Низӕй уӕ бахъахъхъӕндзысты бӕлвырд ӕмӕ ахсджиаг мадзӕлттӕ

0
142

 

Туджы бӕрзонд ӕлхъывдад (гипертония) у зӕрдӕ ӕмӕ дадзинты низтӕн сӕ сӕйрагдӕр расайӕг. Адӕймаджы ацы низӕй сдзӕбӕхгӕнӕн нӕй, ис ӕрмӕстдӕр туджы ӕлхъывдады бӕрӕггӕнӕнтӕ уӕлӕмӕ нӕ уадзын. Уый тыххӕй йӕм иудадзыгдӕр хъӕуы цӕст дарын. Фӕлӕ, кӕй зӕгъын ӕй хъӕуы, хуыздӕр ӕмӕ ӕнӕниздзинадӕн пайдадӕр уаид низ хӕстӕг не ‘руадзын.

Ӕнӕниздзинад хъахъхъӕныны дунеон организацийы эксперттӕ куыд зӕгъынц, афтӕмӕй, туджы ӕлхъывдады бӕрӕггӕнӕнтӕ иудадзыгдӕр 140/90 мм.рт.ст. куы уой ӕмӕ уымӕй бӕрзонддӕр кӕнын куы райдайой, уӕд ныхас цӕуы гипертонияйыл. Эксперттӕ амонынц, наукон- иртасӕн куыстыты фӕрцы бындур ӕвӕрд кӕмӕн ӕрцыд, низӕй бахъахъхъӕныны ахӕм мадзӕлттӕ дӕр, ӕмӕ сыл бӕстондӕр ӕрныхас кӕнӕм.

Низы ‘рдӕм здӕхт ныййарджытӕй рахӕсгӕ куы уа, уӕд ахӕм адӕймагмӕ гипертония фӕзынынӕй у дзӕвгар тӕссагдӕр, иннӕтимӕ абаргӕйӕ. Гипертония сӕ дыууӕмӕ дӕр куы уа, уӕд ахӕм ныййарджытӕн сӕ 50-75 процентӕн сӕ зӕнӕгмӕ дӕр ацы низ ӕнӕфӕзынгӕ нӕ уыдзӕн. Ныййарджытӕй иунӕг дӕр, гипертония цы у, уый кӕд нӕ базыдта, уӕд ахӕм мад ӕмӕ фыдӕн ӕрмӕст сӕ 4-20 проценӕн сӕ зӕнӕг бавзардзысты ацы низ.

Цӕххӕн йӕ бӕрцӕй комкоммӕ аразгӕ у туджы ӕлхъывдады уавӕр. Наукон бӕрӕггӕнӕнтӕ куыд равдыстой, афтӕмӕй цӕххӕн йӕ бӕрц суткӕмӕ 5 граммӕй фылдӕргӕнӕн нӕй.

Хӕринаджы хъуыддаг: адӕймагӕн йӕ фынгыл фылдӕр хъуамӕ уа дыргътӕ ӕмӕ халсартӕ, уӕд организмы фаг уыдзӕн пайдайаг буаргъӕдтӕ — калий, магний, витаминтӕ ӕмӕ антиоксиданттӕ. Уыдон фаг куы уой, уӕд туджы ӕлхъывдад дӕр уыдзӕн, куыд ӕмбӕлы, афтӕ. Ӕнӕниздзинад хъахъхъӕнынады дунеон организаци банымадта, дыргътӕ ӕмӕ халсартӕй суткӕмӕ цас бахӕрын хъӕуы, уыцы бӕрц, ӕмӕ рауад — 5 порцийы кӕнӕ та 400 граммы суткӕмӕ. Ныхас цы низыл цӕуы, уый профилактикӕйӕн пайда у, сой «омега-3» бирӕ кӕм ис, ахӕм кӕсаг хӕрын (суткӕмӕ ӕппынкъаддӕр 30-60 граммы), къаддӕр та — ӕнӕуи сой.

Адӕймаг цас карджындӕр уа, афтӕ йын тӕссагдӕр у, гипертония йӕм кӕй фӕзындзӕн, уымӕй: 50-60- аздзыдтӕн сӕ 15 проценты, 60-70-аздзыдтӕн сӕ 30 проценты ӕмӕ, 70 азӕй уӕлӕмӕ кӕуыл цӕуы, уыдонӕн сӕ 40 проценты «базонгӕ» вӕййынц гипертонияимӕ. Ныхас сылгоймӕгтӕ ӕмӕ нӕлгоймӕгтыл куы цӕуа, уӕд, 40 азы кӕуыл нӕма сӕххӕст, ахӕм нӕлгоймӕгты ‘хсӕн гипертонияйӕ рынчынтӕ вӕййынц дзӕвгар фылдӕр, ацы кары сылгоймӕгтимӕ абаргӕйӕ. Фӕлӕ уыцы карӕй куы рахизынц ӕмӕ ма сыл азтӕ куы рацӕуы, уӕд сылгоймӕгтӕй дӕр, нӕлгоймӕгтӕй дӕр гипертонияйӕ рынчынты нымӕц свӕййы ӕмхуызон.

