Фæндыр — йæ царды цин

0
101

Æрдзæн дæр, дам, йæхи фæтк, йæхи æгъдау, йæхи хъæлæс ис. Йæ хъæдтæ æмæ быдыртæ, йæ дидинæгджын фæзтæ кæддæриддæр алæмæты мыртæй дзаг сты. Æрдз хурыскастыл йæхи кадæг фæкæны. Дун-дунемæ, зæхмæ йæ уарзты æнкъарæнтæ арвæрдыны ахорæнтæй равдисы. Йæ маст дæр æмæ йæ хъаст дæр абухгæ дæтты, тызмæг уады уынæр æмæ æрвнæрдæй фæзæгъы. Æхсæв æмæ боны сусæг æнкъарæнтæ цыппæрцæст æртæхты цæссыгтæй равдисы.

Бæстыбардуаг æрдзæн цы иузæрдион хæлæрттæ сфæлдыста, уыдонæй йæм адæймагæй хæстæгдæр ничи у. Уымæй хуыздæр ын ничи æмбары йæ уды конд, йæ уды ахаст. Æмæ æрдз йæ тæмæссаг мыртæ æмæ зæлтæй цы рæстугъд алдымбыд саразы, уый йын адæймаг йеддæмæ ничи банкъары. Æмæ азæххыл адæймаг кæдæй цæры, уæдæй нырмæ архайы уыцы мыртæ æмæ зæлтæй кадæг саразыныл, зарæджы æмæ сæ уадынгæрзты базыртыл сисыныл.

Рæстæг куыд цыди, афтæ уыцы уадынгæрзтæ дæр ивгæ цыдысты. Нарты хинæйдзаг Сырдон фыййауы уадындз баивта, йæ хъæбулты уæнгтæ æмæ зæрдæйы тæгтæй кæй скодта, уыцы дыууадæстæнон фæндырæй. Къоста нæм æнусты сæрты æрхаста хъисынфæндырæй цæгъдæг Хъуыбадыйы ном. Азтæ цыдысты, æмæ Иры дзыхъмæ æхсызгон уазæгау æрбафтыд хъандзал фæндыр. Кæй арæхстджын къухты равзæрд, фыццаг хатт кæй сусæг æнкъарæнтыл дзырдта, уый абон ничиуал хъуыды кæны. Фæлæ йæ бауарзтой адæм. Ссис хæхты хъан. Ссис ирон хъазт аивгæнæг. Цал ирон адæймаджы къухты сфидыдта? Цал адæймаджы курдиат равдыста? Чи сæ банымайдзæн! Фæлæ хъандзал фæндырæй æндæр уадынгæрзтæн цæдисæмбал чи сарæзта, уый у æрмæстдæр ольгинскæйаг Гæздæнты Булат.

Йæ фыды цырыхъхъы хъусмæ дæр чи нæ хæццæ кодта, уыцы сывæллон кæддæр кæйдæр хъазты бандонæй æриста фæндыр æмæ йын йæ чысыл æнгуылдзтæй фæцагайдта йæ амонæнтыл. Фæндыр æм сдзырдта фыдæлты хъæлæсæй. Фæндыр йæ кæлæнгæнæг мыртæй байгом кодта сабийы зæрдæ æмæ дзы йæхицæн загъта уарзон фысым. Уæдæй абонмæ бирæ рæстæг рауад. Ныр фæхалас Булаты сæр. Фæуæззау йæ къахайст. Йе ‘нкъараг уд та йæ сабибонты цæргæйæ баззад. Æмæ йæ бон нæ бацис фæндырыл йæ зæрдæ сивын. Райсы йæ къухтæм, аивазы йын йæ тæнтæ, æмæ йæ цæстытыл ауайынц ивгъуыд азтæ. Райдайæн кълæстæй фæстæмæ хихъæппæрисадон къорды куыд цагъта, Дзæуджыхъæуы музыкалон училищейы куыд ахуыр кодта, Мæскуыйы Гнесинты номыл музыкалон-педагогон институты цы зонындзинæдтæ райста, уыдон. Дæсны музыкант æмæ дзы дирижер кæй рауад, уымæ гæсгæ ссис Цæгат Ирыстоны радио æмæ телеуынынады комитеты адæмон инструментты оркестры разамонæг. Фæстаг азты уыцы оркестр ис республикæйы Культурæйы министрады дæлбар. Ирон театры спектакльтæн æмæ ирон поэтты æмдзæвгæтыл фыссы музыкæ. Ног цард радта, рохуаты чи аззад, ахæм зарджытæ æмæ цæгъдтытæн. Дысфæлдæхтæй бакуыста æмæ ирон фæндырæн ныффыста нотæтæ. Аивады фæндагыл фыццаг къахдзæфтæ чи кæны, уыцы æрыгон фæлтæрæн бацæттæ кодта ахæм нотæты цалдæр чиныджы. Ирон музыканттæй ахæм куыст бакæнын фыццаг æрмæстдæр Булаты къухы бафтыд. Фæндыры авналæнтæ фæхъæздыгдæр кодта аккордион æмæ баяны гæнæнтæй. Симфонион оркестр фæаивдæр кодта фæндыры зæлтæй. Булаты æххуысæй фæндыр ахызт ирон хъазты арæнтæй æмæ йæ зæлланггæнаг хъæлæстæ арæхæй-арæхдæр хъуысын райдыдтой Дельфийаг хъæзтыты æмæ алыхуызон фестивальты. Йæ курдиатæн аргъ кæнгæйæ йын композитор Хаханты Дудар балæвар кодта фæндырæн æмæ симфонион оркестрæн фыст концерт.

Цард, дам, ногдзинæдтыл æнцайы, ногдзинæдты фæрцы рæзы, ногдзинæдты æххуысæй цæуы ивгæ, рæсугъддæр æмæ хуыздæргæнгæ. Гæздæнты Булат дæр бацархайдта фæндыры гæнæнтæ фæногдæр æмæ фæхуыздæр кæныныл. Фæндырæй сарæзта йæхицæн хæлар дæр æмæ лæггадгæнæг дæр. Фæндыр ын ссис йæ царды цин, æмæ йæ рæдауæй лæвар кæны адæмæн.

БУТАТЫ-ХЕСТАНТЫ Победæ

ОСТАВЬТЕ ОТВЕТ

Please enter your comment!
Please enter your name here