Йæ фæндтæ аскъуыдысты æрдæгыл

0
152

 

Цæй агъатыр разыны хъысмæт иуæй-иу адæймæгтæм, æвæдза. Цымæ цавæр Хуыцау у тæрхонгæнæг нæ царды бæрцæн. Уастæн та, цы загъдæуа, амæндтæ уарæгæн…

Æрмæстдæр 40 азы рацыдис Зассеты Хъазыбегыл, парахат зæрдæйы хицау, æмгарджын адæймаг, уæдæ сыхы мидæг уарзон, кæдфæндыдæр лæггадгæнаг æмæ æгъдаудæттæг.

Хъазыбеджы фæндыд, хорз кæимæ цард, уыцы бирæ хиуæттæ æмæ къабæзтæн царды мидæг исты хорздзинæдтæ ракæнын. О, фæлæ æгъатыр низ йæ фæнд атардта, фæтых æрыгон цардбæллон зæрдæйыл.

Куыд тынг æй фæндыдис йæ бинонтæ, йæ кæстæртæн бирæ хабæрттæ саразын, ахуыры фæндагыл йæ уарзон, йæ зынаргъ дыууæ кæстæры сæвæрын — Арсен æмæ Алинæйæн баххуыс кæнын, йæ уарзон Ирыстонæн сæ хорз ахуыргæндтæ рауайын кæнын.

Фæлæ гадзрахатæй разылд хъысмæт Зассеты Иваны зæрдиаг лæппуйыл æмæ йæ бирæ хорз фæндтæ аскъуыдысты æрдæгыл.

Хъазыбег райгуырд æмæ схъомыл Сунжæйы. Астæуккаг скъолайы фæстæ бацыд Цæгат Ирыстоны Хетæгкаты Къостайы номыл университеты юридикон факультетмæ. Фæстæдæр кусын райдыдта Горæтгæрон районы прокуратурæйы. 2007 азæй куыста Горæтгæрон районы мидхъуыддæгты управленийы.

Райгуырæн бæстæйы сæрвæлтау бахъуаджы рæстæг цыфæнды хъуыддæгты дæр уыд раззаг. Хъазыбегæн лæвæрд æрцыд бирæ хæрзиуджытæ йæ хорз куысты тыххæй. Уыд пъæлицæйы майор, стæй хорз спортсмен.

Ирон нæртон лæппу зыдта, царды фæндæгтæ вазыгджын æмæ бирæвæрсыг кæй сты, æнцонтæй дзы кæй ницы ис ссарæн.

Хъазыбег йæ фыдæлты цард æмæ æгъдæуттæ хорз зыдта, ирон традицитыл хъомыл кæй уыд, уый бæрæг уыд йæ бирæ зондамонæнтæй æмæ йе ‘мбæлттимæ æгъдæуттыл дзургæйæ. Кад кодта хистæртæн, кæстæртæн та уыд дæнцæг, фæзминаг йе ‘гъдау æмæ алы хъуыддагæй дæр.

Адæмы ‘хсæн ном скæнын зын у, фæлæ йæ фесафынæн та бирæ нæ хъæуы, уыцы зондамынд ын сабибонтæй фæстæмæ ныййарджытæй лæвæрд уыд. Горæтгæрон районы милицæйы йæ бæрнон куысты Зассеты Хъазыбегæн уыд кад. Йæ разамонджытæ йын кодтой стыр аргъ. Æнгом æмæ хæларзæрдæйæ цард йе ‘мкусджытимæ, цæстуарзон хæлæрттимæ. Уыдонимæ æнæхин, æрыгон лæппу фидар къахдзæфтæй цыд йæ профессионалон куысты бæрзонддæр къæпхæнтæм.

Фæлæ, уастæн, цы загъдæуа хъысмæтæн… Низ, дам, адæймагмæ гæппæй лæууы… Цы ис фыднизы ныхмæ æрхъуыдыгæнæн?.. Æвæццæгæн Хуыцауæн йæхи æмгъуыдтæ фыст ис йæ боныджы…

Зассеты Иваны фырт Хъазыбеджы ацыд цардæй нызмæлын кодта къæдзæхтæ дæр, баззадысты зæрдæхæлд æмæ цæссыгкалгæйæ бинонтæ, хиуæттæ, къабæзтæ. Мысынц æй алы сахат, алы уысм дæр… Нал æрбахиздзæн къæсæрыл йæ хæдзармæ, нал бацин кæндзæн йæ уарзон кæстæртыл…

Хъазыбег ныууагъта йæ цыбыр царды хорз фæд æмæ рухс фарн. Уымæн цы нæ бантыстис, уый йæ рæсугъд кæстæртæн бантысæд. Хæрзаудæн сыл кæнæд сæ фыд. Хиуæттæ æмæ хæстæджыты номæй

БАГАТЫ Аврам

ОСТАВЬТЕ ОТВЕТ

Please enter your comment!
Please enter your name here