Алы ныв дæр — хицæн истори, хицæн уацмыс

0
139

 

Æхсæнадон организаци «Ирон дины ныхас»-ы хъæппæрисæй арæзт æрцыд нывты конкурсравдыст, нарты кадджыты æмæ ирон æгъдæутты темæтыл. Мадзал бацæттæ кæнынмæ сæ цæст фæдардтой нæ республикæйы Нывгæнджыты цæдисы сæрдар МÆРГЪИТЫ Таймураз æмæ РЦИ-Аланийы культурæйы министр МИЛДЗЫХТЫ Руслан.

«Ирон дины ныхас»-ы сæрдар Хъайтыхъты Ростислав куыд радзырдта, афтæмæй организацийы нысан у рæзгæ фæлтæримæ æнгом кусын, нæ фыдæлты æгъдæуттæ æмæ культурæйы хæзнатæм сæ здахын.

— Махæн нæ хистæртæ амыдтой, дзырдтой фыдæлты хабæрттæ æмæ зонæм, фæлæ фидæны цæмæй уыцы национ хæзнатæ сæфт ма ‘рцæуой, уый тыххæй абон архайын хъæуы не ‘ппæтæн дæр æнгомæй рæзгæ фæлтæрæн не ‘гъдæуттæ æмæ культурæ амоныны хъуыддаджы.

Ацы конкурс нæ куысты фыццаг мадзал у, уымæн æмæ нæ организаци æхсæз мæйæ фылдæр нæма кусы. Æмæ нæ зæрды ис, ацы нывты конкурс æрвылазон, традицион скæнын. Нæ размæ хæс æвæрæм ирон æгъдæуттæ æмæ нарты эпос нывты æвдисын, — загъта Хъайтыхъты Ростислав.

Жюрийы уæнгтæ уыдысты нæ республикæйы зындгонд нывгæнджытæ. Уыдонæй алчидæр йæхæдæг биноныг фæкастис конкурсы куыстытæм. Уыимæ, сфæлдыстадон конкурсы архайдтой алы кары адæм, профессионалон æмæ хæдахуыр нывгæнджытæ. Хъайтыхъты Ростислав дæр хæдахуыр нывгæнæг у. Нывты аивадмæ йæ зæрдæ æхсайдта, æвзонг лæппу ма куы уыдис, уæд. Тынг арæхстджынæй пайда кæны хъæдгуыст æмæ ахорæнтæй дæр. Нывты конкурсмæ бахаста йæхи куыстытæ дæр. Ирон адæмы ‘хсæн рагæйдæр йæ хъæбатырдзинады кой таурæгъон кæмæн ссис, уыцы номдзыд лæгтæ Тотиты Аким æмæ Алыккаты Хазбийы сурæттæ хъæдæй конд. Ирон æгъдауы æмæ нарты кадджытæй скъуыддзæгтæ: «Нывонд» æмæ «Сослан мæрдтыбæсты».

Кæй зæгъын æй хъæуы, æппæт куыстытæ дæр равдыстыты центры уыдысты цымыдисаг, фæлæ жюрийы уæнгтæ равзæрстой хуыздæрты хуыздæрты æмæ уыдон уыдысты:

Нарты эпосы темæйы фыццаг бынат — Гугкаты Чермены ныв «Нарты кадджытæ», дыккаг бынат — Цæллагты Викторы куыст «Куырдалæгон» æмæ æртыккаг бынат саккаг кодтой Зинаидæ Кулиевайæн — графикон куыстыты серийы тыххæй. Ирон æгъдæутты темæты та фыццаг бынат райста Джиоты Вадим «Уацамонгæ», æмæ «Рагон къæлæтджын бандон» хъæдæй кæй сарæзта, уый тыххæй. Дыккаг бынат — Николай Нестеренкойæн «Похищение невесты» æмæ æртыккаг бынат — Хъайтыхъты Ростиславы «Нывонд» æмæ «Сослан мæрдтыбæсты» куыстытæн.

Равдысты нывтæ кæд се ‘ппæт уæлдæр амынд темæтыл нæ уыдысты, уæддæр сæ адæймаг чиныг кæсæгау кастис. Алы ныв дæр хицæн истори, хицæн уацмыс «дзырдта» æмæ уый тыххæй тынг цымыдисаг рауад мадзал.

САУТÆТЫ Тамилæ

ОСТАВЬТЕ ОТВЕТ

Please enter your comment!
Please enter your name here