Ирыстойнæгты уæлахизтæ дзюдойæ

0
72

 

Грознайы дзюдойæ цыдысты Цæгат Кавказы федералон зылды ерыстæ нæлгоймæгтæ æмæ сылгоймæгты ‘хсæн.

 

Ирыстоны минæвæрттæн æдæппæт бантыст 17 хæрзиуæджы рамбулын. Уыдонæй 8 сты сыгъзæрин, 3 — æвзист, 6 та — бронзæ майдантæ.

Сыгъзæрин майдантæй хорзæхджын систы нæ хъайтар чызджытæ Бететы Бэлæ (52 кг), Лазарты Аланæ (48 кг), Цырыхаты Данæ (57 кг), Гæбуты Фатимæ (63 кг) æмæ Тасойты Айзæ (70 кг).

Дыккаг бынæттæ æмæ æвзист майдантæ рамбылдтой Луизæ Харченко (52 кг), Голоты Маринæ (57 кг) æмæ Гаджиты Алинæ (63 кг). Æртыккаг бынæттæ бацахстой Кокайты Кристинæ (48 кг) æмæ Дзабиты Жаннæ (57 кг).

Нæлгоймæгты ерысты ирыстойнæгтæй фыццаг бынæттæм рацыдысты Егиазар Карапетян (66 кг), Битеты Давид (100 кг) æмæ Дзанайты Сослан (+100 кг). Æртыккаг бынæттæ та бацахстой: Армен Татевосян (66 кг), Дзукъаты Сæрмæт (73 кг), Икъоты Сослан (100 кг) æмæ Цхуырбаты Ален (+ 100 кг).

Æмткæй райсгæйæ, РЦИАланийы дзюдоисттæ бацахстой фыццаг командон бынат, дыккаг бынатмæ рацыдысты Цæцæны республикæйы дзюдоисттæ, æртыккаг бынат та бацахста Дагестаны командæ.

Нæ спортсменты ерыстæм бацæттæ кодтой тренертæ Гæбæраты Автандил, Лолаты Темырсолтан æмæ Хуыгаты Витали (сылгоймæгты командæ). Беккуызарты Алик, Цæгæраты Хъазыбег, Кадиты Сослан, Айларты Ирбег (нæлгоймæгты командæ).

Ныр ацы ерысты, фыццаг æмæ призон бынæттæ чи бацахста, уыдон сæхи цæттæ кæндзысты Уæрæсейы чемпионатмæ. Уый дæр цæудзæн Грознайы 10-13 октябры. Нæ командæйы хистæр тренер Цæгæраты Хъазыбег куыд зæгъы, афтæмæй Ирыстонæй Уæрæсейы чемпионаты хæцдзæн 25 дзюдоистæй фылдæр. «Ацы ерысты балцæгтæ чи райста, уыдоныл ма бафтдзысты, амæй размæ рейтингон ерысты чи фесгуыхт, уыцы дзюдоисттæ. Зæгъæм, Лæппынæгты Аслан, Хуыбецты Алан, Федор Целиди, Тасойты Инал æмæ иннæтæ», — зæгъы Цæгæраты Хъазыбег.

 

Рог атлетикæйæ — Уæрæсейы цыппар чемпионы

Рог атлетикæйæ æнæниз атлеттæй уæлдай нæ арæх дисы бафтауынц, низæфхæрд чи баййæфта, уыцы спортсментæ дæр.

Инвалидты спорты рог атлетикæ ахсы стыр бынат. Уæрæсейы инвалидты иугонд командæйы нæ республикæйы минæвæрттæ ныр къорд азы дæргъы æнтыстджынæй архайынц дунеон ерысты. Уæдæ нæ бæстæйы чемпионатты дæр иу æмæ дыууæ хатты нæ уыдысты уæлахиздзаутæ.

