Цæгат Ирыстоны социалон-экономикон рæзты нысантæ

0
84

 

Знон Уæрæсейы Федерацийы Президент Владимир ПУТИН æмæ РЦИ-Аланийы Сæргълæууæг БИТАРТЫ Вячеслав сæ кусæг фембæлды æрныхас кодтой Цæгат Ирыстоны социалон-экономикон рæзты фарстатыл. Уый тыххæй фехъусын кодта республикæйы Сæргълæууæджы пресс-службæ.

Фембæлды райдайæны Битарты Вячеслав бузныг загъта Президентæн, сæ амæй размæйы фембæлды фæстæ федералон министрадтæ æмæ ведомствотæн Цæгат Ирыстоны социалон-экономикон уавæр банывыл кæныны фæдыл цы ахсджиаг амынддзинæдтæ лæвæрд æрцыд, уый тыххæй.

— Уыцы амынддзинæдтæ æххæст кæныныл федералон министрадтæ æмæ ведомствотимæ иумæйаг хъарутæй бакуыстам. Уый фæрцы республикæйы æхсæнадон-политикон æмæ социалон-экономикон уавæр зынгæ фæхуыздæр сты, — бафиппайдта Битары-фырт. Республикæйы разамонæджы ныхасмæ гæсгæ, ныридæгæн цæттæ у 2030 азмæ Республикæ Цæгат Ирыстон-Аланийы социалон-экономикон райрæзты стратеги. Документы бæстон хыгъд æрцыдысты дарддæры рæзты нысантæ. Уыцы стратегийы уагæвæрдтæ æххæст кæнгæйæ, Ирыстон йæхимæ цы хæстæ исы, уыдонæн сæ ахсджиагдæр у 2030 азмæ æнæ дотацитæй цæрæг республикæ суæвыны нысан.

— Уыцы нысанмæ фæндагыл нæ къухы бафтыд дотациты бæрц 5 проценты фæкъаддæр кæнын. Æмæ куыст цæуы, цæмæй сæ бæрц ацы аз ноджыдæр фæкъаддæр уа, — йæ ныхасмæ бафтыдта Битарты Вячеслав. Республикæйы социалонэкономикон рæзты нысантæ цавæр фæткы бындурыл æххæстгонд цæудзысты, ууыл кусынц Рæзты республикон агентады специалисттæ. Куыд нысангонд цæуы, афтæмæй 2019 азы 1 январæй республикæ æххæст кæнын райдайдзæн йæ экономикæйы къабæзты райрæзты сæрмагонд программæтæ. Фембæлды рæстæг куыд загъдæуыд, афтæмæй фæстаг дыууæ азы дæргъы инвестицион хъомысы рейтингы Цæгат Ирыстоны бынат зынгæ фæуæлдæр.

Республикæйы разамонæджы ныхасмæ гæсгæ, бæлвырд мадзæлттæ арæзт цæуы, цæмæй инвестортæ фылдæр æргом здахой республикæмæ. Инвестортимæ ахæм æнгом æмархайды дæнцæг у Зæрæмæджы ГЭС-ы арæзтад дæр. Ацы проект æххæстгонд цæуы федералон энергетикон холдинг «РусГидро»-имæ.

— Станцæйы арæзтад ивгъуыд æнусы 80-æм азты райдыдта, фæлæ дзæвгар рæстæг объектыл куыстытæ нал цыдысты. Ног пъланмæ гæсгæ, станцæ кусын райдайдзæн 2019 азы. Ацы инвестицион проекты иумæйаг аргъ у 49 миллиард сомы бæрц. Станцæ кусын куы райдайа, уæд йæ хъомыс фаг уыдзæн республикæ электрон тыхæй 70 проценты бæрц æфсадынæн. Уымæй уæлдай, Зæрæмæджы ГЭС-ы дыккаг каскадыл дæр куыст цæудзæн, — загъта Цæгат Ирыстоны Сæргълæууæг.

Битарты Вяячеслав куыд радзырдта, афтæмæй акционерон æхсæнад «КамАЗ» тагъд рæстæджы республикæйы байгом кæндзæн, уæззау æфсæддон техникæ кæм цалцæг кæндзысты, ахæм центр. Уыцы центры фæзындзæн 500 ног кусæн бынаты.

Ныхасы рæстæг сæрмагонд æргом аздæхтæуыд республикæйы социалон къабазы уавæрмæ. Битарты Вячеслав куыд загъта, афтæмæй республикæ 2017 азы уæлæмхасæн мадзæлттæ сарæзта, цæмæй æххæстгонд æрцæуой «Майы» Указты уагæвæрдтæ бюджетон къабазы кусджыты цалдæр категорийæн сæ мыздыл бафтауыны хъуыддаджы. Æнæниздзинад хъахъхъæнынады объектты уавæрыл дзургæйæ, республикæйы Сæргълæууæг куыд фæнысан кодта, афтæмæй ныртæккæ цалцæггæнæн куыстытæ цæуынц цыппар рынчындоны бæстыхайыл. Уымæй уæлдай, кæронмæ фæхæццæ кæны тарнизы ныхмæ диспансеры арæзтад.

Бæстон куыст цæуы скъолайы агъоммæ ахуырады кусæндæтты хъомыс фæфылдæр кæныныл дæр. Афтæ, ацы аз республикæйы байгом уыдзысты цыппар ног рæвдауæндоны. Фидæн азы ма сæ нымæцыл бафтдзæн ноджыдæр ма дыууæ.

— Ивгъуыд азы Цæгат Ирыстоны социалон къабазы сарæзтæуыд 50 ног объектæй фылдæр. Уыцы нысанæн федералон программæты фæлгæты цы æхца дихгонд æрцыд, уыдон сæ нысаныл сæмбæлдысты. Æппæт объекттæ дæр арæзт æрцыдысты афойнадыл, уыимæ, куыстыты хæрзхъæддзинадмæ фаутæ æрхæссæн нæй, — загъта Цæгат Ирыстоны разамонæг.

Дарддæры хабæрттыл дзургæйæ, Битары-фырт куыд фæнысан кодта, афтæмæй ныртæккæ республикæ архайы бирæ федералон программæты. Уыдоны фæлгæты хæстæгдæр азты арæзт æмæ цалцæггонд æрцæудзысты социалон къабазы 55 объекты.

Фембæлды кææронбæттæны Владимир Путин йе ‘ргом аздæхта, дæс азы размæ Хуссар Ирыстоны цы цаутæ æрцыд, уыдонмæ дæр. Президенты бафæндыд базонын, Цæгат æмæ Хуссар Ирыстон куыд æмгуыстад кæнынц, уый. Фарстайыл дзургæйæ, Битарты Вячеслав куыд загъта, афтæмæй Цæгат æмæ Хуссар Ирыстоны цæрынц, иумæйаг истори æмæ культурæ кæмæн ис, ахæм адæм. Дыууæ республикæйы ахастдзинæдты бындуры ис æфсымæрдзинад.

Нæ уацхæссæг

ОСТАВЬТЕ ОТВЕТ

Please enter your comment!
Please enter your name here