Уæрæсейы регионты райрæзты фарстатæ

0
162

Цæгат Ирыстоны Сæргълæууæг БИТАРТЫ Вячеслав архайдта Регионалон райрæзты фарстаты фæдыл федералон къамисы радон æмбырды. Фембæлды сæрдариуæг кодта Уæрæсейы Хицауады Сæрдары хæдивæг Виталий МУТКО.

Уый тыххæй фехъусын кодта РЦИ-Аланийы Сæргълæууæджы æмæ РЦИ-Аланийы Хицауады пресс-службæ. Æмбырды рæстæг къамисы уæнгтæ бæстон æркастысты федерацийы регионты дарддæры социалонэкономикон рæзты фарстатæм. Уыдоны нымæцы: бæстæйы субъектты бюджеттæн федералон дотацитæ дих кæнын, хъалонтæ фидыны уагæвæрды иуæй-иу льготæтæ нысан кæнын, регионты архайд ног национ проектты, историон бынæтты райрæзт æмæ афтæ дарддæр.

Виталий Мутко йæ раныхасы куыд фæбæрæг кодта, афтæмæй дыууæ мæйы æмгъуыдмæ хъуамæ фидаргонд æрцæуой 12 ног национ проектты концепцитæ. Уыцы документтæ арæзт æрцæудзысты Уæрæсейы Президенты 2018 азы майы Указты бындурыл æмæ сæ сæйрагдæр нысан уыдзæн федерацийы регионты дарддæры райрæзт.

— Кæй зæгъын æй хъæуы, национ проекттæ æмæ регионты социалон-экономикон рæзты программæтæ æппæт лыггæнинаг хъуыддæгтыл нæ аххæсдзысты. Уыцы æууæл хынцгæйæ, бæстон æрдзурын хъæуы, социалон-экономикон райрæзты мадзæлттæ æххæст кæнынæн уæлæмхасæн цы 8 триллион сомы нысангонд цæуы, уыдон дихгонд куыд æрцæудзысты, ууыл, — загъта УФ-йы Хицауады Сæрдары хæдивæг.

Федералон министрадтæ æмæ ведомствоты минæвæрттæ, стæй регионты разамонджытæ сæ хъуыдытæ загътой æмæ фæндæттæ бахастой фидæны национ проектты бындурты фæдыл. Æмбырды рæстæг куыд фæбæрæг кодтой, афтæмæй 2018 азы 1 октябры онг национ проектты бындурон уагæвæрдтæ хъуамæ уой цæттæ.

Къамисы æмбырды фæстæ Битарты Вячеслав куыд фæнысан кодта, афтæмæй регионтæ алкæддæр сæхиуыл æнкъарынц федералон центры аудындзинад. «Ног национ проекттæ дæр суыдзысты регионтæн æххуысы ноджыдæр ма иу мадзал. Мæ зæрдæ дарын, уыцы программæты фæрцы Цæгат Ирыстоны социалонэкономикон рæзт æнтыстджындæр кæй уыдзæн, ууыл», — бафиппайдта РЦИАланийы Сæргълæууæг.

Нæ уацхæссæг

ОСТАВЬТЕ ОТВЕТ

Please enter your comment!
Please enter your name here