Хистæры сагъæстæ

0
122

 

Хæмыцаты Раманы уацхъуыд «Адæм цы æгъдауыл хæст уой, уый хъуамæ æххæст кæной иууылдæр иумæ”, мыхуыры рацыд «Рæстдзинад»-ы 112-æм номыры, 3 июлы. Уый фæдыл у мæ ныхас.

Раман йæ уацхъуыды фыссы: «Ацы темæйыл ма амæй размæ цыд ныхас газет «Рæстдзинад»-ы, æмæ мæнмæ афтæ каст, цыма фарста кæронмæ лыггонд æрцыд, æгъдау, куыд æмбæлы, афтæ йæ гаччы сбадт, æмæ йыл гуызавæ ничиуал кæндзæн, фæлæ, куыд рабæрæг, афтæмæй йæ Ботъоты Æхсар фæстæмæ сног кодта». Ныхас цæуы, зианы уæлхъус чи дзура, уый хъуамæ йæ худ сиса æви ма сиса, ууыл.

Раман, бахатыр кæн, фæлæ, мæнмæ гæсгæ, Æхсар худ исыны тыххæй раст хъуыды кæны. Афтæ ничи зæгъы, мардмæ цæуын хъæуы æнæ худæй, зæгъгæ, кæнæ, кæугæ куы цæуай мæрдджынты хæдзармæ, уæд дæ худ сисай. Ныхас цæуы, марды уæлхъус чи дзура, æрцæуæг адæмæн арфæ чи кæна, æрмæстдæр уыдоны тыххæй, æрцæуæг адæмæн та арфæ ракæнын æнæмæнг хъæуы.

Раман, Æрыдоны куы уай, уæд Æрыдоны горæты музеймæ бацу æмæ дзы фендзынæ 1879 æмæ 1908 азты ист къамтæ. Фыццаг къамы Хапсæты Дзегкайы зиан (1879 аз), дыккаг къам — Саламты Хъазмæхæмæты зиан (1908 аз), дыууæ хуызисты дæр æртыгай нæлгоймæгтæ лæууынц зианы уæлхъус, сæ худтæ ист, афтæмæй, сылгоймæгтæ та хъуырæхгæд дзаумайы, кæлмæрзæнтæ сæ сæрыл, афтæмæй.

Тугъанты Махарбеджы ныв «Бæхфæлдисын» у къухæй конд ныв, хуызист, къам нæу, æмæ уый ацы ран дæнцæгæн нæ хъæуы хæссын. Кæнæ дæ фиппаинаг — бæхфæлдисæг идоныл нæ хæцы, фæлæ идоны рохтыл. Цы уæлдай у, къухыл хæцай æви цонгыл хæцай?

Дæумæ афтæ кæсы, марды уæлхъус куы дзурай, уæд худ исын не ‘мбæлы, зæгъгæ, мæнмæ та афтæ кæсы — марды уæлхъус дзурæг лæг йæ худ куы нæ сиса, уæд уый аргъ нæ кæны æппæты фыццаг мардæн, уый фæстæ та æрцæуæг адæмæн. Фыдæлтæй баззад, мæнæ ма дын мæ худ дæр исын, зæгъгæ, уæд æрцæуæг адæмæн арфæ кæныс, дæ худ сын ма сис, афтæмæй, уый цавæр ирон æгъдау у?

Марды уæлхъус чи дзура, уый хъуамæ лæууа мардæн йæ сæры ‘рдыгæй, гæнæн куы уа, уæд галиу фарс. Хæдзары æвæрд куы амона, уæд мардæн йе ‘ргом хъуамæ уа хурыскæсæны ‘рдæм. Чи дзура, уымæй хъуамæ адæм ма стыхсой йæ бирæ дзырдæй, йæ дæлæ-уæлæ ныхæстæй.

Зианы фынгыл раздæр æртæ чъирийы æрæвæрæм æмæ Хуыцаумæ скувæм, зæгъгæ, чи зæгъы, уый раст нæу. Мах Хуыцаумæ нæ кувæм зианы фынгыл, фæлæ фæдзæхсгæ кæнæм нæ зиан Хуыцауыл, æмæ фынгыл хъуамæ уа дыууæ чъирийы. Фыццаг рæгъæн фæзæгъæм афтæ: нæ зиан дæр æмæ нæ цин дæр Хуыцауы уазæг уæд, æмæ ууыл Хуыцауы номард ахицæн вæййы. Дыккаг рæгъæй фæзæгъæм рухсаг мардæн æмæ йын ныххæлар кæнæм, фынгыл цыдæриддæр уа, уыдон.

Ацы аз газет «Рæстдзинад»-æн у йæ юбилейон аз æмæ мæ уый фæдыл фæнды зæрдиаг арфæтæ ракæнын редакцийы кусджытæн! Газет «Рæстдзинад» нæ хистæр фæлтæртæн куыд зынаргъ уыдис æмæ йыл куыд æнувыд уыдысты, мах фæстæ цы фæлтæртæ уыдзæн, уыдонæн дæр уарзон газет куыд уа, уый иунæг Стыр Хуыцауы бафæндæд. Алы ирон бинонтæ куыд исой «Рæстдзинад», уый сын фæдзæхсын!

 

ТЕДТОЙТЫ Ладемыр

ОСТАВЬТЕ ОТВЕТ

Please enter your comment!
Please enter your name here