Уæлæуыл баззад йæ фарн

0
57

 

Змейкæйаг Дзебысаты Дмитри (Витя) Адзейы фырты рухс ном мысгæйæ фыссын ацы рæнхъытæ, нал ис не ‘хсæн… Куыд зын у ивгъуыд афоны Дмитрийы тыххæй дзурын. Кæм ис ссарæн уый аккаг дзырдтæ? Дыууиссæдз боны рацыд, не ‘хсæнæй нæ буц хистæр куы фæхъуыд, уæдæй. Бинонты рæбинаг цæджындз, разагъды хистæр, нæ куырыхон зондамонæг.

Адæймаджы царды бонтæ, цас фæцард, уымæй баргæ не сты, фæлæ, йæ фæстæ цы фæд ныууагъта, уымæй. Фыдæбонджын лæг уыд Дмитри. Фос уарзта йæ сабибонтæй æмæ уыдонимæ кусынæн снывонд кодта йæ цард æгасæйдæр Змейкæйы Ленины номыл колхозы. Цыфæнды ахуыргонд лæгæй арæхстджындæр уыд, кæд сæрмагонд ахуыр нæ райста фосдарынады, уæддæр. Йæ хъæппæрисджын æмæ хъазуатон фæллойæн ын аргъ скодтой хицауад. Бирæ хæрзиуджытæ æмæ кады нысантæй æрцыд хорзæхджын. Уæдæ сыхбæсты æмæ хъæубæсты дæр тынг кадджынæй фæцарди Дмитри. Кæрдзындæттон, уазæгуарзон кæй уыд, уый тыххæй йын уæлдай аргъ кодтой адæм.

Фæзæгъынц, цæрæг удæй æназым нæй, фæлæ Дмитрийы чи зыдта, уыдон се ‘ппæт дæр æмдзыхæй дзурынц, ацы Хуыцауысконд адæймаг ирон лæгæн кадгæнæг миниуджытæй æххæст уыд, зæгъгæ. Никуы никæй бафхæрдта суанг дзыхы ныхасæй дæр, никæй зæрдæхудт райста, æнæхин, рæстудæй фæцард хиуæттæ æмæ хъæубæсты ‘хсæн.

Сыгъдæгзæрдæ, фендджын, æгъдауджын лæг, кæ- цы йæ царды мидæг сæйраг- дæрыл нымадта хъæрмудæй цæрын, йæ кæстæрты кæ- рæдзийыл бæттын, цæмæй æнгомæй цæрой, царды гуыргъахъхъ фæндæгтыл ма ныдздзæгъæлтæ уой. Сæ куырыхон хистæры зондамындтытæ æмæ фæдзæхстытæ æххæст кодтой кæстæртæ, никуы рох кодтой сæ фыды зондамынд: «Æгъдау æппæт хæрзты сæр у».

Ныр уыцы кæстæртæ сты сыхы æмæ хъæубæсты фидыц æмæ ныфс, бахъуаджы рæстæг адæмы æнцой балæууынмæ, се ‘ххуысы къух бадарынмæ цæттæ сты кæддæриддæр. Уый уæлдай тынгдæр рабæрæг, Дмитри ацы дунейæ куы фæхъуыд, уæд йæ зианы бон. Дзебысаты кæртмæ уыйбæрц адæм æрцыд, æмæ сыл цæст не ‘ххæссыд.

Адæмы зæрдæ тынг фæрыст Дмитрийыл, кæд цардхъуагæй нæ ацыд не ‘хсæнæй, уæддæр. Йæ цардвæндаг дæнцæгæн ныууагъта, чи йæ зыдта æмæ уарзта, уыдонæн. Разæнгард сæ кæндзæн рæстудæй цæрынмæ, куыстуарзаг уæвынмæ, адæ- мæн лæггад кæнынмæ.

Мæн раарфæ кæнын фæнды не ‘мхъæуккæгтæн. Иунæг Стыр Хуыцауы арфæйæ хайджын уæнт, Дзебысаты бинонты фарсмæ сæ зыны сахат чи ‘рбалæууыд, йæ сыгъдæг цæссыг чи нæ бавгъау кодта, уыдон се ‘ппæт дæр. Амондджын æмæ фæрнджын уæнт, зындзинад æмæ низтæй хызт. Хуыцауы цæст сын бауарзæд, сæ кæстæрты цинæй æфсæст куыд уой, ахæм амонд. Уæлдай бузныг мæ фæнды зæгъын сыхбæстæн. Сымах, уырдыг лæугæйæ, фæлæггад кодтат Дзебысаты бинонтæн. Арфæгонд ут Иры зæдтæ æмæ дзуæрттæй. Уæ хæдзæрттæй æрмæстдæр цины зæлтæ куыд хъуыса кæддæриддæр, ахæм арфæ уын ракæнæд Стыр Хуыцау.

Хиуæтты номæй сиахс ЦОРÆТЫ Майрæм

ОСТАВЬТЕ ОТВЕТ

Please enter your comment!
Please enter your name here