«СПАРТАК» БЫНДУРОНÆЙ ЦАЛЦÆГГОНД ÆРЦÆУДЗÆН

0
118

 

 

Нæ республикæйы Хицауады сæрдар Тускъаты Таймураз стадион «Спартак» сцалцæг кæныны фæдыл цы кусæг фембæлд скодта, уым архайдтой нæ республикæйы арæзтад æмæ архитектурæйы министр Икъаты Русланбег, РЦИ-Аланийы спорт æмæ физкультурæйы министры хæстæ рæстæгмæ æххæстгæнæг Бæройты Хасан, футболон клуб «Спартак (Владикавказ)»-ы сæйраг тренер Гæззаты Юри.

Æмбырды куыд фæнысан кодтой, афтæмæй стадион сцалцæг кæнын у ахсджиаг фарста. Фыццаджыдæр уымæн, æмæ йæ фæлгæты хъуамæ хъомыл кæной фидæны хъуыстгонд футболисттæ.

– Цæмæй нæ республикæйы  футбол чи уарзы, уыцы сывæллæттæ спорты куыд æмбæлы, афтæ рæзой, уый тыххæй сын хъуамæ скæнæм æппæт уавæртæ дæр. Бацæттæ сын кæнæм материалон-техникон бындур. Ирыстоны хъомылгонд футболисттæ фидæны хъуамæ хъазой куыд уæрæсейаг, афтæ фæсарæйнаг клубты дæр, – загъта Тускъаты Таймураз.
Æмбырды Икъаты Русланбег куыд фехъусын кодта, афтæмæй стадионы 1962 азы цы конструкци сарæзтой, уый абон ис тынг тæссаг уавæры. Ноджы ма фыццæгты, цалцæггæнæн куыстыты рæстæг, хъус æрдарын хъæудзæн хъазæн фæзмæ, кæцы у иууылдæр ивинаг.  Ацы æмæ ма æндæр цалцæггæнæн куыстыты иумæйаг фæзуат у 11,5 гектармæ æввахс.

Цалцæггæнæн куыстыты проект скæнынæн бахъæудзæн афæдзмæ æввахс. Уыимæ Гæззайы-фырт бахаста курдиат, цæмæй ацы куыстыты фæлгæты цæст æрдарой тренировкæтæкæнæн чысыл фæзуаттæм æмæ сæ сифтонг кæной хъæугæ дзаумæттæй.

Æмбырды кæронбæттæны, цалцæггæнæн куыстытæм бар цы ведомствотæ дардзысты, уыдоны разамонджытæн хæсгонд æрцыд, цæмæй сæ куыст кæной иумæ æмæ бацæттæ кæной проекты пълан. Хъуамæ сæ алы къахдзæф дæр уа бæрæг.  Уыимæ куыстытæ æххæст кæныны уавæримæ хъуамæ зонгæ кæной æхсæнады дæр.
Уæ зæрдыл уын æрлæууын кæндзыстæм, УФ-йы Хицауады сæрдар Дмитрий МЕДВЕДЕВÆН 9 июны нæ республикæйы разамонæг БИТАРТЫ Вячеславимæ цы кусæг фембæлд уыд, уым ын бафæдзæхста цæмæй стадион «Спартак»  биноныгæй цалцæггонд æрцæуа.

Кæд куыстытæм федералон центр йæ хъус æрдара, æмæ сæ фарсмæ балæууа, уæд куыстытæ фæуыдзысты футболон клуб «Спартак»-ы 100 азы бонмæ, ома 2021 азмæ.

 

ОСТАВЬТЕ ОТВЕТ

Please enter your comment!
Please enter your name here