РЦИ-Аланийы Сæргълæууæг Битарты Вячеславы Ныхас Республикæ Хуссар Ирыстоны æрцæуæг трагикон цауты 10 азы фæдыл

0
24

 

Ирыстоны бирæнацион адæмæн 8 август у æрхæндæг æмæ хъыггæнæн бон — 10 азы размæ Гуырдзыстон балæбурдта Республикæ Хуссар Ирыстонмæ.

Цæгат Ирыстоны иу адæймаг дæр нæ разындзæн, дæс азы размæ гуырдзиаг экстремистты æрбалæбурды хабар кæй зæрдæтæ нæ сæнкъуысын кодта, кæй сæрымагъзы нæ равзæрын кодта тыхстдзинад æмæ æнæразыдзинад.

Уыцы цыбыр, фæлæ карз хæсты чи бабын, уыцы æнаххос адæмы нæмттæ рох никуы уыдзысты. Уыцы лæгæвзарæн бонты рæстæг знаджы ныхмæ тохы чи бацыд æмæ Фыдыбæстæйы сæраппонд йæ цард чи радта, уыцы хъæбатыртæн алкæддæр кад кæндзыстæм.

Æмæ, æнæмæнг, алкæддæр бузныг уыдзыстæм Уæрæсейæ — уый æрбалæууыд Хуссар Ирыстоны адæмы фарсмæ æмæ республикæйы цæрджыты бахъахъхъæдта, йæ архайды нысан нæ хуссайраг æфсымæрты сæрибардзинад æмæ хæдбардзинад байсын чи скодта, уыцы æбæрнон политиктæй.

Рацыд 10 азы. Абон Хуссар Ирыстон аразы йæ ног цард, архайы йæ хъомысджындæр æмæ фæрныгдæр фидæныл. Æмæ уыцы хъуыддаджы республикæйы фарсмæ алкæддæр ис Уæрæсейы Федераци.

10 азы размæ æрцæуæг цаутæ никуы ферох кæндзыстæм. Цины дæр, хъыджы дæр алкæддæр уыдзыстæм нæ хуссайраг æфсымæртимæ. Махæн ис иу хъысмæт, иу фидæн. Уымæй нæ ис ныфс.

 

Дзыллон номарæн мадзæлттæ — Цхинвалы

Зындгонд куыд у афтæмæй 10 азы сæххæст, гуырдзиаг лæгсырдтæ Республикæ Хуссар Ирыстонмæ куы æрбабырстой æмæ 2008 азы августы хæст куы райдыдта, уыцы цаутыл. Уыимæ бастæй Цхинвалы ацы бонты арæзт цæуынц бирæ алыхуызон номарæн мадзæлттæ.

Номарæн мадзæлттæн сæ фылдæр хай уыд 7 августы. Уыцы бон Цхинвалмæ абалц кодта Республикæ Цæгат Ирыстон-Аланийы делегаци дæр. Делегацийы уыдысты — РЦИАланийы Парламенты депутат Челдыты Витали, республикæйы национ ахастдзинæдты фарстаты фæдыл министры хæдивæг Бæгъиаты Алан, æхсæнадон змæлд «Иры Стыр Ныхас»-ы сæрдары хæдивæг Еналдыты Хъазыбег æмæ æппæтуæрæсеон æхсæнадон организаци «Боевое братство»-йы цæгатирыстойнаг хайады сæрдар Золойты Игорь.

Уыцы бон Хуссар Ирыстоны Президент Бибылты Анатоли, Парламент æмæ Хицауады уæнгтæ, Цæгат Ирыстоны æмæ бирæ уæрæсейаг регионты минæвæрттæ, республикæйы цæрджытæ дидинджытæ сæвæрдтой, æнаххосæй чи фæмард, уыцы сабырцæрæг адæмы æмæ Фыдыбæстæйы сæраппонд йæ цард чи радта, уыцы хъæбатырты номарæн мемориалтыл.

Изæрæй саударæн æмбырд арæзт æрцыд Хуссар Ирыстоны Парламенты раз.

Номарæн мадзæлттæ æртыццæджы адарддæр сты.

Нæ уацхæссæг

ОСТАВЬТЕ ОТВЕТ

Please enter your comment!
Please enter your name here