæгтæ баст ис, уыдонмæ.

Уый фæстæ республикæйы Сæргълæууæг кадджын хæрзиуджытæ радта цалдæр адæйм гæн. Майдан «Ирыстоны намысæн»-æй хорзæхджынгонд æрцыд Хетæгкаты Къостайы чиныг «Ирон фæндыр» абхазаг æвзагмæ ратæлмацгæнæг, поэт Геннадий Аламиа. Битарты Вячеславы къухæй хæрзиуæг райсгæйæ, уазæг загъта афтæ: «Къоста æнцон бамбарæн у, фæлæ мын уæлдай æхсызгон уый у, æмæ ныр ме ‘мзæххонтæ йе сфæлдыстад арфдæр кæй банкъардзысты, уый». Ирон æвзаджы рæзты бирæазыккон бавæрды тыххæй факультеты декан Хозиты Барис хорзæхджынгонд æрцыд майдан «Ирыстоны намысæн»-æй. Ирон филологийы факультеты кусджытæй бирæты архайд бæрæггонд æрцыд æндæр кадджын хæрзиуджытæй. Уыдон райсыны охыл сценæмæ схызтысты, бонæй- бонмæ, факультеты, нæ уарзон республикæйы сæраппонд чи фыдæбон кæны, уыдон.

95 азы размæ уæды институты фæзындис ирон æвзаджы кабинет, уыцы хъуыддаг дæр нымад æрцыд стыр æнтыстдзинадыл. Фæстæдæр, Хетæгкаты Къостайы номыл паддзахадон университеты сæргъы Мæхæмæтты Ахуырбег куы ‘рлæууыд, уæд ирон адæмы бирæ фæлтæрты стырдæр бæллиц æххæстгонд æрцыд — фæзынд ирон филологийы факультет.

ОСТАВЬТЕ ОТВЕТ

Please enter your comment!
Please enter your name here