Дыууæ радæй

0
249

 

Фæстаг азты хуыздæр цæстдард ис Цæгат Ирыстоны фæндæгтæм. Иутæм дзы зылд цæуы республикон кæнæ бынæттон фæрæзтæй, уæлдай ахсджиагдæр та махæн сты федералон фæндæгтæ. Уымæн æмæ нæ республикæ иу кæнынц канд Уæрæсейы Федерацийы æндæр регионтимæ нæ, фæлæ ма бирæ фæсарæйнаг бæстæтимæ дæр.

 

Ахæм фæндæгты къордмæ хауы Дзæуджыхъæуæй Алагирмæ фæндаг дæр. Арæзт æрцыд ивгъуыд æнусы 60-æм азты райдайæны. Уæдæй нырмæ чысыл рæстæг нæ рацыд, æмæ ныр фендæрхуызон сты фæндæгты арæзтады канд техникон домæнтæ нæ, фæлæ ма æрмæджытæ дæр. Уымæ гæсгæ иудадзыг зылд цæуы фæндагмæ. Фæстаг азты цæугæдæтты сæрты бындурон хидтæ арæзт æрцыд Джызæлы, Майрæмададжы. Дзуарыхъæуы æмæ Суададжы.

Ай-гъай, ацы куыстытæ фаг не сты, цæмæй Дзæуджыхъæуæй Алагирмæ фæндаг дзуапп дæтта транспорты змæлды нырыккон домæнтæн. Уымæ гæсгæ Фæндæгты управлени «Цæгат Кавказ»-ы разамонджыты хъæддых архайды руаджы къорд азы размæ «Росавтодор» уынаффæ рахаста Дзæуджыхъæуæй Алагирмæ фæндаг кæрæй-кæронмæ — æдæппæт 35 километры æмæ 500 метры рацаразыны тыххæй. Фæлæ ахсджиаг куыст азæй-азмæ къуылымпы кодта, арæзтадæн æхцайы фæрæзтæ кæй нæ уыдис, уый тыххæй. Æрмæстдæр ивгъуыд азы фезмæлыд хъуыддаг йæ бынатæй. Уæд Джызæлы зиллаккæй суанг Горæтгæрон районы арæнмæ фæндаг æрцыд рацарæзт, æмæ ныр ауылты куы фæцæйцыдыстæм, уæд нæм фæкаст фынджы хуызæн лæгъз, дыууæрдæм ыл хæдтулгæтæ цыдысты æнæкъуылымпыйæ.

Хæтæлдонæй дарддæр куы бауадыстæм, уæд бахæццæ стæм, цæугæдон Хæтæлдоны сæрты хид кæм цалцæг кæнынц, уырдæм. Машинæтæ дыууæрдæм цыдысты йæ иу хайыл, иннæуыл та аразджытæ кодтой фидаргæнæн куыстытæ.

— Мах стæм æнæххæст бæрнондзинады æхсæнад «Хуссайраг арæзтадон компани»-йы кусджытæ», — загъта бригадир Самат Магрелов. — Ныронг уал хидæн цалцæггонд фестæм йæ иу хай, ныр та архайæм иннæ хай цалцæг кæныныл. Æдзухдæр сæ куысты фæзминаг сты монтажгæнджыт æ — бетонгæнджытæ Хасанби Шкахов, Измаил Бидтцеров, Руслан Фриев, Хасан Гудзиев æмæ иннæтæ.

Куыд базыдтам, афтæмæй, машинæтæ кæуылты цæудзысты, хиды уыцы хай уæрæхдæргонд æрцæудзæн 18 метры онг, йæ дæргъ та уыдзæн 15 метры. Хид фидардæр цæмæй уа, уый тыххæй арæзт æрцыд, йæ дæргъ 27 метры кæмæн у, ахæм æнцайæн къул. Цалцæггæнæн куыстытæ ныронг куыд цыдысты, уый тыххæй та нын бæлвырддæр радзырдта экскаватор «Хундай»-ыл кусæг Бутаты Марат.

— Ивгъуыд азы донивылдтытæ хид тынг бахъыгдардтой. Ивылд уылæнтæ хиды могортæ кæй бахордтой, уымæ гæсгæ нæ бахъуыд ног æфсæнбетон цæджындзтæ саразын. Уымæй уæлдай хиды бын ныкъкъахтам 300 кубометры, хицæн къæйтæ кæй ныссастысты, уый тыххæй та хид дыууæрдыгæй сыгъдæг кæнын бахъуыд. Æппæт куыстыты дæр нæ хуыздæр уынаффæгæнæг уыдис æнæххæст бæрнондзинады æхсæнад «Хуссайраг арæзтадон компани»- йы генералон директор Джыгкайты Руслан.

