Сбæрæг сты «Сæрак пурти»-йы Кубок рамбулджытæ

0
115

Зæххыл тыхджындæр футболон командæтæ Уæрæсейы иуæндæс горæты дунейы чемпион суæвыныл тохы куы бацыдысты, раст уыцы бонты Ирыстоны æвзонг футболисттæ та ерыс кодтой нæ республикæйы æрыгон футболистты сæйраг турнир «Сæрак пурти»-йы Кубок рамбулыныл. 23 июны футболон скъола «Юность»-ы стадионы сбæрæг сты фыццаг, дыккаг æмæ æртыккаг бынæттæ бацахсæг командæтæ æртæ кары футболистты ‘хсæн.

10-11-аздзыд футболистты ерысты кæронбæттæны 1-аг бынат бацахсыныл тох кодтой Беслæн æмæ Алагиры командæтæ. Сæ хъазуатон ерысы хъазты кæронмæ иуæн дæр нæ бантыст пурти кулдуары бакъуырын. Уæлахиздзау сбæрæг 11-метрон цæфты фæрцы. Ацы фæлварæны алагирæгтæ разындысты рæстдзæвиндæр æмæ рамбылдтой 4:3 хыгъдæй. Беслæны командæ «Пищевик» — бацахста 2-аг бынат. 3-аг бынатыл ерыс кодтой Цыкола æмæ Октябрыхъæуы командæтæ. Сæ фембæлд ахицæн 2:1 хыгъдæй октябрыхъæуккæгты пайдайæн æмæ бацахстой 3-аг бынат.

12-13-аздзыд футболистты ерысы дæр 1-аг бынатыл ерыс кодтой Беслæн æмæ Алагиры æрыгон футболисттæ. Ам дæр та командæтæ разындысты æмдых, æрмæст сын ацы хатт бантыст кæрæдзи кулдуæртты фæйнæ дыууæ пуртийы бакъуырын (2:2) æмæ та ам дæр уæлахиздзау бæрæггонд æрцыд 11-метрон цæфты руаджы. Беслæйнæгтæн бантыст рамбулын 4:2 хыгъдæй æмæ рамбылдтой «Сæрак пурти»-йы Кубок. Алагиры командæ бацахста 2-аг бынат. 3-аг бынатыл ацы кары футболистты ‘хсæн ерыс кодтой Цыкола æмæ Октябрыхъæуы командæтæ æмæ сæ фембæлд ахицæн октябрыхъæуккæгты пайдайæн 2:0 хыгъдæй.

14-15-аздзыд футболистты командæты ерысты кæронбæттæны «Сæрак пурти»-йы Кубок рамбулыныл ерысы бацыдысты Дигора æмæ Октябрыхъæуы футболисттæ. Фембæлд рауад тынг цымыдисаг æмæ ахицæн «Дигора»-йы пайдайæн 3:1 хыгъдæй.

Æртыккаг бынатыл ерыс дæр къаддæр хъазуатон нæ рауад Цыколайы «Æрæф æмæ Беслæны «Пищевик»-ы ‘хсæн. Беслæйнæгтæ фæуæлахиз сты 3:2 хыгъдæй æмæ бацахстой 3-аг бынат.

Кубоктæ, дипломтæ æмæ майдантæй уæлдай ма алы кары дæр сæрмагонд призтæ райстой хуыздæр хъазджытæ.

Кæстæр кары хуыздæр дуаргæсыл нымад æрцыд Бæлоты Алик — (Цыкола), «Хуыздæр хъахъхъæнæг» — Дзгойты Константин (Беслæн), «Хуыздæр æрдæгхъахъхъæнæг» — Наниты Ренат (Октябрыхъæу), «Хуыздæр размæбырсæг» — Хъантеты Арсен (Алагир, «Барс»), «Хуыздæр хъазæг» — Реуазты Арсен (Алагир, Барс»). Астæуккаг кары сæрмагонд призтæ райстой: «Хуыздæр дуаргæс» — Темырты Радик (Цыкола, «Æрæф»), » Хуыздæр хъахъхъæнæг» — Муциаты Хъазыбег (Октябрыхъæу), «Хуыздæр æрдæгхъахъхъæнæг» — Реуазты Ацæмæз (Алагир), «Хуыздæр размæбырсæг» — Ногъайты Хетæг (Беслæн), «Хуыздæр хъазæг» — Кодзырты Аслан (Беслæн), Хистæр кары «Хуыздæр дуаргæс»-ыл нымад æрцыд Олисаты Дзамболат (Дигора), «Хуыздæр хъахъхъæнæг» — Четойты Георги («Æрæф»), «Хуыздæр æрдæгхъахъхъæнæг»— Къуымæллæггаты Азæмæт (Беслæн, «Пищевик»), «Хуыздæр размæбырсæг» — Гор Оганесян (Октябрыхъæу «Алани»), «Хуыздæр хъазæг» — Магкаты Зураб (Дигора). Ерысты сæйраг тæрхонгæнæг Беджызаты Эдуард зæгъы: «Мах разыйæ баззадыстæм нæ æвзонг футболистты хъазтæй. Нæхи цæстæй федтам, нæ республикæйы курдиатджын футболисттæ къаддæр кæй нæ кæнынц, уый. Хъыгагæн, ерыстæм не ссыдысты Мæздæджы районы командæтæ. Куыд нын бамбарын кодтой, афтæмæй сæ аххосаг уыди, æхцайы фæрæзтæ кæй не ссардтой, уый. Ныр нæ фыццаг бынæттæ бацахсæг командæтæ хъуамæ сæхи бацæттæ кæной Уæрæсейы кæронбæттæны ерыстæм. Нæ зæрдæ дарæм, нæ лæппутæ уым сæхи сæрæнæй кæй равдисдзысты, ууыл».

БАСКАТЫ Уырызмæг

ОСТАВЬТЕ ОТВЕТ

Please enter your comment!
Please enter your name here