Зындгонд тренеры ном ссардтой Хæзныдоны

0
55

Зындгонд уæрæсейаг тренер Анатолий РАХЛИН царди æмæ фæсивæдимæ куыста Ленинграды (ныр Санкт-Петербурджы). Схъомыл кодта бирæ хъомысджын дзюдоистты. Йæ ахуыргæнинæгтæй иу уыд Уæрæсейы Федерацийы абоны президент Владимир ПУТИН.

Анатолий Рахлиныл ацы бонты хъуамæ сæххæст уыдаид 80 азы. Хъыгагæн, æртæ азы размæ Уæрæсейы сгуыхт тренер Анатолий Соломоны фырт цардæй ахицæн.

Ныр йæ 80 азы бонмæ нæ зындгонд æмбæстæгтæ Боллоты Таймураз æмæ Тменаты Тамерланы фæндонмæ гæсгæ, Анатолий Рахлины номарынæн дзюдойæ арæзт æрцыд æппæтуæрæсеон турнир. Турнир цыди Боллоты Таймуразы райгуырæн хъæу Хæзныдоны, æмæ дзы архайдтой 200 æрыгон дзюдоисты (2005-2007 азты гуырд). Ерысты ирыстойнаг фæсивæ- дæй уæлдай архайдтой Кæсæг- Балхъары, Цæцæны Республикæйы, Стъараполы крайы æмæ Хуссар Ирыстоны минæвæрттæ.

Хæзныдонмæ алы рæттæй ссыдысты зындгонд уазджытæ: дзюдойæ Олимпаг хъæзтыты уæлахиздзаутæ Арсен Голстян æмæ Мамсур Исаев, дунейы чемпион, ныртæккæ Польшæйы цæрæг эстойнаг дзюдоист Индрик Петельсон, Олимпаг хъæзтыты дыууæ хатты призер Тменаты Тамерлан, Европæ æмæ дунейы æрыгæтты ‘хсæн чемпион Хъайтмазты Батрадз.

Ацы зындгонд уазджытæ Хæзныдонмæ æрбацыдысты Тменаты Тамерланы хуындæй æмæ, сæхæдæг куыд загътой, афтæмæй тынг разыйæ баззадысты æрыгæтты архайд æмæ, турнир куыд арæзт æрцыд, уымæй. Æрæфы районы бынæттон хицауад бацархайдтой уазджытæн æмбæлгæ «Æгасцуай» зæгъыны уавæртæ саразыныл. Турниры сæйраг разамонæг та уыд, Боллоты Таймураз. Уымæн йæхицæн кæд фадат нæ уыд йæ райгуырæн хъæуы уыцы бон сæмбæлынæн, уæддæр æппæт дæр скодта, турнир аразджыты къух фæрог кæнынæн.

Ерысты лæппутæй уæлдай архайдтой чызджытæ дæр. Кæд уыдон нымæцæй бирæ нæ уыдысты, уæддæр сæ хъазуатон архайдæй барухс кодтой спортуарзджыты зæрдæтæ.

36 кг онг уæзы чызджыты ерысты фыццаг бынат бацахста Бетрозты Миланæ, 48 кг онг уæзы уæлахиздзау ссис Дзæгъойты Дзерассæ. Батоты Зæринæ та фыццаг бынат райста 57 кг онг уæзы. Лæппутæ ерыс кодтой дыууадæс уæзы. Æппæты рогдæр уæзы (30 кг онг) 1-аг бынатмæ рацыд Будтуты Георги, 33 кг онг уæзы фæуæлахиз Стъараполы крайы минæвар Эмиль Раджабханов, Кæсæг-Балхъары республикæйы минæвар Багатар Акаев та фыццаг бынат бацахста 36 кг онг уæзы.

Иннæ уæзты фыццаг бынæттæм рацыдысты: 39 кг — Марк Мартыненко, 42 кг — Саулаты Сослан, 46 кг — Хæмыцаты Руслан, 50 кг — Махъоты Рустам, 55 кг — Сопойты Артем (иууылдæр РЦИ-А). 60 кг онг уæзы уæлахиздзау ссис Стъараполы крайаг дзюдоист Станислав Гаджиев, иннæ уæзты та фæуæлахиз сты ирыстойнæгтæ: Махъоты Анзор (66 кг), Хуыбаты Тамерлан (73 кг) æмæ Лохты Амиран (+73 кг). Уæлахиздзаутæ æмæ призон бынæттæ бацахсджытæ хорзæхджынгонд æрцыдысты кубоктæ, майдантæ, грамотæтæ, дипломтæ æмæ æхцайы лæвæрттæй.

Сæрмагонд лæвæрттæ ракодтой Кæсæг-Балхъары, Цæцæны Республикæйы, Стъараполы æмæ Хуссар Ирыстоны командæтæн.

БАСКАТЫ Уырызмæг

ОСТАВЬТЕ ОТВЕТ

Please enter your comment!
Please enter your name here