Æхсызгонæй йæ бакастæн

0
104

Газет «Рæстдзинад»-ы 4 августы номыры æхсызгонæй бакастæн æхсæнад «Иры Стыр Ныхас»-ы сæрдар Кучиты Русланы уац, «Уæ хорзæхæй, ма рæдийут!» Раст цыма Руслан мæ хъуыдытæ фыста. Æвæццæгæн, Ирыстоны ахæм адæймаг нæй, Руслан цы хъуыддæгтыл дзуры, уыдоныл чи нæ сагъæс кæны. Сагъæс кæнæм, фæлæ уæддæр нæфæндгæйæ æххæст кæнæм æрхъуыдыгонд æгъдæуттæ.

Русланы фиппаинæгтæм ма мæ фæнды бафтауын. Æз райгуырдтæн æмæ схъомыл дæн, ирон æгъдау хорз фæткыл æвæрд кæм уыдис, ахæм хъæу — Хъобаны. Мæ сабибонтæй фæстæмæ уыдтон æмæ хъуыстон, æгъдауæн дæр, ирон æвзагæн дæр бинонтæ, сыхæгтæ, хъæубæстæ цы стыр аргъ кодтой, уый.

Кæм ма ис ныр уæды æгъдау?! Уынджы фæцæйцæугæйæ дыл чидæр кæнæ йæхи скъуырдзæн, кæнæ дын дæ фындзы бын дæ фæндаг алыг кæндзæн.

Ног модæтæ бирæ! Сæ иу — æрыгон лæппу-фæсивæд фыддзыхæй кæй дзурынц, уый. Айфыццаг Дзанайы-фырты уынджы базарæрдæм фæцæйцыдтæн. Мæ фæстецæуджыты хъуыстон. Сæ иу ахæм æнæуаг дзыхæй дзырдта, æмæ мæ бафæндыд сæ фенын. Мæхи сындæгцæуæг акодтон, мæ разæй фесты фондз замманайы лæппуйы, æвæццæгæн, исты спортивон ерыстæй цыдысты. Уыцы фыддзых дарддæр дæр йæ «куыст» кодта: алы дзырды фæстæ дæр… Æз сæ баурæдтон æмæ сын бауайдзæф кодтон. Лæппутæ хатыр ракуырдтой æмæ æнæдзургæйæ ацыдысты. Алы хистæрæн дæр йæ хæс у, æрыгæттæ кæм рæдийой, уым сын сæ ных бакъуырын. Махæн, ирон адæмæн, нæ бæллæх уый мидæг ис, æмæ нæм иумæйаг æркаст нал ис нæ удварнмæ. Дихтæ стæм æвзагæй дæр, æгъдауæй дæр, динæй дæр. Æз иунæг дины ныхмæ дæр нæ дæн. Алкæй дæр, цы Хуыцауыл æууæнды, уый хорзæх уæд.

Ирон адæймаджы удыхъæд у аргæ æмæ æнаргæ. Нæ хуыздæр миниуджытæй иу у, бахъуаджы сахат Райгуырæн бæстæ бахъахъхъæнын.

Кучийы-фырт цины æмæ зианы хъуыддæгты фæдыл бæстон æрдзырдта. Чи зоны, бирæтæ мæ хъуыдыимæ разы нæ уыдзысты, фæлæ мæн фæнды, ирон чындзæхсæв, ирон чызгæрвыст ирон хæдзары куы кæниккам, уый. Кæй зæгъын æй хъæуы, цы бирæ дæсны ансамбльтæ нæм ис, уыдон рæсугъд цæгъдынц, рæсугъд зарынц. Фæлæ-иу куыд фидыдта ирон кæрты ирон хъазт. Фæндыр кæцыфæнды чызджы къухмæ дæр авæр, æмæ-иу ыл æрцагъта. Кафын дæр-иу фæсивæд хъазты базыдтой.

Уæдæ ног чындз йæ ног хæдзары Сафайы рæхысмæ, Бынаты бардуагмæ бакува, уый дæр нæ фыдæлты æгъдау у. Чызг йæ райгуырæн хæдзарæй цы фарн рахæссы, уый хъуамæ йе ‘цæг хæдзармæ комкоммæ бахæсса, горæты уынгты æмæ йæ цыртдзæвæнты ма уадза.

Бирæ нæм ис уæлдай хæрдзтæ, уæлдай лæвæрттæ дæр. Чындзæхсæв у дыууæ уды амондæн, æмæ хъуамæ лæвæрттæ дæр, арфæтæ дæр уыдонæн уой.

Фарн алкæй хæдзары дæр, фæлæ мæ зæрдæмæ уый дæр нæ цæуы, сылгоймæгтæй бирæтæ зианы рæстæг сæхицæй «режиссертæ» кæй аразынц. Сæ хъæлæба махмæ, лæгтæм, фæхъуысы: «чырын раст æвæрд нæу, иннæрдæм æй хъæуы æвæрын, йæ сæр раст æвæрд нæу».

Бынтон хъыг та мын уый у, æмæ бирæ сылгоймæгтæ сæ зæрдиаг ныхæстæ марды уæлхъус кæй фæкæнынц. Суанг ма худгæ чи фæкæны, ахæмтæ дæр вæййы. Æз афтæ хъуыды кæнын, кæд мардыл дæ зæрдæ нæ риссы, тæригъæд нæ кæныс йæ хиуæттæн, уæд мардмæ ма цу. Кучиты Руслан нæм раст сиды: «Ма рæдийæм, нæ фыдæлты хорз æгъдæуттæ ма халæм!»

БЕКМÆРЗАТЫ Аслæнбег, фæллойы ветеран

ОСТАВЬТЕ ОТВЕТ

Please enter your comment!
Please enter your name here