Базонгæ сты ног Æххæстбарджын минæваримæ

0
129

 

Цæгат Кавказы федералон зылды республикæты разамонджыты, дины, зылды барадхъахъхъæнæг структурæты, минæварады кусджыты базонгæ кодтой Уæрæсейы Федерацийы Президенты ног Æххæстбарджын минæвар Цæгат Кавказы федералон зылды Александр МАТОВНИКОВИМÆ. Æмбырд уыдис горæт Пятигорскы, уым архайдта нæ республикæйы Сæргълæууæг БИТАРТЫ Вячеслав дæр. Ног Æххæстбарджын минæваримæ æмбырды архайджыты базонгæ кодта Олег БЕЛАВЕНЦЕВ, уый ацы бынаты бакуыста дыууæ азы.

Олег Белавенцев радзырдта Александр Матовниковы цардвæндаджы тыххæй, уый у хæстон афицер, ис æм стыр коллективтæн разамынд дæттыны фæлтæрддзинад, йæ службæйы тыххæй йын лæвæрд æрцыд Уæрæсейы Федерацийы Хъæбатыры ном, ордентæ æмæ майдантæ. Æмбырды архайджытæн æмгуыстады, æппæт хъуыддæгтæм паддзахадон цæстæй кæй кастысты, уый тыххæй Олег Белавенцев арфæ ракодта, загъта, фæстаг азты регион æдасдæр кæй ссис, экономикæйы кæцыдæр къабæзты йæ бæрæггæнæнтæ зынгæ кæй фæхуыздæр сты, инвестицион проекттæ царды æххæст кæнын кæй райдыдтой, уый. Ныхасгæнæг куыд бафиппайдта, афтæмæй зæрдæ райы ног куыстуæттæ, ахуырады, культурæйы, æнæниздзинад хъахъхъæнынады цы ивддзинæдтæ цæуы, уыдæттæй. Хæстæгдæр фидæнмæ зылды размæ æвæрд цæуынц ног нысантæ æмæ хæстæ, уыдоны фæрцы царды хæрзхъæддзинад хъуамæ фæхуыздæр уа. Олег Белавенцев куыд загъта, афтæмæй йæ зæрдæ дары, æппæт уыцы хъуыддæгтæ конд кæй æрцæудзысты, ууыл.

Цæгат Кавказы федералон зылды ног Æххæстбарджын минæвар Александр Матовников раныхас кодта æмбырды, куыд загъта, афтæмæй йын ацы регион, субъектты разамонджытæ сты зонгæ, уымæ гæсгæ æнтыстджынæй архайдзысты, Уæрæсейы Президент цы ахсджиаг нысантæ сæвæрдта, уыдоныл. «Мæ размæ ам чи куыста, уыдон цы фæндагыл цыдысты, сæ куыст куыд арæзтой, уымæй иуварс нæ ахиздзынæн, архайдзынæн, цæмæй уавæр хуыздæр кæна», — загъта Æххæстбарджын минæвар. Куыд фехъусын кодта, афтæмæй июлы кусæг балцытимæ ацæудзæн республикæтæм æмæ крайтæм, фембæлдзæн сæ разамонджытимæ, хицаудзинады минæвæрттимæ æмæ цæрджытимæ.

 

РЦИ-Аланийы Сæргълæууæджы æмæ РЦИ-Аланийы Хицауады пресс-службæ

ОСТАВЬТЕ ОТВЕТ

Please enter your comment!
Please enter your name here