Боны фæткы – математикон ахуырады фарстатæ

0
66

Математикон ахуырады фарстатæ республикæйы куыд лыггонд цæуынц? Ууыл знон сæ кусæг фембæлды рæстæг æрдзырдтой Цæгат Ирыстоны Сæргълæууæг Битарты Вячеслав æмæ ахуырад æмæ наукæйы министр Иринæ Азимова. Уый тыххæй фехъусын кодта РЦИ-Аланийы Сæргълæууæджы пресс-службæ.

Ныхасы архайдтой республикон физикон-математикон лицейы директор Франкель Магомедов, йæ хæдивæг Мæргъиты Нелли æмæ Дзæуджыхъæуы разамынды институты ректор Цопанты Игорь.

Иринæ Азимова РЦИ-Аланийы Сæргълæууæгæн радзырдта, Республикæ Цæгат Ирыстон-Аланийы математикон ахуырады фæдыл сæрмагонд проект куыд æххæстгонд цæуы, уый тыххæй. Министры ныхасмæ гæсгæ, проекты сæйрагдæр нысан у, математикон ахуырадмæ зæрдæргъæвддзинад чи æвдисы, уыцы сывæллæтты сфæлдыстадон гæнæнтæ раргом кæныныл аудын.

Куыд нысангонд цæуы, афтæмæй математикæмæ æмхиц сывæллæттæн уыдзæн республикон физикон-математикон лицейы, стæй муниципалон районты æмвæзадыл математикæмæ здæхт скъолаты ахуыр кæныны фадат. Фембæлды рæстæг куыд загъдæуыд, афтæмæй математикон кълæсты ахуырдзауты рауагъдонты цæттæдзинад хъуамæ дзуапп дæтта æппæты нырыккондæр домæнтæн.

Уый фæдыл Битарты Вячеслав сæрмагонд амынддзинæдтæ радта Ахуырад æмæ наукæйы министрады, стæй проекты архайæг иннæ ведомствотæ æмæ организациты разамонджытæн. Уыдоны номхыгъды: Цæгат Ирыстоны Хетæгкаты Къостайы номыл паддзахадон университет, Дзæуджыхъæуы наукон центр, Цæгат Ирыстоны паддзахадон педагогон институт, Дзæуджыхъæуы разамынды институт, Ахуырады къабазы кусджыты дæсныдзинад бæрзонддæр кæныны институт, стæй бынæттон хиуынаффæйады оргæнтæ.

Нæ уацхæссæг

 

ОСТАВЬТЕ ОТВЕТ

Please enter your comment!
Please enter your name here