Адӕймагӕн йӕ уӕз: наукон иртасӕнтӕ куыд равдыстой, афтӕмӕй уӕлдай уӕз у, гипертония кӕй фӕзыны, уымӕн йӕ аххосӕгтӕй иу. Алы 4,5 килограммы туджы ӕлхъывдад кӕнынц бӕрзонддӕр, уӕз къаддӕр куы кӕна, уӕд туджы ӕлхъывдады бӕрӕггӕнӕнтӕ дӕр кӕндзысты ныллӕгдӕр. Нард адӕймагӕн йӕ зӕрдӕ ӕмӕ дадзинты системӕйы куыст нывыл нал вӕййы. Уӕлдай уӕз расайы миокарды инфаркт, зӕрдӕйы ишемия, стенокардия, туджы бӕрзонд ӕлхъывдад, аритмия ӕмӕ ӕндӕр карз низтӕ.

Сӕкӕрнизӕй рынчынтӕм гипертония фӕзына, уымӕй сын у дыууӕ хатты тӕссагдӕр, сӕкӕрниз кӕмӕ нӕй, уыдонимӕ абаргӕйӕ.

Ӕнхъӕлцау сылгоймӕгтӕн дӕр у уӕлдай тӕссагдӕр, туджы ӕлхъывдад сӕм фӕбӕрзонддӕр уа, уымӕй, афтӕ — 50 азӕй уӕлӕмӕ кӕуыл цӕуы, ахӕм сылгоймӕгтӕн дӕр.

Тамако туджы ӕлхъывдадыл ӕвзӕрӕрдӕм кӕй ахады, уый дӕр сбӕлвырд наукон иртасӕнты фӕрцы. Уыдон куыд равдыстой, афтӕмӕй сӕрымагъзы инсультӕй ӕмӕ зӕрдӕйы низ ишемияйӕ 2-3 хатты тӕссагдӕр у тамакодымӕг адӕймӕгтӕн, дымгӕ чи нӕ кӕны, уыдонимӕ абаргӕйӕ. Статистикон бӕрӕггӕнӕнтӕ куыд амонынц, афтӕмӕй, йӕ цӕрджытӕ тамако ӕппындӕр кӕм нӕ дымынц, зӕгъӕм, Ног Зеланди ӕмӕ Австралийы цӕрджыты ‘хсӕн зӕрдӕ ӕмӕ дадзинты низтӕй рынчынты нымӕц у ӕппӕтӕй къаддӕр, иннӕ раззагдӕр бӕстӕтимӕ абаргӕйӕ.

 Физикон фӕлтӕрӕнтӕ: физикон ӕгъдауӕй адӕймаг цас цӕрдӕгдӕр уа, уыйбӕрц ын къаддӕр уыдзӕн тӕссаг гипертонияйӕ, стӕй канд уымӕй нӕ, фӕлӕ инфарктӕй, инсульт ӕмӕ сӕкӕрнизӕй, суанг онкологийӕ дӕр ма. Змӕлгӕ чи нӕ кӕны, уыдонӕн та гипертония фӕзынынӕй у 25 проценты тӕссагдӕр, змӕлгӕ чи кӕны, спорты чи архайы, уыдонимӕ абаргӕйӕ. Уыимӕ, ахуыргӕндтӕ куыд бафиппайдтой, афтӕмӕй куысты рӕстӕг адӕймагӕн йӕ туджы ӕлхъывдад кӕны бӕрзонддӕр, улӕфты рӕстӕг та — ныллӕгдӕр. Адӕймаг фылдӕр цӕмӕй змӕла, уый тыххӕй фитнесс-клуб кӕнӕ спортивон залмӕ цӕуын ӕнӕмӕнг хъуыддаг нӕу. Фаг уыдзӕн алы бон дӕр фистӕгӕй цӕуын — банымайгӕйӕ ӕппынкъаддӕр 2,5 санчъехы суткӕмӕ.

Психоэмоциалон ӕнкъарӕнтӕ: стресстӕ ӕмӕ уӕззау ӕнкъарӕнтӕ, интеллектуалон ӕгъдауӕй ӕгӕр бирӕ куыст расайынц туджы бӕрзонд ӕлхъывдад. Туджы бӕрзонд ӕлхъывдадӕй тӕссаг у, йӕ нервытӕ сабыр кӕмӕн не сты, ерыс кӕнын бирӕ чи уарзы, алцӕмӕй ӕгӕрӕгӕр чи кӕны, уыдонӕн дӕр. Уӕхи хъахъхъӕнут ӕмӕ ӕнӕниз ут.

ЦЕРЕКАТЫ Алан, Медицинон профилактикӕйы республикон центры хайады сӕргълӕууӕг, ЦАКЪОТЫ Маринӕ, центры дохтырметодист

ОСТАВЬТЕ ОТВЕТ

Please enter your comment!
Please enter your name here