Йæ зæрдæ уыд «Рæстдзинад»-ы

0
94

 

Дыууиссæдз боны рацыд, йæ царды азтæй дæс æмæ дыууиссæдзæй фылдæр журналистикæйæн чи снывонд кодта, уый — Таутиаты Умар йе ‘нусон дунейыл куы сæмбæлд, уæдæй нырмæ. Астæуккаг скъолайы фæстæ 1953 азы Цæгат Ирыстоны Хетæгкаты Къостайы номыл паддзахадон педагогон институты историон-филологон факультет æнтыстджынæй каст куы фæци, уæд æй кусынмæ райстой газет «Рæстдзинад»-ы редакцимæ. Райдыдта дзы газетуадзæгæй кусын, уыд писмоты хайады литературон кусæг, газеты сæрмагонд уацхæссæг. «Рæстдзинад»-ы фондз азы бакусыны фæстæ Таутиаты Умары 29-аздзыдæй снысан кодтой Горæтгæрон районы газет «Сталинец»-ы (фæстæдæр «Ленинское знамя», ныры «Фидиуæг») редакторæй. Афæдзы фæстæ ногæй æрбаздæхт «Рæстдзинад»-мæ. Дыууæ азы та бакуыста газеты сæрмагонд уацхæссæгæй. 1961 азы йæ партийы Цæгат Ирыстоны обком арвыста Мæскуымæ СЦКП-йы ЦК-йы цур уæлдæр партион скъолайы журналистикæйы хайады ахуыр кæнынмæ. Каст æй куы фæци, уæд, 1963 азы, кусын райдыдта Цæгат Ирыстоны АССР-йы Министрты Советы радиохъусынад æмæ телеуынынады комитеты политхъусынады хистæр редакторæй. 1964 азы Кировы районы газет «Размæ»-йы редакторы бынат куы суæгъд, уæд партийы райком æхсызгонæй сразы газеты редакторæй сæхи районы минæвары снысан кæныны тыххæй партийы обкомы фæндоныл. Авд азæй фылдæр районы газеты редакторæй бакусыны фæстæ Таутиаты Умар ногæй, ныр æртыккæгæм хатт, æрбаздæхт «Рæстдзинад»-ы редакцимæ. Уыд хистæр литературон кусæг, фæстæдæр та йæ партийы обком сфидар кодта æппæты бæрнондæр хайад — партион хайады сæргълæууæгæй. Дæс азы бæрц дзы бакуыста æнтыстджынæй, стæй йæ партийы обком аивта республикæйы паддзахадон телерадиокомпани «Алани»-мæ, æмæ дзы фæкуыста цыппар æмæ ссæдз азы, уыдонæй фараст азы — «Алани»-йы сæрдары хæдивæгæй. Ивгъуыд æнусы нæуæдзæм азты уыд телеуынынады комментатор, стæй та уацхæссæг. Газет «Рæстдзинад»-ы æмæ телеуынынады кусгæйæ, Умарæн йæ уд, йæ дзæцц уыдис йæ райгуырæн хъæу Заманхъулмæ æмæ Ирыстоны æндæр хъæутæм ауайын, адæмимæ аныхас кæнын, сæ хъуыдытæ æмæ сагъæстæ сын рæгъмæ рахæссын. Канд нæ сæйраг горæты нæ, фæлæ республикæйы иннæ горæтты æмæ хъæуты дæр ын уыдис бирæ зонгæтæ, хæлæрттæ. Абон бинонтæ, хæстæг хиуæттимæ уыдонæй дæр бирæтæ æрбамбырд уыдзысты Таутиаты кæртмæ, Доваторы проспекты æвдæм хæдзармæ æмæ рухсаг зæгъдзысты Умарæн йæ дыууиссæдзæм боны кæнды. Дзæнæты бад, Умар. Хæрзаудæн кæн дæ бинонтыл, дæ кæстæртыл, сыхбæстæ æмæ хъæубæстыл, дæ уарзон Ирыстоныл.

БАГАТЫ Аврам

ОСТАВЬТЕ ОТВЕТ

Please enter your comment!
Please enter your name here