Рæсугъддзинад йæ зæрдæйы цæры

0
147

 

Кæцы чызджы не ‘лвасы йæхимæ рæсугъддзинад, кæцы чызг нæ уарзы аив дзаума, рæсугъд уæлæдарæс? БАСАТЫ Анжелæ ацы æнкъарæнтæ йæхимæ тынг раджы бафиппайдта, суанг ма 4-аздзыд чызгæй йæ куклатæн къабатæ хуыйын куы райдыдта, уæд. Афтæмæй раргом, аивады дунемæ æмхицдзинад чызгæн йемæ кæй райгуырд æмæ, диссаджы нывтæй уæлдай чи нæу, ахæм рæсугъд дзаумæттæ аразынмæ дæсны кæй у, йæ уыцы æрдзон курдиат.

Уыцы курдиат æрыгон чызджы кæддæр æрбакодта аивæдты училищемæ. Каст æй фæци иттæг хорз бæрæггæнæнтимæ æмæ ныр ссæдз азæй фылдæр æнтыстджынæй архайы йæ алыварс дуне аив, зæрдæмæдзæугæ дзаумæттæй срæсугъд кæныныл. Рæсугъддзинады конкурс «Краса России» Мæскуыйы цалдæр азы размæ куы цыд, уæд йæ архайджытæй иуыл уыд, Анжелæ кæй бацæттæ кодта, уыцы къаба, æмæ конкурсы архайæг чызг, йæ уæлæ Анжелæйы хуыд къаба, афтæмæй йæхæдæг дæр, æмæ йæ къаба дæр бацахстой 2-аг бынат.

Уæлæдарæс хуыдта, Кæсæг-Балхъары цæуæг конкурс «Кавказы рæсугъд»-ы чи архайдта, уыцы чызджытæн. 2013 азы йæ конд дзаумæттимæ архайдта «Неделя высокой моды», зæгъгæ, Ереваны цæуæг уыцы дунеон конкурсы дæр. Уæвгæ, алыхуызон конкурсты архайджытæн рæсугъд уæлæдарæс хуыйыны Анжелæмæ ис стыр фæлтæрддзинад — куыд дизайнер æмæ хуыйæг, уыцы хуызы-иу æй бацагуырдтой алыхуызон дунеон æмæ уæрæсейаг конкурстæм. Ирыстоны конкурс «Мисс Алания» арæзт куы цыд, алкæддæр дзы Анжелæ уыд регионалон директор. Йæ хуыд къабатæн аргъ кодтой суанг Испанийы дæр. «Принцесса мира», зæгъгæ, цалдæр азы размæ дзы цы конкурс цыд, уым дæр уæрæсейаг чызг бацахста фыццаг бынат. Йæ уæлæ уыд, Анжелæ йын цы къаба æрхъуыды кодта æмæ бахуыдта, уый.

Ссæдз азы размæ Анжелæйæн йæ фыццаг хъæбул куы райгуырд, уæд æрыгон ныййарæгмæ раргом æндæр æрмдæсныдзинад дæр — хуыйын райдыдта хъазæнтæ сувенирты хуызы. Ацы курдиаты фæрцы йæ царды фæзынд аивады ног хуыз — сывæллæтты театр. Йæхæдæг фыссын райдыдта аргъæуттæ, аразын сыл сценаритæ æмæ сæ æвдисын сывæллæтты рæвдауæндæтты, сæйраг архайæг сывæллæттæ кæм вæййынц, ахæм бæрæгбæттæ æмæ концертты. Спектакльты архайджытæ сты, адæймаджы бæрзæнд чи у, ахæм куклатæ. Кæй зæгъын æй хъæуы, Анжелæйæн йæхи хуыд. Æдæппæт Анжелæ ныффыста сывæллæттæн 12 аргъауы, сæвæрдта сæ сценæйыл æмæ семæ æрзылд Цæгат Кавказы æмæ Краснодары крайы горæттыл, фæстаг хатт ма Анжелæ йæ спектакльтимæ уыд Цхинвалы, æмæ хуссарирыстойнаг сабитæ стыр цымыдисæй базонгæ сты, раздæр кæй никуыма федтой, ахæм ног аргъæуттæ æмæ сæ архайджытимæ. Чи зоны, æмæ Анжелæйæн афтæ бирæ нæ бантыстаид, йæ фарсмæ иудадзыгдæр йе ‘мкъай куы нæ уаид æмæ йæ алы хъуыддаджы дæр ын стыр æххуыс куы нæ кæнид, уæд.

