Цæгатирыстойнаг Парламент йæ уалдзыгон сессийæн хатдзæгтæ скодта

0
191
SONY DSC

 

Республикæ Цæгат Ирыстон-Аланийы Парламенты уалдзыгон сесси йæ куыст кæй ахицæн кодта, уый фæдыл РЦИАланийы Парламенты Сæрдар Алексей МАЧНЕВÆН уыд пресс-конференци республикæйы дзыллон хабархæссæг фæрæзты минæвæрттимæ.

Парламенты спикер хатдзæгтæ скодта нæ республикæйы закъонæвæрынадон оргæнæн йæ афæдзы æмбисы куыстæн. Парламенты æппæт комитетты куыст дæр Алексей Мачнев банымадта хорзыл. Пъланмæ гæсгæ депутаттæ цы фарстатæм хъуамæ æркастаиккой, се ‘ппæт дæр æрцыдысты æвзæрст, сæ фарс-иу дзы кæмæн рахæцыдысты, уыдон æрвыст цыдысты закъонæвæрынадон федералон оргæнмæ. Куыд бафиппайдта, афтæмæй закъонæвæрынадон хъæппæристæн æмæ ивддзинæдтæн сæ фылдæр баст уыдысты социалон фарстатимæ.

Фæлæ журналисттимæ фембæлд Алексей Мачнев райдыдта, æнæскойгæнгæ кæмæн нæй, нæ бæстæйы ацы бонты цæуæг уыцы стыр спортивон æмæ уыимæ политикон цауæй. «Арфæ кæнын нæ футболисттæн, диссаджы хъазт нын кæй фенын кодтой, уый фæдыл, æмæ дæн стыр сæрыстыр, ахæм æнтыстджын командæ саразын кæй бафтыд не ‘мзæххоны къухы. Футбол Ирыстоны алкæддæр уарзтой. Æмæ Уæрæсе дæсгай азты дæргъы æнхъæлмæ кæмæ каст, уыцы футболон уæлахиз уал къухы кæй бафтыд, уый æрыгон футболисттæн у стыр разæнгардгæнæг тых, цæмæй ирыстойнаг футбол ноджы тынгдæр райрæза, æмæ ноджы фылдæр сывæллæттæ æмæ æрыгæттæ архайын райдайой спорты ацы хуызы», — загъта Алексей Мачнев.

Дарддæр спикер куыд дзырдта, афтæмæй, пъланмæ гæсгæ, уалдзыгон сессийы рæстæг цал æмбырды хъуамæ сарæзтаиккой, уымæй сарæзтой дыууæ æмбырды фылдæр, уымæн æмæ афæдзы æмбисы дæргъы ивддзинæдтæ-иу хæссын бахъуыд, рагацау фидаргонд чи æрцæуы, уыцы бюджетмæ.

Алексей Мачневы ныхасмæ гæсгæ, закъонæвæрынадон хъæппæристæ æмæ уæлæфтуантæ аххæссыдысты царды æппæт къабæзтыл дæр — æнæниздзинад хъахъхъæнынадыл, ахуырадыл, цæрæнуæтты-коммуналон хæдзарадыл, культурæйыл, иудзырдæй, æппæт социалон къабазыл дæр. Се ‘хсæнæй ахсджиагдæрыл банымадта, цæрæнуат балхæныны тыххæй ипотекæйы хуызы адæм цы кредит райсынц, уый фидынимæ баст закъонæвæрынадмæ ивддзинæдтæ хаст кæй æрцыд, уый. Нырæй фæстæмæ, цæрæнуат балхæныны тыххæй æрыгон бинонтæй ипотекæ чи иса, уыдонæн кредиты процент фидынæй уыдзæн æххуыс республикон бюджетæй.

Иннæ ахсджиаг хъуыддагыл Алексей Мачнев банымадта, Уæрæсейы Федерацийы иннæ субъектты парламенттимæ бастдзинæдтæ кæй фæфидардæр сты. Уый фæдыл нæ Парламенты минæвæрттæ æрæджы уыдысты Хъырымы æмæ æмгуыстаты тыххæй бадзырдтæ бафыстой Хъырымы æмæ горæт Севастополы закъонæвæрынадон оргæнтимæ. Уымæй уæлдай бабæрæг кодтой, Севастополы ныгæд чи ‘рцыд, нæ уыцы кадджын æмзæххон, Советон Цæдисы Хъæбатыр Къесаты Астаны ингæн æмæ йыл сæвæрдтой дидинжытæ.

Парламенты Сæрдар пайдайагыл банымадта, ног равзæрст Парламенты æппæт фракциты депутаттæ дæр алы майрæмбоны се ‘взарджытæм цæуын кæй райдыдтой, уый. Хонгæ дæр æй афтæ кæнынц: «Депутаты бон». Ахæм фембæлдтыты рæстæг, адæмимæ лæгæй-лæгмæ ныхас кæнгæйæ, лыггонд цæуынц тыхстаг фарстатæ. Алы мæйы фæстаг майрæмбон Алексей Мачнев йæхæдæг дæр фембæлы, республикæйы алы районтæй йæм сæ фарстатимæ чи æрбацæуы, уыцы адæмимæ. Парламенты ма фæзынд æндæр ногдзинад — «Парламенты бон». Парламент йæ куысты бынат кæмæн у æмæ, уыцы куысты тыххæй æхца чи исы, ахæм депутаттæ фæззæгæй фæстæмæ алы квартал кæнæ алы афæдзы æмбис иу хатт цæудзысты районтæм, æвзарджытæм æмæ, æнæхъæн бон уым арвитгæйæ, алчидæр сæ бынаты лыг кæндзæн, чи йæм хауы æмæ, адæмы чи тыхсын кæны, уыцы фарстатæ.

Уымæй уæлдай ныхас цыд, Уæрæсейы æппæт субъектты закъонæвæрынадон оргæнтæ, семæ Цæгат Ирыстоны Парламент дæр, цы хъæппæрис равдыстой, фæлæ федералон æмвæзадыл фидаргонд чи нæма æрцыд, «Хæсты сывæллæтты» уыцы статусыл, пенсион системæйы ногдзинæдтыл, ирыстойнаг сывæллæттæн рæвдауæндæттæ аразыныл æмæ æндæр ахсджиаг фарстатыл. Се ‘ппæтæн дæр Алексей Мачнев радта бæстон дзуаппытæ æмæ радзырдта, Парламенты фæззыгон сесси куы райдайа, уæд депутатты размæ цы фарстатæ æвæрд уыдзæн, уыдоны тыххæй. Ног равзæрст Парламенты депутатты куыстæн аргъ кæнгæйæ, спикер куыд бафиппайдта, афтæмæй се ‘ппæт дæр сты куыстхъом, се ‘хсæн нæй быцæутæ, сæ архайд та арæзт у, цы закъонæвæрынадон хъæппæристæ æвдисынц, уыдоны фæрцы нæ республикæйы цæрæг адæмы цард хуыздæр кæнын.

ДЕДЕГКАТЫ Зæлинæ

ОСТАВЬТЕ ОТВЕТ

Please enter your comment!
Please enter your name here