Цары — фиу, уæ амонд — иу

0
24

 

 «Амондджын ут, Маринæ æмæ Миша!» — цал æмæ цал хатты фехъуыстой ацы æхсызгон ныхæстæ сæ чындзæхсæвы бон ног бинонтæ.

Ивгъуыд къуыри сæ цард баиу кодтой. Хъысмæтæй æфхæрд баййæфтой, дыууæйæ дæр, Маринæ гыццылæй нырмæ у фыццæгæм къорды инвалид, бирæ азты цæры зæрæдты хæдзар-интернат «Забота»-йы. Куыд алы сылгоймаг, афтæ йе стырдæр бæллиц уыд уарзондзинады ад банкъарын, чындздзон урс къаба скæнын. Миша та ацы интернатмæ цалдæр азы размæ æрбафтыд Комсомольск-на-Амурейæ, уым хъомыл кодта сидзæр сывæллæтты хæдзары. Сæхæдæг куыд зæгъынц, афтæмæй фыццаг фембæлдæй кæрæдзи зæрдæмæ фæцыдысты. Маринæ каляскæйы бады æмæ иу нæлгоймаг йæ цурæй нæ цыд, æххуыс ын кодта алы хъуыддаджы дæр. Интернаты кусджытæ дæр уыдтой, кæртмæ, сыгъдæг уæлдæфмæ-иу иумæ куыд рацыдысты, сæ ныхас кæрæдзиуыл куыд бадтис, уый. Кæд сæ кары бацыдысты, уæддæр æнцой нæ зонынц, зарыц иумæ хор «Заботушка»-йы, къухæй арæхстджын Миша та æххуыс кæны хæрæндоны, стæй хæдзарадон куыстытæм нæ зивæг кæны.

Интернаты цы адæм цæры, уыдон паддзахады ‘рдыгæй тынг рæвдыд сты, фæлæ уæддæр бинойнаджы ничи баивдзæн. Нæлгоймаг разыйы дзуапп райста йæ уарзонæй, дыууæ сыгъзæрин къухдарæны балхæдта, æмæ чындзæхсæвы бон снысан кодтой. Бирæ уазджытæ фæхуыдтой, æнæферохгæнгæ бæрæгбон сын сарæзтой интернаты кусджытæ.

Хæрæндоны рæсугъд фæлыст залы хъуысы хъæлдзæг музыкæ, кæрæй-кæронмæ дзаг фынгтæ æвæрд. «Абонæй фæстæмæ, закъоны бындурыл, стут бинонтæ», — загъта Дзæуджыхъæуы ЗАГС-ы кусæг æмæ сын æвдисæндар радта. Цины цæссыгтæ æруадысты чындзы цæсгомыл. «Хуыцауæн бузныг, ахæм хорз æмкъай мын кæй радта, уый тыххæй», — загъта Маринæ.

Арфæйы ныхæстæ сын ракодтой интернаты директор Хъæцмæзты Фатимæ, Дзæуджыхъæуы Хæлардзинады хæдзары директор Кочиты Георги æмæ иннæтæ. Чындзы дидинджыты баст та æрхаудис интернаты кусæг æрыгон чызг Багаты Зæринæмæ. Музыкалон лæвæрттæ дыууæ æмкъайæн скодтой нæ республикæйы уарзон артисттæ Хекъилаты Мирæ, Болататы Майæ, Езеты Майран. Хъазахъхъæгты хор «Сударушка»— имæ бирæтæ æмзард кодтой.

Сæ цины æмæ сæ хъыджы дæр иумæ кæй уыдзысты цæрæнбонтæм, уымæй кæрæдзийæн ныфс бавæрдтой уарзæгой удтæ.

ЦÆГÆРАТЫ Жаннæ

 

ОСТАВЬТЕ ОТВЕТ

Please enter your comment!
Please enter your name here