Рагон къамтæ дзурынц

0
46

Ацы къам мæм æрбахаудис цалдæр азы размæ Хъæдгæронæй, фæлæ кæмæй, уый мæ, хъыгагæн, байрох. Ныфс ын бавæрдтон, газеты йæ кæй рауадзын кæндзынæн, фæлæ мыл «мæрды рох» бахæцыд, кæмдæр æй чингуыты æхсæн авæрдтон, æмæ ныр æнæнхъæлæджы рахаудис. Уый тыххæй хатыр курын йæ хицауæй. Ногæй та сæм лæмбынæг кæсын сæ цæстытæм æмæ дзы иуы цæсгомыл дæр цины фæд нæ уынын. Цавæрдæр мæт сæ цыма тыхсын кæны, фæлæ ныфссаст не сты, сæ сомбоныл сæ зæрдæ дарынц.

Хъыгагæн, чи сты, уый тыххæй, нæдæр къамы чъылдымыл исты фыст разынд, нæдæр мын къамы хицау исты загъта. Æрмæстдæр Хъæдгæроны фæсивæд кæй сты, фæлæ ам дæр цыма гыццыл дызæрдыг кодта.

Къам, кæмдæр хъæуы ист кæй æрцыд, уый бæрæг у сæ чъылдыммæ хæдзары къулæй, æртæ рудзынджы дзы бæрæг дарынц. Фæлæ фæсивæд сæрмагондæй иумæйаг къам сисынмæ æрбамбырд уыдаиккой, уый дæр кæмдæр дызæрдыггаг у. Æвæццæгæн, цавæрдæр æхсæнадон мадзалы архайдтой, æмæ сæ «амондæн» къамисæг æнæнхъæлæджы фæзынд, æмæ ма сæ мах дæр уынæм.

Ныр ацы фæсивæдæй, 1935 азы ист къамæй нæм чи кæсы, уыдонæй, хъыгагæн, æвæццæгæн, хур никæуыл уал кæсы. Фæлæ уыдоны фæрныг байзæддагæй кæд, мыййаг, исчи базыдта йæхиуæтты, йæ хæстæджыты, уæд ма фæзивæг кæнæд æмæ сæ номæй-номмæ ныффыссæд газеты редакцимæ. Гæнæн ис, æмæ ма ахæм къам кæмæдæр æвæрдæй баззад, æмæ дзы кæйдæрты зоны къамы хицау.

ДЗÆУЫГТЫ Таймураз

ОСТАВЬТЕ ОТВЕТ

Please enter your comment!
Please enter your name here