Ахуырады фарстатæ æмæ мадæлон æвзаг

0
69

Цæгат Ирыстоны Сæргълæууæг БИТАРТЫ Вячеславæн кусæг фембæлд уыд республикæйы Æхсæнадон палатæйы сæрдар Нинæ ЧИПЛАКОВАИМÆ. Уый тыххæй фехъусын кодта РЦИ-Аланийы Сæргълæууæджы пресс- службæ

Ныхасы рæстæг бæстон æркастæуыд Æхсæнадон палатæйы архайды фарстатæм. Сæрмагонд æргом здæхт æрцыд, Æхсæнадон палатæйы минæвæрттæ республикæйы социалон- экономикон рæзтыл куыд архайынц, уымæ.

Нинæ Чиплаковæ куыд радзырдта, афтæмæй палатæйы уæнгтæ зæрдиагæй архайынц закъонæвæрынадон куысты дæр. Йæ ныхасмæ гæсгæ, республикæйы национ-культурон æхсæнадты минæвæртты сагъæсы æфтауы, ахуырады тыххæй федералон закъонмæ ивддзинæдтæ бахæссыныл быцæу ныхас кæй рапарахат, уый. Зындгонд куыд у, афтæмæй закъонмæ ивддзинæдтæ бахæссыны хъæппæрис чи равдыста, уыцы федералон депутатты хъуыдымæ гæсгæ, бæстæйы цæрæг адæмты æвзæгтæ ахуыр кæныны хъуыддаг хъуамæ лыггонд цæуа барвæндонæй, ома, цæмæй сæ ахуыр кæной, æрмæстдæр кæй фæнды, уыцы адæм.

— Ахæм хъæппæрис тасдзинад æвзæрын кæны, республикæты цæрæг адæм национ æвзæгтæ ахуыр кæныныл бынтон дæр сæ къух кæй сисдзысты, уымæй. Ацы фарстайы фæдыл Цæгат Ирыстоны разамындмæ цавæр хъуыды ис? — йæ ныхасы фæбæлвырд кодта Нинæ Чиплакова.

Битарты Вячеслав куыд загъта, афтæмæй республикæйы Конституцимæ гæсгæ, Цæгат Ирыстоны паддзахадон æвзæгтыл нымад сты ирон æмæ уырыссаг.

— Мæ хъуыдымæ гæсгæ, ирон æвзаг ахуыр кæнынæн хъуамæ уа закъонæвæрынадон бындур. Уыимæ, алчидæр хъуамæ æмбара, мадæлон æвзаг ахуыр кæнын нæ хæс кæй у, уый, — загъта Битарты Вячеслав. — Абоны скъоладзауты ныййарджытæ хъуамæ сæ зæрдыл дарой, нæ национ культурæйы фидæныл бæрнон кæй сты, уый. Мадæлон æвзаг ахуыр кæныны хъуыддаджы махæй цы аразгæ уа, уый дæр афойнадыл кæндзыстæм.

Республикæйы Сæргълæууæг Æхсæнадон палатæйы уæнгтæм фæсидт, цæмæй сæ фæндæттæ æрбадæттой мадæлон æвзаг ахуыр кæныны хъуыддаг фæхуыздæр кæныны фæдыл.

Нæ уацхæссæг

ОСТАВЬТЕ ОТВЕТ

Please enter your comment!
Please enter your name here