Цæгат Кавказы федералон зылды рæзты фарстатæ

0
116

 

УФ-йы премьер-министр Дмитрий МЕДВЕДЕВ сарæзта Цæгат Кавказы федералон зылды райрæзты фарстаты фæдыл хицауадон къамисы радон æмбырд. Цæгат Кавказы регионты иннæ сæргълæуджытимæ фембæлды архайдта РЦИ-Аланийы Сæргълæууæг БИТАРТЫ Вячеслав дæр

Уый тыххæй фехъусын кодта Цæгат Ирыстоны Сæргълæууæджы æмæ Цæгат Ирыстоны Хицауады пресс-службæ.

Æмбырды архайдтой æмæ боны фæткы фарстаты фæдыл сæ хъуыдытæ загътой УФ-йы Хицауды Сæрдары хæдивæг Виталий Мутко, Цæгат Кавказы хъуыддæгты фæдыл министр Сергей Чеботарев, йæ фыццаг хæдивæг Одес Байсултанов, Уæрæсейы Федерацийы Æххæстбарджын минæвар Цæгат Кавказы федералон зылды Александр Матовников, федералон министрадтæ æмæ ведомствоты разамонджытæ.

Фембæлды райдайæны Дмитрий Медеведев куыд фæнысан кодта, афтæмæй 2017 азы Цæгат Кавказæн лæвæрд æрцыд фыццаградон райрæзты территорийы статус. Уыцы уагæвæрд домы, цæмæй цæттæгонд æрцæуой федералон зылды регионты райрæзты дæлпрограммæтæ (уыдон хъуамæ суой сæрмагонд паддзахадон программæты хæйттæ). Премьер-министры ныхасмæ гæсгæ, Цæгат Кавказы федералон зылды социалон-экономикон райрæзтæн ахъазгæнæг проекттæ æххæстгонд цæудзысты 22 сæрмагонд паддзахадон программæйы фæлгæты. Уыимæ, уыцы инвестицион проекттæ æххæст кæнынæн бахъæудзæн фылдæр финансон фæрæзтæ.

— Сæйрагдæр нысан у адæмы цард хуыздæр æмæ фæрныгдæр кæнын. Цæмæй уый къухы бафта, уый тыххæй бæстон æмæ ахсджиаг уынаффæтæ рахæссын хъæуы. Æппæт лыггæнинаг фарстатæ æмæ хъуыддæгтæ дæр хъуамæ бæстон хыгъд æрцæуой, фыццаградон проектты пълантæ аразгæйæ. Ахуырады объектты арæзтад, наукæ æмæ культурæйы райрæзт, æппæт иннæ ахсджиаг фарстатæм дæр хъуамæ уа иудадзыг æмæ бæрнон цæстдард, — загъта Дмитрий Медведев.

Боны фæткы фарстатыл æрдзурыны фæстæ къамисы уæнгтæ сфидар кодтой бæлвырд уынаффæтæ.

Æмбырды фæстæ Битарты Вячеслав куыд радзырдта, афтæмæй Цæгат Кавказы федералон зылды регионты сæргълæуджытæ æмæ федералон министрты размæ æвæрд æрцыдысты бæлвырд нысантæ. Уыдоны нымæцы: адæмы кæлæддзаг хæдзæрттæй ног цæрæнуæттæм раивын, ахуырадон кусæндæтты архайд хъомысджындæр кæнын æмæ афтæ дарддæр.

— Нæ республикæйы уыцы фарстатыл бæлвырд куыст цæуы, фыццаджыфыццагдæр, сбæрæг кодтам уыцы кусæндæтты уавæр, алы ран дæр нысангонд æрцыдысты бакæнинаг фыццаградон хъуыддæгтæ. Фæстаг азты стырдæр æргом аздæхтæуыд ахуырадон æмæ æндæр социалон объектты бындурон цалцæг æмæ арæзтадмæ. Зæгъæм, ныртæккæ фарста æвæрд цæуы, цæмæй республикæйы ахуырады къабазы саразинаг объектты зынгæ хай бахæссой сæрмагонд федералон программæтæм, — бафиппайдта Битарты Вячеслав.

Цæгат Ирыстоны Сæргълæууæджы ныхасмæ гæсгæ, дарддæр архайд цæуы хæххон-рекреацион комплекс «Мамысон»-ы проектыл. Ацы фарстайы фæдыл бæлвырд бадзырдтæ ис профилон федералон министрадтимæ. Ныртæккæ цæттæгонд цæуы хъæугæ нормативон-барадон документаци, цæмæй фидæны курортæн лæвæрд æрцæуа сæрмагонд экономикон тæлмы статус.

Нæ уацхæссæг

ОСТАВЬТЕ ОТВЕТ

Please enter your comment!
Please enter your name here