Фæллойгæнæгæн — кад

0
69

РЦИ-Аланийы Парламенты сæрдар Алексей Мачнев Уæлахизы бонмæ Багаты мыггаджы кадджын хистæр, Фыдыбæстæйы Стыр хæсты фæсчъылдымы ветеран Багаты Алексейы фырт Никъалайы схорзæхджын кодта Кады гæххæттæй, Ирыстоны культурон традицитæм йæхи æвæрæн кæй бахаста, фæсивæды патриотон хъомылады йæ æрмдзæф бæрæг кæй дары æмæ Æппæтдунеон æхсæнадон змæлд «Иры Стыр Ныхас»-ы активонæй кæй архайы, уый тыххæй.

 

Багаты Никъалайæн Кады гæххæт кадджын уавæры радтой «Стыр Ныхас»-ы сæрдары хæдивæг Еналдыты Хъазыбег æмæ «Стыр Ныхас»-ы Терчыфалейы районы хайады сæргълæууæг Туаты Руслан.

— Бузныг уе ‘рхъуыдыдзинадæн, — загъта Никъала. — Абоны онг цы бафыдæбон кодтон Ирыстонæн, уымæй фæсмон æппындæр ницæуыл кæнын. Архайдтон, мæ хъарутæ цас амыдтой, уый бæрц, нæ адæмы сомбоныл хъуыды кæнгæйæ.

Никъала райгуырд Тибы. Аст азы уым фæцард. 1940 азы йæ фыд Алексей йæ бинонтимæ ралыгъд быдырмæ æмæ æрцард Къостайыхъæуы. Райдыдта Фыдыбæстæйы Стыр хæст. Коляйыл уæд дæсæм аз цыдис, фæлæ йæ асмæ гæсгæ хистæр зындис. Хъæуы куыстхъом нæлгоймæгтæм æрсидтысты æфсады службæ кæнынмæ. Колхозы куыстытæ æрхаудтой кардзыд лæгтæм, сылгоймæгтæм æмæ сывæллæттæм. Фæсте нæ баззад Коля дæр, куыста колхозы бæхыл. Бригæдтæм ласта дон бæхуæрдоныл, хæринаггæнæджы — йæ хъæрмхуыпп æмæ дзултимæ. Тыллæг æфснайæн афон-иу уæд колхозтæн æфсæддон службæгæнджытæ дæр æххуыс кодтой. Цардысты адæмы хæдзæртты. Колятæм дæр дзы уыдис цыппар салдаты, кæд сæхæдæг æххуырст хæдзары цардысты, уæддæр. Бахæлар сты бинонтимæ æфсæддонтæ. Коля семæ уырыссагау дзурыныл фæцалх, фæстæдæр ын уый скъолайы ахуыры феххуыс, уырыссаг æвзаг æмæ литературæйæ иста æрмæстдæр хорз бæрæггæнæнтæ.

Скъолайы фæстæ каст фæцис Дзæуджыхъæуы Плехановы номыл институты филиалы базарадон факультет. Уый фæстæ сæхи колхозы, стæй Зæрæмæджы турбазæйы инструкторæй акусыны фæстæ райдыдта йе ‘цæг фæллойадон фæндаг. Куыста Сыбыры ресторан «Вильюй»-йы директорæй. Йæ хорз куысты тыххæй йын фатер дæр радтой, æмæ йæ фæстæдæр Дзæуджыхъæуы Горькийы уынгмæ баивта. Хистæр æмæ астæуккаг фæлтæры горæтæгтæ æмæ уæды заманы студенттæ ма абон дæр хорз хъуыды кæнынц, Сабырдзинады проспекты кинотеатр «Родина»-йы уæллаг фарс цы хæрæндон уыдис, уый. «Диетическая столовая» фыст ыл уыдис. Йæ сæргълæууæг уыд Никъала. Адæм хæрæндоны куыстæй разы кæй уыдысты, уым уыдис Багайы-фырты стыр бавæрæн. Хæринæгты хæрзхъæддзинад æмæ бæстыхайы сыгъдæгдзинадмæ, æрбацæуджытæн нывыл балæггад кæныны хъуыддагмæ йæ хъус тынг дардта.

Фæстæдæр уыд Леваневскийы уынджы æхгæд базары директор, Сабырдзинады проспекты дукани «Весна»-йы директор, базар «Привоз»-ы директор, Дзæуджыхъæуы спъиртзаводы хæрæндоны директор.

Горæты диетон хæрæндон кæй нал уыд, уый йын æнцойад рагæй нæ лæвæрдта. Хицæуттæй бирæты кусæнуæтты дуæрттæ бахоста. Æмæ кæддæр-уæддæр уый хъæппæрисæй Пожарскийы уынджы байгом ахæм хæрæндон. Горæты цæрджытæй бирæ ис, ахсæны туагад кæй хъыгдары, ахæмтæ. Уымæ гæсгæ йæ фæнды, цæмæй кæддæрау диетон хæрæндон уа Сабырдзинады проспекты дæр. Никъала цы бынæтты фæкуыста, уым ныууагъта хорз фæд.

 

ХЕТÆГКАТЫ Оксанæ

ОСТАВЬТЕ ОТВЕТ

Please enter your comment!
Please enter your name here