Адæймагæн йæ курдиат æрдзæй рахæсгæ куы вæййы, уæд уыцы курдиат иухуызы ахорæнтæй ахуырст нæ вæййы, фæлæ алыхуызы тæмæнтæ фæкалы. Хæрзæрæджы Анжелæйæн йæ зæрдæйы райгуырд ног фæнд, æмæ йæ царды мидæг хъуыддагæй ма сфидар кæна, уый курдиатджын адæймагæн йæ бон нæу. Ирон чындзæхсæвты уæвгæйæ йæм фæзынд ног хъуыды. Йæ аивадон цæстæнгасæй бафиппайдта, ирон чындзыл дыккаг бон цы уæлæдарæс скæнынц æмæ йæ адæмы размæ цы дзаумайы ракæнынц, уый бынтон аив кæй нæу. Ныхас цæуы, алы æфсинæн дæр зонгæ чи у æмæ, хæдзарон куыстытæ кæнгæйæ, йæхиуыл цы уæлæдарæс скæны, ууыл, ома, халатыл. «Чындзæхсæв цы хæдзары вæййы, уырдæм дыккаг бон дæр ма фæцæуынц адæм, æмæ ног чындзы хæдзарон уæлæдарæсы уыной, уый мæм аив нæ каст», — зæгъы Анжелæ. Уыйадыл хуыйын райдыдта, ирон чындзыл дыккаг бон скæнын кæй æмбæлы, ахæм диссаджы рæсугъд къабатæ æмæ сæ уадзын «Армандо Мосимо», зæгъгæ, йæхи ахæм сæрмагонд брендимæ. Æмæ кæд дзаумæттæ хуыйын Анжелæ 20 азы размæ райдыдта, уæддæр ацы ног хъуыддаг йæхи зæрдæмæ уæлдай хæстæгдæр у, стæй, рæсугъд дзаума йæ уæлæ скæна, уый фæдыл æм цы адæм цæуы, уыдоны зæрдæмæ дæр уæлдай тынгдæр цæуы. «Адæймагæн йæхи фæндонмæ гæсгæ къабайыл скæнæм ирон нывæфтыдтæ кæнæ йæ срæсугъд кæнæм æндæр аивадон гæнæнтæй», — дзуры Анжелæ. Бренд «Армандо Мосимо»-имæ ныв кæны æмæ хуыйы, канд ног чындзы къабатæ нæ, фæлæ алыхуызон бæрæгбонмæ дæр цы къабатæ скæнын æмбæлы, ахæмтæ. «Сылгоймаг къабайæ фидауы, æмæ уыцы къаба рæсугъд æмæ аив куы уа, уæд ма уымæй хуыздæр цы ис», — зæгъы Анжелæ.

Уыцы-иу рæстæг дизайнер дæр æмæ хуыйæг дæр, æрмдæсны адæймаг Анжелæ ныридæгæн дæр хъуыды кæны ног проекттыл. Цавæр уыдзысты, уый нырма нæ хъæр кæны, фæлæ уыдон дæр нывгæнæджы цæстæй акæсгæйæ — рæсугъд, аивадон цæстæй акæсгæйæ та курдиатджын кæй уыдзысты, ууыл, цæмæдæр гæсгæ, дызæрдыг нæ кæнæм.

 З.АГЕЕВА

ОСТАВЬТЕ ОТВЕТ

Please enter your comment!
Please enter your name here