Йæ Ирыстоныл иузæрдион чи у, æрмæст уый архайдзæн дысвæлдæхтæй ахæм æфхæрæн ныхæсты фæстæ дæр, йæ адæмы хорздзинæдтæн йæ уд нывондæн хæсгæйæ

0
221

 

Республикæйы сæргъы БИТАРТЫ Вячеслав куы æрлæууыд, уæдæй нырмæ дзы цæхгæр цы ивддзинæдтæ æрцыд, уыдонæн нæ æвдисæн у алчидæр. Удуæлдайæ архайы, цæмæй адæмы цард фæхуыздæр уа. Æмбары сын сæ рис æмæ аразы йæ авналæнтæ æмæ йæ хъарутæ цас сты, уыйбæрц йæхиуыл нæ ауæрдгæйæ. Уымæн æвдисæн вæййæм, мах, журналисттæ, арæх йемæ кусæг балцы куы ацæуæм республикæйы районтæм, уæд

Иунæг дæнцæг нæ фæнды æрхæссын йæ æрвылбоны куыстæй. Мæздæгмæ кусæг балцы рæстæг, фылдæр æнтыстытæ саразын къухы бафта, зæгъгæ, райсомы авд сахатæй райдыдта районы ахсджиаг фарстатæ лыг кæнын, объекттыл зилын. Районы фæсхъæутæй иумæ куы бахæццæ стæм, уæд адæм йæ размæ рацыдысты. Се ‘хсæн лæдзджыты æнцæйттæй цы зæронд лæгтæ рацыд, уыдонæн йæ уындæй сæ рустыл згъордтой сæ цæссыгтæ, дæс æмæ ссæдз азмæ нæ Хиауадæй иу бæрæггæнæг нæ уыдис, ды та нæм ныр æртыккаг хатт æрцыдтæ, нуазыны дон нæм бауагътай, фæндæгтæ аразыс, зæгъгæ, æмæ йыл радыгай тыхстысты. Боны кæронмæ доны куыройау йæ куыстæй не ‘рынцад, иу хъæуæй иннæмæ, иу объектæй иннæмæ, æмæ, раст зæгъгæйæ, афтæ бафæллад, æмæ йæ бон ныхас кæнын дæр нал уыд. Журналисттæй ма фарстатæ кæмæ уыд, кусæг балцæн хатдзæгтæ кæныны фæдыл, уыдон дæр сæ нал сфæрæзтой. Фæлæ уæддæр нæ Сæргълæууæг хъуыддаг кæронмæ ахæццæ кодта æмбæлгæ уагыл. Уый æрмæст иунæг дæнцæг æрхастам Сæргълæууæджы цардæй, фæлæ ахæм у йæ куысты уаргъ æрвылбон — мыдадзын цырагъау судзы адæмæн хорздзинад хæссынæй, Ирыстоны фидæныл сагъæс кæнгæйæ.

Фæлæ адæмæн сæ сæрыл мыд куы ныккæнай, уæддæр иутæ дзурдзысты адджын у, иннæтæ та — маст у. Ныр дæр та Интернеты социалон хызæджы сцырен сты «Ирыстон ирвæзынгæнджытæ» æмæ сæ цъыфкалæн ныхæстæй ацæуæнтæ нал ис. Хъаугъа кæнынц цалдæр адæймаджы æмæ Сæргълæууæг цыфæнды хорз хъуыддаг куы саразы, уæддæр æй афтæ æрзылдтытæ кæнынц сæ мæнгæвзæгты руаджы æмæ йæ фæлдæхтæй рахæссынц адæмы размæ.

Бæргæ, ацы фарстайыл нæ дзурын куы нæ бахъуыдаид, фæлæ та нæ редакцийы телефонтæ сзынг сты. Боны тæвдæй нæ, фæлæ дзæнгæрджытæй. Адæм тыхстхуызæй фæрсынц, сывæллæтты хæдзар «Виктория»-йы тыххæй социалон хызæгтæ Фейсбук æмæ Телеграммы цытæ фыссынц, уыдон æцæг сты? Битарты Вячеслав уыцы цардæфхæрд сывæллæтты сæ цæрæн бынатæй æцæг æрвиты? Ам нæ «алцызонаг» «Ирыстон ирвæзынгæнджытæ» бакуыстой, куыд не ‘мбæлы, афтæ «бæстон». Бæстон хъуыдыгæнæг ахæм ныхæстыл не ‘ууæнды æмæ сæм йæ хъус дæр не ‘рдары, фæлæ разындис, сæ хызы чи бахауд, ахæмтæ.

