Æнæферохгæнгæ бæрæгбон

0
48

Ивгъуыд хуыцаубоны нæ Иры дзыллæ, Цæгатæй Хуссармæ, сбæрæг кодтой Хетæджы Уастырджийы бон. Уыцы бæрæгбонмæ йæхи æмбæлгæ хуызы бацæттæ кодта алы ирон хæдзар дæр. Бæрæгбон канд хæрд æмæ нозтæй нæ фидауы, фæлæ удварны хорзæхыл дзурæг хъуыддæгтæй.

Уыцы бон Дзæуджыхъæуы Къесаты Астаны номыл уынджы 41-æм хæдзары хистæртæй иу, Ирыстоны дзырддзæугæ хистæр Гугкаты Ирбег йæ сыхы кæстæртæн сарæзта цымыдисаг, зондæн æмæ зæрдæйæн стыр ахъаз конкурс «Æз дæн ирон». Йæ архайджытæ хъуамæ сæ арæхстдзинад æвдыстаиккой кафынæй, æмдзæвгæтæ дзурынæй, ирон музыкалон инструменттæй цæгъдынæй, æрмгуысты дæсныйадæй. Конкурсы райдайæны йæ архайджытæн зæрдиаг арфæ ракодта зындгод поэт, журналист, ацы сыхы цæрæг Къадзаты Станислав:

— Фарн уæм бадзурæд, мæ зынаргъ сыхæгтæ, æмæ уе ‘ппæты дæр бæрæгбоны хорзæх уæд, — загъта Станислав. Адæймаджы зæрдæ бæрæгбонтæй у райгонд æмæ буц. Фæлæ раст нæ уыдзæн, удварны хæзнатæ, нæ культурæ, не ‘гъдæуттæ куы ферох кæнæм, уæд. Уымæн æмæ фыдæлты ацы хæзнаты фæрцы ныфсджындæр стæм, стæй нæм нæ фидæны фæндаг дæр хуыздæр зыны. Æмæ уын, нæ зынаргъ кæстæртæ, мæ зæрдæ зæгъы æнтыстдзинæдтæ.

Лæцойты Ланæ бакаст Къостайы басня «Бирæгъ æмæ хърихъупп». Цæуы йыл дыууадæс азы. Дыууæ номинацийы уæлахиздзау ссис æмæ дыууæ дипломы æмæ зæрдылдарæн лæвæрттæ райста авдаздзыд Гæджиты Давид. Дыккаг бынаты аккаг кафынæй æмæ нывтæ кæнынæй сси Гугкаты Афинæ (цæуы йыл фараст азы), Ирон хæринæгты номинацийы уæлахиздзауы диплом райста авдаздзыд Гугкаты Каролинæ. Æрмгуысты се ‘ппæтæй сæрæндæр æмæ арæхстджындæр разынд Гугкаты Арсен, цæуы йыл фондз азы. Адæмон кафты номинацийы дыккаг бынат бацахста астаздзыд Аминæ Истомина. Ацы номинацийы ма арæхстджынæй йæхи равдыста дыууадæсаздзыд Хуыбылты Радмилæ дæр. Гуымсæгтæй аив ацагътой æмæ æркасты æртыккаг бынатмæ рацыдысты Хæдарцаты Дзæрæхмæт æмæ Хуыбылты Руслан. Æмдзæвгæтæ ма аив чи бакаст æмæ ерысы дипломты аккаг чи сси, уыдонимæ уыдысты Гаглойты Арсен æмæ Хæдарцаты Алан.

Кæстæрты арæхстдзинадæн аргъ кодтой жюрийы уæнгтæ: поэт, журналист Къадзаты Станислав, сыхы кадджын сылгоймæгтæй иу, фæллойы ветеран Баситы Александрæ æмæ газет «Рæстдзинад»-ы уацхæссæг Гасанты Валери. Ацы сыхы конкурс «Æз дæн ирон» фыццаг хатт арæзт æрцыд, фæлæ нын Гугкаты Ирбег куыд радзырдта афтæмæй 11- æм микрорайоны цы фæсивæд цæры, уыдоны æхсæн ныр къорд азы арæзт цæуы спортакиадæ рог атлетикæйæ, зындгонд спортсмен Цъеуты Спартакы номыл приз рамбулыныл.

Нæ ныхасы кæрон ма зæгъдзыстæм уый, æмæ Дзæуджыхъæуы Къесаты Астаны уынджы 41-æм хæдзары сыхы хистæр Гугкаты Ирбег фæсивæды æхсæн цы ерыстæ аразы, уый у раппæлинаг хъуыддаг. Хорз уаид, æмæ йæ нæ горæты иннæ сыхты цæрджытæ дæр куы бафæзмиккой. Æмæ алы ирон бæрæгбæттæм дæр ахæм ерыстæ куы аразиккой, уæд нæ фæсивæды хъомылады фарстатæ зынгæ æнцондæрæй лыггонд цæуиккой, бæрæгбæттæ та, фыццаджыдæр, удварнæн, зæрдæйы бæркадæн кæй сты, уый нæ алчидæр æмбарид. Æмæ сæ бахæрд æмæ банызтмæ не здахиккам.

 АНВАРАТЫ В.

ОСТАВЬТЕ ОТВЕТ

Please enter your comment!
Please enter your name here