Иры мыггæгты Ныхас

0
56

Ирыстоны мин мыггагæй фылдæр ис. Уыдонæй бирæтæн ис «Мыггаджы Ныхас». Уым хистæртæ фæхæссынц уынаффæттæ, фæдзурынц сæ абон æмæ сомбоныл, фæкæнынц кæстæртимæ хъомыладон куыст, ирондзинад æмæ сæ фыдæлты уидæгтæм æввахсдæр кæнгæйæ. Цы ма уа хуыздæр мадзал фæлтæрты ‘хсæн бастдзинæдтæн!

«Иры Стыр Ныхас»-ы бындурыл тынг зæрдиаг æмæ хъæппæрисджынæй кусынц, абоны онг йæ мыггаджы Ныхас кæмæн ис, уыцы арфæйаг хистæртæ, æвзæрст лæгтæ. Мыггæгты комитеты сæргълæууæг Æгкацаты Юри архайы, цæмæй алы мыггаджы дæр уа Ныхас, мыггаджы куырыхон æмæ æгъдауджын хистæртæ кусой сæ кæстæртимæ. Ныр дæр «Иры Стыр Ныхас»-ы уыд мыггæгты минæвæртты уæрæх æмбырд. Æрдзырдтой сæ дарддæры иумæйаг куыстыл, мыггæгты æхсæн цы ахсджиаг фарстатæ ис, уыдоныл.

Рагæй-нырмæ æхсæнады царды мыггагыл стыр хæс æвæрд уыд. Мыггаджы куырыхон хистæртæ кæстæртимæ цы хъомыладон куыст бакæной, уый иунæг скъола æмæ институт дæр нæ бакæндзæн. Дзæгъæлы-иу нæ бафарстой нæ фыдæлтæ адæймаджы фыццаг йæ мыггагæй, уый фæстæ та йæ номæй. Уымæ гæсгæ абон дæр, хъомыладон куыст кæнгæйæ, фыццаджыдæр, æнцой кæнын хъæуы мыггæгты Ныхасты хистæрты фæлтæрддзинад, фарн æмæ зонындзинæдтыл.

Съезды уынаффæтæм гæсгæ «Иры Стыр Ныхас»-ы Координацион совет сфидар кодта Иры мыггæгты минæвæрттæй Ныхас саразын. Йæ уæнгтæ уыдзысты алы мыггагæй дæр иу дзырддзæугæ æвзæрст лæг. Уыцы хъуыддагæн сын Кучиты Руслан радта дæс боны. Цы мыггаджы нæй Ныхас, æвзæрст лæг, уыдонæн бар нæй «Иры Стыр Ныхас»-ы тæрхæттæ æмæ уынаффæтæ хæссынæн. Кучиты Руслан куыд загъта, афтæмæй «Стыр Ныхас» дарддæр дæр кусдзæн, йæ мыггаджы ‘хсæн æгъдауджынæй йæхи чи равдыста, уыдонимæ. Мыггаджы ‘хсæн æгъдау сæвæрын сæ бон цы хистæртæн нæу, уыдон æнæхъæн Ирæн куыд хъуамæ уынаффæтæ кæной.

Алы мыггаг дæр хъуамæ равзара иу дзырддзæугæ æгъдауылхæст лæг, æмæ уыдонæй равзæрдзæн «Иры Стыр Ныхас»-ы тæрхон. Ууыл дзырдæуыд раздæр дæр дзыллон хабархæссæг фæрæзты, адæмимæ фембæлдтыты. Æмæ сæ хъуыды цæрджыты зæрдæмæ фæцыд.

Цавæр тæрхоныл цæуы ныхас? Цæуыл æнцой кæндзæн? Тæрхоны лæгты размæ лæудзæн хæс, ирон æгъдауы сæрты ахизгæйæ, стыр æнæгъдаудзинад чи равдиса, адæмæн йæ æбуалгъ митæй знаггад чи хæсса, уыдонимæ. Йæ иннæ хæс уыдзæн адæмы ‘хсæн хæлардзинадыл кусын, фидауын сæ кæнын, цы хъаст сæм бахæссой, уый равзарын. Бæлвырд куыд у, афтæмæй адæм ныридæгæн дæр арæх æрбацæуынц æххуысагур, рæстдзинадагур «Стыр Ныхас»-мæ. Бинонты ‘хсæн арæх цы хъаугъа рауайы, уый аххосæй бирæтæ ахицæн вæййынц, фылдæр хатт сæ фарсмæ фæлтæрдджын, зондамонæг хистæртæ сæ цæстуарзон ныхас, сæ арф хъуыдытимæ кæй нæ балæууынц, уый аххосæй дæр. Тæрхоны лæгтæ архайдзысты дзыхы ныхасæй, зæрдæйы ахастæй, цæстуарзон уынаффæтæй архайыныл. Фæлæ, уыдоны сæрты дæр чи ахиза, уыдонæн та, цы мыггæгтæй сты, уыдон рахæсдзысты хъодыйы тæрхон — нал сын салам дæтдзысты, нал сæ сæ хъыг, сæ цинмæ хондзысты. Æмæ ма адæймагдзинады æууæлтæ кæмæ баззад, уымæн уымæй стырдæр æфхæрд цы хъуамæ уа. Æмбырды иннæ фарста уыд, Мæздæджы районы «Стыр Ныхас»-ы хайады сæрдар Гуццаты Фридоны хъуыды æмæ хъæппæрисæй цы орден бацæттæ «Адæмы хорзæх», ууыл бæстондæр æрныхас кæнын, лæмбынæгдæр ыл ахъуыды кæнын. Лæвæрд цæудзæн «Стыр Ныхас»-ы номæй, афæдзы кæрон ирон адæмæн йæ хорз хъуыддæгтæй стыр лæггæдты чи бацыд, уыдонæн.

Æмбырды раныхас кодтой Кучиты Руслан, Æгкацаты Юри, Багаты Васили, Гæлæбуты Мухтарбег, Гокъоты Витали, Саулаты Валери, Уырымты Петя, Касаты Георги, Цорæты Мухарбег, Кцойты Гермæн, Гуццаты Фридон, Моргуаты Эдислав æмæ иннæтæ.

Бауынаффæ кодтой, иннæ æмбырды цы фарстатыл æрныхас кæндзысты, ууыл. Уыдонæй иу у иумæйагæй ирон бæрæгбæтты къæлиндарыл бакусын æмæ йæ сфидар кæнын. Дарддæр дæр Мыггæгты комитеты размæ лæууы стыр æмæ вазыгджын хъуыддæгтæ. Мыггæгтæй Ныхас саразын кæмæн нæма бантыст, уыдонæн дæр ахсджиаг хъуыддагыл нымад æрцæуид, ацы арфæйаг хистæрты бафæзмын, Ирыстоны Мыггæгты Ны- хасты фæлтæрддзинадыл æнцой кæнгæйæ. Мыггаг мæсыг у!

ХЕТÆГКАТЫ Оксанæ

ОСТАВЬТЕ ОТВЕТ

Please enter your comment!
Please enter your name here