Фæткмæ гæсгæ æмæ бæлвырд нысантимæ

0
141

Æнæбæрæггонд куыстылæуд фæныллæгдæр кæныны тыххæй хъуамæ районты къамисты куыст цæуа æнæкъуылымпыйæ æмæ сæ сæ размæ бæлвырд нысантæ æвæрын кæй хъæуы, уыдæттæм нæ республикæйы Хицауады Сæрдар ТУСКЪАТЫ Таймураз аздæхта оперетивон æмбырды архайджыты æргом. Куыд загъта, афтæмæй фæстаг дыууæ азы физикон адæймæгты æфтиæгтыл хъалонты рæзт цæуы нывыл, æмæ ууыл та сахадыдта, «Майы указтæ» кæй æххæст кæнынц, уый, сæ бындурыл та бюджетон къабазы кусджыты мызд къæпхæнгай фылдæр кæй кæны.

«Ацы хуыздæргонд уавæрты нæм къорд фарстайы ис Дзæуджыхъæуы æмæ хъæууон районты æрбынæттон уæвæг экономикæйы секторы куыстуæттæ æмæ организацитæм. Амынд структурæты æвæрæнтæ бюджетмæ æмæ æнæбюджетон фондтæм хъуамæ уой дзæвгар фылдæр», — фæбæрæг кодта Цæгат Ирыстоны Хицауады Сæрдар.

Хицауады Сæрдары хæдивæг Томайты Ирбег куыд фехъусын кодта, афтæмæй кусæг къорд сбæрæг кодта 97 фистæгæйахизæн бынаты Дзæуджыхъæуы, Рахизфарсы æмæ Горæтгæрон районты скъолаты цур, уыдон æдасдзинады ног национ стандартты домæнтæн дзуапп дæттынц æви нæ, уыдæттæ. Республикæйы муниципалитетты хъæуы Горæтгæрон районы фæлтæрддзинад райсын, цæмæй Уæрæсейы Президенты ныстуантæ æххæстгонд цæуой фæндаггон æдасдзинад фæуæлдæр кæныны хайы. Амынд районы æртæ фистæгæйахизæны хъæууон скъолаты цур арæзт æрцыдысты нырыккон домæнтæм гæсгæ, Ногиры фыццæгæм скъолайы фистæгæйахизæны арæзт та у фæзминаг.

Æмбырды æрныхас кодтой, Цæгат Ирыстоны делегаци рæхджы Санкт-Петербурджы дунеон экономикон форумы кæй архайдзæн, уыимæ баст фарстатыл. Тускъаты Таймураз фæллойы æмæ социалон рæзты министр Хъесаты Игорæн бафæдзæхста, цæмæй иудадзыг бастдзинад дара Уæрæсейы Пенсион фондимæ субсидитæ нын раттыны фарстайы фæдыл, республикон психоневроло- гион хæдзар-интернат «Милосердие»-йы инфраструктурон хызтæ цалцæг кæнынæн æхсызгон кæй хъæуынц, уый тыххæй. Ныхас цæуы канализацийы сыгъдæггæнæн системæйы цалцæгыл. Уыимæ ахъуыды кæнын хъæудзæн къорд техникон фарстайыл дæр, цæмæй ацы системæмæ баиу кæнæн уа хæдзаринтернатмæ æввахс æрбынæттон уæвæг (Хуадоны-уынджы) фондзуæладзыгон хæдзар дæр.

Хицауады Сæрдар Дзæуджыхъæуы бынæттон хиуынаффæйады администрацийы, Алагиры районы хицаудзинæдты æмæ Æнæниздзинад хъахъхъæнынады министрады разамонджыты æргом аздæхта, фельсырон-акушерон пунктты (ФАП) арæзтад кæй фæтагъддæр кæнын хъæуы, уымæ. Алагиры районы сæргълæууæг Бутаты Арсены ныхасмæ гæсгæ Цъæйы ФАП-ы арæзтады сметæйы документтæ сты конд æмæ тагъд райдайдзысты бетонгæнæн куыстытæ.

Дзæуджыхъæуы бынæттон хиуынаффæйады администрацийы сæргълæууæджы хæдивæг Фæрниаты Тамерлан куыд загъта, афтæмæй æввахсдæр рæстæг поселок Реданты медицинон пункты документтæ уыдзысты цæттæ. Уымæй уæлдай Хицауады Сæрдар йæ хæдивæг Фадзайты Æхсарбег æмæ къабазы министр Сохъуырты Альбертæн бабар кодта, цæмæй уыдон районты хицаудзинæдтимæ хъæугæ ивддзинæдтæ бахæссой радон фæззыгон-зымæгон рæстæгмæ цæттæ кæныны мадзæлтты раздæры ист пълантæм. Ацы аз коммуналон инфраструктурæйы объекттæм цы финансон æвæрæнтæ хаст æрцæуой, уыдон хъуамæ ивгъуыд азæй къаддæр ма уой, хъармгæнæн рæстæг пайдайаг хуызы ацæуын уыдонæй аразгæ кæй у, уый тыххæй.

РЦИ-Аланийы Сæргълæууæджы æмæ РЦИ-Аланийы Хицауады пресс-службæ

ОСТАВЬТЕ ОТВЕТ

Please enter your comment!
Please enter your name here