Уыцы сыгъзæрин бонтæ

0
174

 

Бирæ ивддзинæдтæ æрцæуы царды. Азтæ дугъон бæхау уайынц, нæй сын бауромæн кæнæ раздахæн. Фæлæ дын иугæр райдианы уыдис, абоны онг кæй нæ рох кæныс, ахæм æхсызгон цаутæ, уæд уый амонд у.

Хистæртæй алчидæр хорз хъуыды кæны, фæскомцæдисон змæлдæн цавæр стыр тых уыд, уый. Советон рæстæджы адæмæн уыд царды æмæ фæсивæды хъомылады скъола.

«Æгас цæуæд Ленинон фæскомцæдис — Коммунистон партийы тохы æххуысгæнæг æмæ зæрдæдаргæ фæстауæрц, коммунизмы æрыгон аразджыты раззагдæр къорд!» Ахæм сидт разæнгард кодта фæллойадон æнтыстдзинæдтæм.

— Иугæр нæ ном фæскомцæдисон у, уæд æй хъуамæ скадджын кæнæм арфæйаг хъуыддæгтæй, — ахæм стыр нысанимæ цыдыстæм куыстмæ, — æхсызгонæй мысы æрыдойнаг Туаты Ростислав. — Бирæ фæсивæд куыста Ленины номыл колхозы. Быдырон куыстыты, фосдарæн фермæты, алы ран дæр æрыгæттæ уыдысты разæй, фæзминаг, афтæмæй уæзгæ хай хастам нæ районы хъæууон хæдзарады рæзтмæ. Колхозы сæрдар Баскаты Станислав дæсны разамонæг, алы хъуыддагмæ лæмбынæг каст. Стыр кад ын уыд йе ‘мкусджыты ‘хсæн. Разыйæ-иу загъта: «Акæсут-ма нæ фæсивæдмæ, куыд фæллойуарзаг, хæдæфсарм, æнæзивæг æмæ хъæппæрисджын сты, уымæ!»

Туаты Ростиславы йæ мысинæгтæ ахастой раздæры азтæм. Ногдзауы сырх галстук сæрыстырæй дардта цалдæр азы. Фæстæдæр æй, куыд Æрыдоны фыццæгæм скъолайы хуыздæр ахуырдзаутæй иуы, райстой фæскомцæдисы рæнхъытæм, равзæрстой йæ къласы къорды раздзогæй, архайдта скъолайы æхсæнадон царды. Ирон лæджы кад бæрзонд хаста æфсады службæйы рæстæг Астраханы облæсты.

Ирыстонæй дард ран ноджы тынгдæр банкъардта Райгуырæн бæстæмæ уарзондзинад, æмгардзинад. Куы сыздæхтис æфсадæй, уæд æрыгон, хъаруджын лæппу кусын райдыдта районы раззагдæр хæдзарады шофырæй. Фæстæдæр та йæ раивтой холлæгтæ цæттæгæнæн цехы хицауæй.

— Цавæрдæр æнгомдзинад уыд фæсивæды ‘хсæн, ерысы-иу бацыдысты звенотæ, иууылдæр хæдзардзинæй архайдтам колхозы исбонад фылдæр кæныныл. Нæхæдæг куыд рæзыдыстæм, афтæ рæзыд фæллойадон æнтыстдзинад дæр. Стыр кад уыд нæ куыстæн, æмæ нæ уый разæнгард кодта, — зæгъы Ростислав. — Уæлдай хъазуатонæй-иу фæсивæд архайдтой фæскомцæдисон зиуты, куыстам арæзтадон объектты, æфснайдтам тыллæг, йæ хæслæвæрдтæ уæлдайджынæй чи не’ххæст кодта, ахæмтæ не ‘хсæн нæ уыд. Кусгæ рæстæг-иу райсомы фондз сахатæй райдыдта, уыцы афон-иу, хурыскастимæ, колхозы быдырты цард цæджджинагау фыхтис. Ехх, бæргæ ма уыцы сыгъзæрин бонтæн раздахæн куы уаид…

Туайы-фыртæн йæ бирæ азты æнæзæрдæхудт фæллойы тыххæй цы бирæ кады нысантæ радтой, уыдонæй æппæты арæхдæр йæ къухмæ райсы социалистон фæллойы уæлахиздзауы риуылдаргæ нысан.

Фæскомцæдисон, æцæг коммунист Туаты Ростиславы фидарæй уырны, XXI æнусы цæрæг æрыгон фæлтæр æнæзæрдæхудтæй кæй кусдзысты Фыдыбæстæйы, нæ уарзон Ирыстоны домбайдзинад фидардæр кæныныл, уый.

ДЗУГКОЙТЫ Иринæ

ОСТАВЬТЕ ОТВЕТ

Please enter your comment!
Please enter your name here