Ныртæккæ Дзæуджыхъæуæй Алагирмæ фæндагыл куы ацæуай, уæд дзы, алы куыстытæ кæнгæйæ, фендзынæ республикæйы алыхуызон организациты минæвæртты. Чи асфальт æвæры, чи бетон кæны æмæ зæхх къахы. Æнæххæст бæрнондзинады æхсæнад «Ирафтранстрой»-ы кусджыты та бордюртæ æвæргæйæ баййæфтам Суададжы хидæй чысыл фалдæр. Ныхас кодтам æхсæнады мастер Дадтеты Ацæмæзимæ. Куыд радзырдта, афтæмæй ацы куысты хорз кæмæн æнтысы, уыдон сты Камил Маратов, Шамшот Олипов, Батр Бахриев æмæ Шахер Бахребин. Суадагæй уæлдай, дам, бордюртæ сæвæрдтам Майрæмададжы дæр, ам фистæгæй цæуæн тротуар кæй аразæм, уый тыххæй. Цалынмæ мах мастеримæ ныхас кодтам, уæдмæ шофыр Бовыр Баритов бордюртæй дзаг гуыффæ æрхæццæ кодта Джызæлы хуырлыстæггæнæн куыстуатæй, æмæ йæ машинæ уæзисæн кранæй райдыдта æвдæлон кæнын.

Афтæ рæвдз цæуы, мастер Гуыриаты Батрадз разамынд кæмæн дæтты, уыцы фæндаггæнджыты куыст дæр. Ныр та уал уыдон æнхъæлмæ кастысты, Суададжы кæройнаг уынгмæ æввахс Саид Махмудов йæ экскаваторæй фæндаджы иуварс кæд ракъахдзæн, уымæ, цæмæй дзы æфсæн-бетон зиллаччытæ æрæвæрой, чысыл къанау дзы кæй цæуы, уый тыххæй.

Ай-гъай, мах базонын фæндыд фæндаг цалцæг кæныны æндæр куысты тыххæй дæр, æмæ уый фæдыл та ныхас кодтам мастер Айларты Таймуразимæ.

— Дзæуджыхъæуæй Алагирмæ фæндагæн нын ацы аз цы дæрддзæг сцалцæг кæнын хъæуы, уый у 23 километры æмæ 600 метры, — загъта уый. — Кæд раздæр йæ уæрх уыдис 11 метры æмæ æрдæг, уæд ныр та уыдзæн 12 метры. Уымæй уæлдай хъæуты мидæг фæндаджы уæрх фылдæргонд цæуы метр æмæ æрдæг. Йæ бæзн та раздæры хуызæн уыдзæн 11 сантиметры.

Дарддæр куы ацыдыстæм, уæд Ног Бирæгъзæнджы ракомкоммæ алыхуызон техникæ кусгæ федтам фæндагыл. Иутæ бульдозертæй фæндаджы фæйнæфæрстæ лæгъз кодтой, иннæтæ асфальт æвæрдтой, уæззауцалхджын катоктæ та хыссæйы хуызæн фæлмæн асфальт æфсæргæ кодтой. Мастер Ботъоты Руслан нын куыд загъта, афтæмæй фæндаджы асфальты фыццаг фæлтæр æвæрд фæвæййынц. Кæмæй раппæлыд, уыцы кусджытæ та сты асфальтæвæрæн машинæйыл кусæг Габолаты Зауырбег, кусджытæ Хæбæлаты Валикъо, Багаты Вадим æмæ Æлборты Мухри.

Арæзтадæй фæстæмæ куы здæхтыстæм, уæд нæ цæст æрхæцыд фæндаггæнджыты æндæр къордыл. Уыдон æвæрын райдыдтой асфальты дыккаг фæлтæр, æмæ уал фæндаджы иу уадздзаг асфальтæй бамбæрзтой Къодахджынмæ фæзилæны онг. Ам дæр та куыст цæуы æнæкъуылымпыйæ. Фæллойадон коллективтæ æнтыстджынæй архайынц, цæмæй Дзæуджыхъæуæй Алагирмæ фæндаг цалцæггонд æрцæуа ацы аз 30 ноябрмæ, æмæ уый сæ къухы бафтдзæн. Фылдæр хатт фæкусынц дыууæ радæй.

ТОХСЫРТЫ Къоста Къамтæ систа КЪÆБЫСТЫ Харитон

ОСТАВЬТЕ ОТВЕТ

Please enter your comment!
Please enter your name here