Дзæуджыхъæуы æрвылбоны царды фарстатæ

0
56

Республикæ Цæгат Ирыстон-Аланийы Сæргълæууæг БИТАРТЫ Вячеславæн Дзæуджыхъæуы бынæттон хиуынаффæйады администрацийы разамонæг ÆЛБЕГАТЫ Барисимæ цы кусæг фембæлд уыд, уым бæстон ныхас рауад республикæйы сæйраг горæты æрвылбоны царды фарстатыл. Уый тыххæй фехъусын кодта Цæгат Ирыстоны Сæргълæууæджы æмæ Цæгат Ирыстоны Хицауады пресс-службæ.

Зæгъæм, фембæлды бæстон æрдзырдæуыд сывæллæтты сæрдыгон фæлладуагъды, горæты аивдзинад æмæ цъæхфæлысты уавæрыл, фæндæгты арæзтад æмæ æндæр ахсджиаг хъуыддæгтыл.

Дзæуджыхъæуы бынæттон хиуынаффæйады администрацийы сæргълæууæг куыд радзырдта, афтæмæй горæты скъолаты цур ныртæккæ сæ куыст кæнынц 40 сæрдыгон лагеры. Сæрды мæйты дзы сæ фæллад суадздзысты 14 мин сывæллонæй фылдæр.

— Æппæт объекттыл дæр фæкарздæр кодтам æдасдзинады фæтк, бынæтты сæ радмæ гæсгæ вæййынц ахуыргæнджытæ æмæ хъахъхъæнджытæ. Лагертæ байгом кæныны размæ сæрмагонд цæстдарæг службæты минæвæрттæ бабæрæг кодтой æппæт скъолатæ дæр æмæ сæ амынддзинæдтæ радтой, цæмæй æппæт бынæттæ дæр дзуапп дæттой санитарон æнаиппдзинад æмæ æдасдзинады домæнтæн, — загъта Æлбегаты Барис. Йæ ныхасмæ гæсгæ, сæрды мæйты бæстон цæстдард ис, Дзæуджыхъæуы цæрджытæ æмæ горæты уазджытæ сæ фæллад кæм уадзынц, уыцы дзыллон бынæттæм дæр.

— Сæрмагонд службæты минæвæрттæ рагагъоммæ бабæрæг кодтой Дзæуджыхъæуы Доны станцæ. Уыцы бынат дæр сифтонг кодтам домæнты бындурыл: кусы дзы медицинон пункт, сæвæрдтам дзы алыхуызон цæстуынгæ æрмæджытæ æдасдзинады уагæвæрдтимæ, бынаты иудадзыгдæр сæ куыст æххæст кæнынц ирвæзынгæнджытæ. Каст цæуы иннæ хъуыддæгтæм дæр, — бафтыдта йæ ныхасмæ Æлбегаты Барис.

Битарты Вячеслав горæты разамонæгæн бахæс кодта, цæмæй фæлладуадзæг адæмы æдасдзинад хъахъхъæныны хъуыддаджы æнгомдæр æмгуыстад кæной Мидхъуыддæгты министрадимæ, стæй Æнæнхъæлæджы уавæрты министрады дæлхайæдтимæ. «Фыццаградон цæстдард хъуамæ уа адæмы æдасдзинады фарстамæ. Уыимæ, фæлладуадзæн бынæттæ хъуамæ дзуапп дæттой нырыккон домæнтæн», — фæнысан кодта республикæйы Сæргълæууæг.

Республикæйы разамонæг сæрмагонд æргом аздæхта горæты санитарон уавæр æмæ сыгъдæгдзинадмæ. Йæ ныхасмæ гæсгæ, ацы фарстатæм хъæуы æрвылбоны цæстдард. — Сæвзæргæ уавæр алыхатт зæрдæмæдзæугæ нæ вæййы. Иуæй-иу æбæрнон адæймæгты аххосæй хæлд цæуы горæты аивдзинад: газонты кæрдæг ныссæндынц, бордюртæ ныссæттынц, тротуартæ скалынц… Æппæт ацы хъуыддæгтæн административон æгъдауæй хъуамæ аргъгонд цæуа. Æмæ уыцы æууæл горæты аивдзинад æмæ сыгъдæгдзинадыл хæстæгдæр рæстæг хуыздæрæрдæм фæзына, — загъта Битарты Вячеслав.

Уымæй уæлдай, фембæлды куыд загъдæуыд, афтæмæй хæстæгдæр рæстæг цалцæггæнæг бригадтæ ивын райдайдзысты, Къостайы проспекты цы трамвайты фæндæгтæ ис, уыдон. Цалцæггæнæн куыстытæ адарддæр уыдзысты Сабырдзинады проспект æмæ горæты иннæ историон бынæтты дæр.

Нæ уацхæссæ

ОСТАВЬТЕ ОТВЕТ

Please enter your comment!
Please enter your name here