Невайы былыл — ирон “Симд”

0
107

Стыр арфæйаг сты, Ирыстонæй дард уæвгæйæ, нæ ирон æгъдау æмæ культурæ чи парахат кæны, уыдон. Ныры дуджы, нæ удварн куы фæцудыдта, нæ нацийы хæзнатæй бирæтæ рохуаты куы зайынц, уæд сæ дард рæтты та бирæтæ сæ бахъахъхъæныныл сæ уд хъарынц. Дæ адæмæн дæ балæггад кæнын куы фæнда, уæд, кæмфæнды у, де ‘нкъарæнтæ алыран дæр равдисдзынæ.

Дард Уæрæсейы зæххыл йæ адæмы культурæ рох кæнын чи нæ уадзы, уыдонæй у, Санкт-Петербурджы ирон æхсæнады бындурыл чи сырæзт, уыцы Адæмон вокалон-хореографион ансамбль «Иристон СПб» дæр. Аивады ацы артдзæст 17 азы Петербурджы цæрæг адæмæн хæссы цин æмæ зæрдæрухсдзинад. Рацыд дзы бирæ курдиатджын фæсивæд. Гастрольты вæййынц дунейы алы къуымты. Сæ уæлахизтæн нымайæн дæр нæй. Ансамблæн бирæ азтæ снывонд кодта æмæ йын абоны онг дæр лæггад кæны йæ аивадон разамонæг, Цæгат Ирыстоны культурæйы сгуыхт кусæг Æлдаттаты Фатимæ. Йæ президент æмæ меценат у Цæкулаты Арсен. Æрæджы, 6 майы, та ансамбль «Иристон СПб» равдыста, сезоны кæрон куыд вæййы, афтæ йæ дзуаппон киноныв-концерт «Бузныг», зæгъгæ, ахæм номимæ. 400 адæймаджы фаг бынæттæ кæм ис, уым къух бакæнæн нæ уыд. Коцертмæ кæсджытæ федтой ансамблы сноггонд программæ, музыкæ, ног формæ, кæфтыты ног хуызтæ æмæ фæзилæнтæ.

Ацы концерт иннæтæй уымæй хицæн кодта, æмæ кафт æмæ зарды номыртæ документалон киноимæ кæрæдзи ивгæ кæй цыдысты. Сценæйыл æвæрд экраныл æвдыст цыдысты алыхуызон мидисджын видеоæрмæджытæ. Мадзал аразджытæ бацархайдтой, цæмæй коцертмæ кæсæг бамбара ирон адæмы миддуне, нæ культурæ, нæ традицитæ, нæ ныртæккæйы цардыуаг, Кавказы иннæ адæмтæй цæмæй хицæн кæнæм, нæ кæфтыты нысаниуæг æмæ сусæгдзинæдтæ æмæ афтæ дарддæр. Зæгъæм, искæцы кафтмæ бакæсыны фæстæ-иу кафты равзæрд æмæ нысаниуæгимæ адæм базонгæ сты видеоæрмæджытæй.

Ансамблы æнтыстытыл бирæ дзурæн ис, фæлæ зæгъдзынæн, ацы аз сын январы Эстонийы цы стыр кад скодтой, уый тыххæй. Уым ансамбль схорзæхджын кодтой æппæты кадджындæр хæрзиуджытæй дæр. Хуыздæрты-хуыздæрыл та нымад æрцыдысты «Хонгæ» æмæ «Хохаг кафт». Уыдонæй уæлдай ма сæ репертуары сты «Симд», «Ерысы кафт», туаллаг, абхазаг æмæ æндæр кафтытæ.

Ансамблы аивадон разамонæг Æлдаттаты Фатимæ куыд зæгъы, афтæмæй кафын сахуыр кæнын зын нæу, зын у йæ нысаниуæг ын адæмы размæ рахæссын. Кафты ахсджиаг фарстатæ та сты алы лыстæг фæзилæнтæ, дзаумайы конд, цæстæнгас, хи дарын…

«Мæ фыд, стæй ме ‘ввахс хиуæттæ æдзухдæр тырныдтой ирон æгъдæуттæ рæсугъдæй æххæст кæнынмæ. Уыцы фарн мæ туджы бацыд мæ сабибонтæй фæстæмæ æмæ йæ æз дæр дарддæр дæттын мæ ахуыргæнинæгтæн. Ирыстонæй дард цы сывæллæттæ райгуырд æмæ хъомыл кæны, уыдонæн зын у сæ адæмы цард æмæ культурæ бæстон рафæлгъауын, æмæ мах дæр ууыл архайæм, цæмæй бамбарой, цы адæмæй сты, уый. Концерттæй уæлдай арæх скæнæм куывдты, чындзæхсæвты инсценировкæтæ, вæййы нын алыхуызон фембæлдтытæ. Концерты фæстæ мын адæм цы зæрдæбын арфæтæ фæкæнынц, уыдонмæ гæсгæ, зæгъæн ис, нæ фæнд нæ къухы бафтыд, цы æндæр адæмыхæттытæ нæм æрбацæуы, уыдонæн та нæ ирон культурæмæ рæзы сæ цымыдис», — зæгъы Фатимæ. Ансамблы ис, кафыныл чи ахуыр кæны, ахæм кæстæр къорд, астæуккаг æмæ, концерттæ чи дæтты, уыцы сæйраг къорд. Хореографийæ уæлдай дзы ис вокалон, стæй, рагон инструменттыл чи цæгъды, ахæм къордтæ. Дард Петербурджы ирон фæсивæды нæ фыдæлты рагон музыкалон инструменттыл цæгъдыныл чи ахуыр кæны, нæ национ хæзнатæ сын чи уарзын кæны, уый у къорды аивадон разамонæг Джиоты Хазби.

Ансамблы ис дохтыртæ, экономисттæ, архитектортæ… Йæ активисттæ сты Пагæты Аслан, Киситы Руслан, Гæззаты Сабинæ, Гоститы Маринæ, Дзиццойты Давид, Зассеты Давид, Плиты Хетæг æмæ Георги, Бузойты Тигран, Цоциты Агуындæ, Дзуццаты Зæринæ, Зохъоты Зæлинæ, Къусраты Роксанæ, Гаджиты Иринæ, Бестауты Наташæ, Дриаты Миленæ æмæ æндæртæ. Уыдон цыфæнды æнæвдæлонæй дæр ссарынц рæстæг æмæ фарн æмæ циндзинад хæссынц Невайы былыл цæрæг ирон, стæй æндæр адæмтæн дæр.

Стыр бузныг, Ирыстонæй дард уæвгæйæ, йæ ирондзинад чи нæ сафы, йæ бахъахъхъæныныл чи архайы æмæ йæ адæмы ‘хсæн чи парахат кæны, уыдонæн се ‘ппæтæн дæр.

ДРИАТЫ Зæринæ, ансамбль “Иристон СПб»-йы раздæры архайæг, Санкт-Петербург

ОСТАВЬТЕ ОТВЕТ

Please enter your comment!
Please enter your name here