Бафыстой бадзырд

0
107

РЦИ-Аланийы Парламенты Сæрдар Алексей МАЧНЕВ æмæ æхсæнадон организаци «РЦИ-Аланийы профцæдисты организациты иугонд»-ы сæрдар КАСАТЫ Таймураз закъоны бындурыл æмгуыстады тыххæй бадзырд бафыстой. Ацы хорз хъуыддаг æнæмæнгæй ахъаз уыдзæн граждæнты социалон-куыстадон бартæ æмæ интерестæ бахъахъхъæнынæн, адæмæн сæ царды уавæртæ фæхуыздæр кæнынæн, закъонадон базæ саразынæн.

Нырæй фæстæмæ иумæйагæй кусдзысты социалон-куыстадон ахастдзинæдты, адæмæн куысты бынæттæ раттыны, экологион æдасдзинад æмæ куыстадон фыдбылызтæ ма ‘руадзыны, санаторон-курортон фæлладуагъды, туризм æмæ æндæр фарстатыл. Бадзырды домæнтæ æххæст кæнгæйæ арæзт цæудзæнис иумæйаг форумтæ, семинартæ, конференцитæ, архайдзысты кусæг къордты.

Вазыгджын документы сæ къухтæ бавæрдтой Алексей Мачнев æмæ Касаты Таймураз. Æвдисæнтæй сын ныллæууыдысты Парламенты депутаттæ æмæ республикæйы хицæн профцæдисты разамонджытæ.

— Профцæдистæ сты æппæты егъаудæр æхсæнадон организаци, хорз зонынц фæллойгæнæг адæмæн сæ социалон æмæ æндæр сагъæстæ, уыдоны бартæ хъахъхъæныныл кусгæйæ профцæдистæ хъуамæ махимæ архайой ног закъонтæ сфидар кæныныл, — загъта Алексей Мачнев.

Республикæйы ис 1100 профцæдисон организацийы, сæ рæнхъыты — мингай адæймæгтæ. Уымæ гæсгæ бадзырд бафыссыны хъуыддагæн стыр аргъ скодта Касаты Таймураз дæр.

— Фыццаджыдæр уын бузныг зæгъын, нæ фарсмæ кæй æрбалæууыдыстут, нæ хъæппæрисыл кæй сразы стут, уый тыххæй. Ацы бадзырд нын фадат дæтты, закъонты проекттæ цæттæ кæныны куысты архайгæйæ, ноджы парахатдæрæй кусынæн, кусæг адæмы интерестæ хъахъхъæнынæн, — фæнысан кодта республикæйы профцæдисты организациты иугонды сæрдар Касаты Таймураз.

 

ГУГКАТЫ Жаннæ

ОСТАВЬТЕ ОТВЕТ

Please enter your comment!
Please enter your name here