Куыд тагъд нæ æрбайрох сты йæ хорз хъуыддæгтæ? Ау, кæд нæ Сæргълæууæг ахæм дурзæрдæ у, æмæ куыд зæгъынц, афтæмæй сидзæртыл дæр нал ауæрды, уæд Мæздæджы сидзæрдоны сывæллæтты уыцы æдзæллаг уавæрты афæдз размæ куы ныййæфта, уæд зæрдæдзæф куы фæцис æмæ сæ Дзæуджыхъæуы сывæллæтты хæдзар «Хуры тын»-мæ æвæстиатæй куы ласын кодта. Куы йын загътой, сидзæртæй кæмæндæрты Мæздæджы хиуæттæ цæры æмæ сæ куы аласат, уæд се ‘хсæн уыцы бастдзинад хæлгæ кæны, уæд сæ уавæры бацæугæйæ, йæхицæн бынат куы нæуал ардта, æмæ сын йæхи хардзæй Мæздæджы астæу æртæуæладзыгон егъау хæдзар куы балхæдта, æппæт хъæугæ уавæртæ дæр сын дзы саразгæйæ, уæд ныр та сывæллæтты тæригъæды бацыд? Цымæ цæмæн стæм ахæмтæ? Уæвгæ, Интернеты активон архайджытæй Битары-фырты куыстæн аргъгæнджытæй иу раст хъуыды загъта: «Битарты Вячеслав ракы ныхмæ хос куы самал кæна, уæддæр иутæ цин кæндзысты, иннæтæ та зæгъдзысты, æмæ æндæр ницы хъуаг стæм, æндæр ахсджиагдæр хъуыддæгтæ республикæйы нæй, зæгъгæ».

Цæвиттон, сывæллæтты хæдзар «Виктория»-йы бæстыхай хъæугæ домæнтæн дзуапп кæй нал дæтты, уый тыххæй дзы цы сывæллæттæ ис, уыдоны цæрæнбынат раивдзысты сывæллæтты хæдзар «Хуры тын»-ы бæстыхаймæ. Цы ма уа хуыздæр, сывæллæтты кæлæддзæгтæй ног цалцæггонд бынæттæм рахонынæй. Фæлæ та ам дæр «Ирыстон ирвæзынгæнджытæ» цъиувæдис систой, хъуыддæгтæ иннæрдæм æрзылдтой, уым дам уæлдæф чъизи у, сывæллæтты кæдæм хонут, зæгъгæ. Йæ саразынæй абонмæ «Хуры тын» уыд ацы бынаты. Йæ алыварс — æнæхъæн цæрæццаг район, бирæуæладзыгон хæдзæрттæ, гыццыл фалдæр — зæхбын хæдзæрттæ, иннæрдыгæй — республикæйы Центрон клиникон рынчындон. Цæмæ ис фау æрхæссæн? Ницæмæ! Зæгъынц, сывæллæтты хæдзар «Виктория»-йы бæстыхай ныридæгæн ныууæй кодта Битары-фырт. Гæды ныхæстæ! Сывæллæтты хæдзар «Виктория» ис республикæйы исбонады. Уымæн бæстон дзуапп дæлдæр ратдзысты бæрнон адæм. Ам, æвæццæгæн, ныхас цæуы, сывæллæттæн цалынмæ хи бæстыхай ссарой, уæдмæ рæстæгмæ цы хæдзары уыдысты æхсæв, ууыл. Уыцы хæдзарæн æцæг, ис хицау, æмæ йæ цæрæнбон бирæ, сывæллæтты æдзæллаг уавæртæ уынгæйæ сæ фарсмæ кæй балæууыд, уый тыххæй. Ацы дам-думтæн абон, чи зоны, æмæ бынат нæ уаид, афойнадыл-иу адæммæ раст информаци куы хæццæ кæнид, уæд. Растдæр уаид, республикæйы цæрджытæм цыфæнды хъуыддаджы фæдыл дæр цы дызæрдыггаг хъуыдытæ сæвзæры, уыдон фехъусгæйæ-иу, цы министрадтæм хауынц, уыдон сæм афойнадыл сæ хъус куы ‘рдариккой æмæ дзыллон хабархæссæг æппæт фæрæзты руаджы адæммæ хъуыддаджы фæдыл раст информаци куы хæццæ кæниккой, уæд.

Фыццаг куы æрбайхъуыстысты ацы æнахъола ныхæстæ, уæд «Рæстдзинад»-ы кусджытæ æвæстиатæй бадзырдтой республикæйы Ахуырад æмæ наукæйы министрадмæ, цæмæй нæм цы фæрстытæ сæвзæрд, уыдонæн дзуапп радтой æмæ сæ ныммыхуыр кæнæм, уый тыххæй. Абон дæр ма сæ æрвитынц! Уæдмæ та нæ «Ирыстон ирвæзынгæнджытæ» сæ удæй арт цагътой, Битары-фырты дзы куыд «рæсугъддæр» æмæ «æназымджындæрæй» равдисой, ууыл. Æмæ сын æнтысгæ дæр бакæны, ахæм «коммæгæс» хъусджытæ сын куы вæййы, уæд! Уæдæ ныл цымæ цы ‘рцыд, цæуылнæ уал зонæм хорз адæймаджы æвзæрæй, хæрзгæнæджы фыдгæнæгæй иртасын?! Республикæ бирæ азты йæ мидбынаты цоппай кодта, йæ рæбыны сом нал баззад æмæ æхцайы хæсты бын фæцис. Дæс æмæ дыууисæдз азмæ нæм нæдæр клубтæ арæзт цыд, нæдæр спортивон комплекстæ, скъолатæ, рæвдаундæттæ. Акæсут-ма абон, цас арæзтадон куыстытæ цæуы республикæйы. Æмзиууонæй архайынц министртæ, Сæргълæууæджы ныхасыл дыууæ нæ зæгъгæйæ.