Мæнæ та а фæстаг рæстæг дæр нæ спортсментæ фесгуыхтысты Уæрæсейы чемпионатты. Фыццаг Смоленскы, къуырма спортсменты чемпионаты хорз бæрæггæнæнтæ равдыстой Куымæриттаты Валери æмæ Вадимы ахуыргæнинæгтæ Кирилл Филиппов æмæ Денис Федоренков.

Денис Федоренков ерыс кодта хæрдмæ гæпп кæнынæй æмæ равдыста хорз арæхстдзинад æмæ уæлахизмæ тырнындзинад. Денисæн бантыст 2 метры æмæ 10 сантиметры бæрзæндты агæпп кæнын. Уый бæрц йæ ныхмæлæуджытæй сгæпп кæнын никæмæн бантыст æмæ Федоренков ссис Уæрæсейы чемпион.

Йе ‘мбалы бафæзмыдта Кирилл Филиппов дæр. Кирилл ерыс кодта хæрдмæ хъилимæ гæпп кæнынæй æмæ йын бантыст 4 метры æмæ 60 сантиметры бæрзæнды сæрты агæпп кæнын. Ахæм бæрæггæнæн равдисын æндæр никæмæнуал баци йæ бон æмæ Кирилл Филиппов дæр ссис Уæрæсейы чемпион.

Сæ тренер Куымæриттаты Валери зæгъы: «Денис æмæ Кириллæн сæ ныййарджытæ сты Уæрæсейы æфсады афицертæ æмæ Ирыстонмæ афтæмæй ссыдысты. Рог атлетикæ зæрдиаг уарзтæй уарзынц æмæ сты æнæзивæг. Ныртæккæ цы бæрæггæнæнтæ æвдисынц, уыдоныл ма сæ бон уыдзæн ноджыдæр бафтауын. Уый та ныфс дæтты, дунеон ерысты дæр сын стыр бæрзæндтæм схизын кæй бантысдзæн, уымæй».

Ноджыдæр ма дыууæ ирыстойнаг спортсмены фесгуыхтысты, 4-5 июлы Челябинскы сахъат спортсменты ‘хсæн цы чемпионат цыдис, уым.

Куымæриттаты Валерийы хъомылгæнинаг Мæргъиты Георги хæрдмæ сгæпп кодта 195 см. Уый у ацы инвалидты класс «Т-47»-ы рекорд. Раздæр Уæрæсейы рекорд уыдис 190 см. Кæй зæгъын æй хъæуы, ахæм бæрæггæнæнимæ Мæргъийы-фырт бацахста фыццаг бынат. Куымæриттаты Валери куыд зæгъы, афтæмæй Георги раздæр ерысты архайдта згъорынæй æмæ йын æнтысгæ дæр гыццыл нæ бакодта. Æрыгæтты ‘хсæн 100 метрмæ згъоргæйæ ссис Уæрæсе æмæ дунеон ерысты уæлахиздзау. «Георгийыл цæуы 24 азы. Дыууæ азы размæ мæм æрбацыд æмæ мын загъта, хæрдмæ гæпп кæнын æй кæй фæнды, æмæ йемæ куы акусин, уый. Мах райдыдтам архайын æмæ ныридæгæн ахæм бæрзæндтæм схæццæ. Нæ зæрдæ дарæм, 200 см дæр нын кæй бантысдзæн сисын, ууыл», — загъта Куымæриттаты Валери.

Инвалидты ацы чемпионаты ма иу сыгъзæрин хæрзиуæг рамбылдта Хынцæгты Хетæг. Хуыгаты Гоча æмæ Хъороты Барисы хъомылгæнинаг дæргъмæ агæпп кодта 660 см. Уый у Уæрæсейы рекордæй 1 см фылдæр. Уымæй уæлдай ма ирыстойнаг спортсментæ рамбылдтой цалдæр æвзист æмæ бронзæ майданы.

БАСКАТЫ Уырызмæг

ОСТАВЬТЕ ОТВЕТ

Please enter your comment!
Please enter your name here