Ис раззагдæртимæ

0
52

«Зынаргъ Олег æмæ Фатимæ! Сæрыстырæй уын хъусын кæнæм, уæ фырт ЗÆГЪОЙТЫ Артур намысджынæй кæй æххæст кæны йæ æфсæддон хæс. Цыбыр рæстæгмæ райста иттæг хорз зонындзинæдтæ æмæ йæ арæхстдзинадмæ гæсгæ у раззагдæрыл нымад. Алы хъуыддаг дæр кæны афойнадыл æмæ æнæзæрдæхудтæй. Уый тыххæй æфсæддон хайы разамындæй хорзæхджынгонд æрцæуы, кад ын ис командирты æмæ йе ‘мгæртты ‘хсæн. Стыр бузныг уын, ныййарджытæ, ахæм хæрзæгъдау лæппу, Уæрæсейы æцæг хъахъхъæнæг кæй схъомыл кодтат, уый тыххæй», — афтæ райдыдта 54821-æм æфсæддон хайы командир, булкъон А. Литвиновы фыстæг Тарскæйы хъæуы цæрджытæ Зæгъойты Олег æмæ Фатимæйы номыл. Æхсызгон куыд нæ уыд мад æмæ фыдæн сæ хъæбулы тыххæй ахæм ныхæстæ бакæсын.

Уæрæсейы ракетон æфсæдты рæнхъыты Краснодары крайы абон иузæрдионæй службæ кæны æрыгон салдат, архайы нæ бæстæйы æдасдзинад хъахъхъæныныл, хæстон цæттæдзинад фидар кæныныл. Ирон лæппуйы кад бæрзонд хæссы, афтæмæй хистæр афицерты амынддзинæдтæм хъусгæйæ, йæхи æвдисы сæрæн æмæ къæрцхъус æфсæддонæй. Ирыстонæй дард ран æй бахъуыдысты, скъоладзау уæвгæйæ спортивон секциты цы зонындзинæдтæ райста, уыдон. 19-аздзыд лæппу барвæндонæй ацыд æфсадмæ. Службæ кодтой йæ фыд, йæ хистæр æфсымæр æмæ уыдоны бафæзмыдта. Хионтæ, хæстæджытæ, сыхбæстæ йæ арфæтимæ афæндараст кодтой. Йæ буц хъæбулы ссыдмæ уæлдай тынгдæр æнхъæлмæ кæсы йæ фæлмæнтæдзураг нана.

— Уæ зæрдæ мæм ма æхсайæд, разы дæн мæ службæйæ, фæзынд мын ног æмбæлттæ. Хæринаг, дзаумахъуаг не ‘ййафæм. Бауырныдта мæ, æфсад лæппуйæ лæг кæй кæны, уый, — фæзæгъы Артур хионтимæ телефонæй дзургæйæ. Алкæй хъæбул дæр ныййарæджы фæндиаг уæд!

ГУГКАТЫ Жаннæ

ОСТАВЬТЕ ОТВЕТ

Please enter your comment!
Please enter your name here