Аивад — адæмты иугæнæг

0
118

 

Æрæджы Дзæуджыхъæуы Металлургты Культурæйы галуаны уыд Цæгат Кавказы адæмыхæттыты инструменталон музыкæйы фестиваль «Играй, фандыр». Уый арæзт цæуы ныр æхсæзæм хатт. Ацы сфæлдыстадон проекты автортæ иудадзыг вæййынц РЦИ-Аланийы адæмон артисттæ, зындгонд фæндырдзæгъдджытæ ДЗУЦЦАТЫ Сослан æмæ ХАДЫХЪАТЫ Аллæ.

Куыд алы хатт, афтæ та ныр дæр Ирыстонмæ, сæ фарны аивадон хуынтимæ æрбамбырд сты кардзыд, астæуккаг кары æмæ æрыгон фæндырдзæгъдджытæ, стæй æндæр адæмон музыкалон инструменттыл сæ курдиат æмæ арæхстдзинад æвдисджытæ Кæсæг-Балхъарæй, Дагестанæй, Цæцæнæй, Мæхъæлæй, Хъæрæсе-Черкестæй, Цæгат æмæ Хуссар Ирыстонæй, Абхаз æмæ Сомихæй.

Азæй-азмæ фестивалы архайджыты нымæц кæй рæзы, ууыл дзурæг у, ацы хатт дзы кæй уыд Иорданийы цæрæг кавказаг адæмы минæвар Рами Дорокко. Уымæй уæлдай ма фестивалы сæхи фыст æмæ адæмон музыкалон уацмыстæ ацагътой Хасан Сохов, Рамзан Паскаев, Магомед Дзыбов, Артур Гонгапшев, Микаил Костоев, Евгений Воложанин, Золойты Беллæ, Саппиаты Зæлинæ, Кокойты Аллæ, Хамидби Гатажеков, Шамиль Исаев, Карен Григорян, Тедеты Азæмæт, Абойты Хетæг æмæ иннæтæ.

Фестивалы архайджыты аивад фенынмæ æрбацыд тынг бирæ адæм. Галуаны залы къухбакæнæн нæ уыд аивадуарзджытæй, куыд хистæртæй, афтæ кæстæртæй дæр.

Фестиваль гом кæнгæйæ йæ уазджытæн æмæ архайджытæн зæрдиаг арфæтæ ракодтой РЦИ-Алинийы культурæйы министры хæдивæг Дудайты Чермен æмæ РЦИ-Аланийы адæмты æхсæн ахастдзинæдты министры хæдивæг Бæгъиаты Алан, РЦИ-Аланийы Парламенты депутат Моурауты Алан. Уыдон се ‘ппæт дæр сæ раныхæсты бузныг загътой фестиваль саразджытæн. Фæнысан кодтой, ахæм аивадон бæрæгбæттæ кæй сты адæмыхæттыты кæрæдзимæ æнгомгæнæг. Сæ фæрцы сфæлдыстадон кусджыты ‘хсæн дæр иумæйаг фидар аивадон æмгуыстдзинад кæй фæзыны. Æрмæст уыцы хъуыддаг дæр бирæ цæуылдæрты дзурæг у.

Фæндырдзагъдæй уæлдай ма фестивалы сæ курдиат ирон кафты равдыстой ЦИПУ-йы адæмон кафты сгуыхт ансамбль «Ирыстон» (равдыстой хореографион композици «Авд цухъхъайы») æмæ фольклоронэтнографион ансамбль «Сатана»-йы кафджытæ.

Фестиваль «Играй, фандыр»-ы æппæт архайджытæн саккаг колтой дипломтæ æмæ зæрдылдарæн лæвæрттæ. Ацы аивадон бæрæгбоны иудадзыгдæр чи фæархайы, æмæ дзы йæ курдиат уæлдай ирддæрæй чи равдисы, уыцы архайджытæй иу къорд музыкантæн лæвæрд æрцыд РЦИ-Аланийы Парламенты, Культурæйы æмæ Нациты хъуыддæгты министрадты Кады грамотæтæ.

ГАСАНТЫ Валерии

ОСТАВЬТЕ ОТВЕТ

Please enter your comment!
Please enter your name here