Йæ Ирыстоныл иузæрдион чи у, æрмæст уый архайдзæн дысвæлдæхтæй ахæм æфхæрæн ныхæсты фæстæ дæр, йæ адæмы хорздзинæдтæн йæ уд нывондæн хæсгæйæ.

 

ТЕДЕТЫ Руслан, Республикæ Цæгат Ирыстон-Аланийы исбонады ахастдзинæдты министр

Министры ныхасмæ гæсгæ, сывæллæтты хæдзар «Виктория» йæ арæзтæдтæ æмæ йæ алфамбылай зæххытимæ ахсы гектары æмбисæй фылдæр хай, æдæппæт йæ иумæйаг фæзуат у 1012 квадратон метры. Абон уыцы зæххы хаймæ ничи ницы бар дары, никæмæн дзы у йæ бон пайда кæнын, республикон исбонадмæ кæй хауы, уымæ гæсгæ. Ацы зæххы хай фидаргонд у республикæйы паддзахадон исбонады æмæ йæм паддзахад йеддæмæ мур дæр ничи ницы бар дары.

Паддзахадæй та цæмæй исбонад рахицæн кæнай, уый тынг вазыгджын хъуыддаг у. Йæ рахицæн кæныны, кæнæ йæ хицæн адæймæгтæн ауæй кæныны нысан, Тедеты Русланы хъуыдымæ гæсгæ, нæй нæдæр республикæйы Исбонады ахастдзинæдты министрадмæ, нæдæр республикæйы Хицауадмæ.

 

Иринæ АЗИМОВА, Республикæ Цæгат Ирыстон-Аланийы ахуырад æмæ наукæйы министр

Сывæллæтты хæдзар «Виктория»-йы цæрыны зын æмæ æвадат уавæртыл дзургæйæ, министр бафиппайдта, зæгъгæ, Уæрæсейы Федерацийы разамынды уынаффæ æмæ амынддзинæдтæ æххæст кæнгæйæ, республикæйы разамынд дæр архайы сывæллæтты цард æмæ ахуыры уавæртæ фæхуыздæр кæныныл. Уымæ гæсгæ, сывæллæтты хæдзар «Виктория»-йы сабитæ сывæллæтты хæдзар «Хуры тын»-имæ куы баиу кæной, уæд уыдзæнис тынг хорз хъуыддаг. Фыццаджыдæр, уымæй æмæ «Хуры тын»-ы ис æппæт уавæртæ дæр цæрынæн дæр, ахуырæн дæр æмæ фæллад уадзынæн дæр. Кæй зæгъын æй хъæуы, «Виктория»-йы æппæт кусджытæн «Хуры тын»-ы бынæттæ нæ разындзæн, фæлæ сывæллæттæ цы хъомылгæнджытыл сахуыр сты, уыдон сæ куыст кæндзысты дарддæр дæр.

 

КОКАЙТЫ Артур, Цæгат Ирыстон-Аланийы Сæргълæууæджы цур сывæллæтты бартæ хъахъхъæнæг

Кокайы-фырт куыд радзырдта, афтæмæй «Виктория»-йы хæринаггæнæн цы агъуысты ис, уæлдайдæр та сывæллæтты хæдзармæ ницы бар дары, уым тынг тæссаг у сывæллæттæн хойраг цæттæ кæнгæйæ исты æбуалгъ низыл фæхæст уæвынæй.

Сывæллæттæн цæттæ хæринаг кæрты къуымты сæдæгай метртæ ласын хуымæтæг лæгуæрдоны дæр цас сыгъдæгдзинадыл дзурæг у. Ахæм уавæрты сабиты дарддæр дарæн нæй. «Хуры тын» та у ног цалцæггонд, ис дзы хорз спортивон æмæ фæлладуадзæн фæзтæ. Сывæллæттæ фынæй кæм фæкæнынц, уыцы уæттæ сты рухс æмæ райдзаст. Зæрдæ рухс кæны сæ фыццаг бакастæй дæр, сабиты миддунейы æнкъарæнтæн та ахæм хъуыддæгтæ фæстаг не сты. «Хуры тын» ма хорз уымæй у, æмæ адæмæй иппæрд нæу, йæ алыварс иууæладзыгон æмæ бирæуæладзыгон хæдзæртты цæрджыты сабиты кæй уындзысты, уый дæр сывæллæттæн æвдадзы хос у.

КАСАТЫ Батрадз, ХЕТÆГКАТЫ Оксанæ

 

ОСТАВЬТЕ ОТВЕТ

Please enter your comment!
Please enter your name here