Кусдзысты арæзтады къабазы

0
28

 

Цæгат Ирыстоны дарддæр æххæстгонд цæуынц куысты базары уавæр фæнывылдæр кæныны сæрмагонд федералон программæйы мадзæлттæ. Уыдоны фæлгæты РЦИ-Аланийы Адæмæн куыстдæттыны комитет ног дæсныйæдтæ райсын æмæ профессионалон дæсныдзинад фæбæрзонддæр кæныны ахуыртæ аразы, программæйы мадзæлтты чи архайы, уыцы организациты специалисттæн.

Уый тыххæй фехъусын кодта Адæмæн куыстдæттыны комитеты прессслужбæ.

Пресс-службæйы минæвары ныхасмæ гæсгæ, ацы къæпхæныл программæйы ахуырадон мадзæлтты архайынц, арæзтады къабазы чи кусы, уыцы организациты специалисттæ, стæй арæзтадон компанитæ куыстмæ райсынвæнд кæй кæнынц, уыцы адæм.

Профессионалон дæсныдзинад фæбæрзонддæр кæнын æмæ ног дæсныйад райсыны курсытæ цæуынц Дзæуджыхъæуы бирæкъабазджын техникумы, Дзæуджыхъæуы æфсæнвæндаджы транспорты техникум æмæ Цæгат Кавказы аграрон-технологон колледжы (Æрыдон) бындурыл.

Комитеты минæвар куыд фехъусын кодта, афтæмæй ахуырты архайæг адæм райсдзысты сисамайæджы, къулсæрдæджы, автогрейдер æмæ бульдозеры машинистты, монтажгæнæг æмæ æндæр арæзтадон дæсныйæдтæ.

Æппæт ахуырадон программæтæ дæр арæзт æрцыдысты ног стандартты бындурыл. Дыууæ мæйæ æртæ мæйы онг чи цæуа, уыцы ахуырты рауагъдонтæн ратдзысты дæсныйады æвдисæндартæ.

Адæмæн куыстдæттыны службæйы минæвæртты ныхасмæ гæсгæ, ацы æмæ иннæ уæлæмхасæн мадзæлттæ фадат ратдзысты, цæмæй, сæ куысты бынæттæ сæхгæнынæй тæссаг кæмæн у, уыцы адæм ног дæсныйæдтæ райсой, стæй æгуыст адæмæй дæр бирæтæн куысты бынæттæ фæзына.

Комитеты пресс-службæйы минæвар куыд бафиппайдта, афтæмæй уыцы сæрмагонд федералон программæйы мадзæлтты архайыны фадат нырма дæр ис, куыд организацитæн, афтæ куыстагур адæмæн дæр. Æппæт фарстатæ дæр сбæлвырд кæнæн ис Адæмæн куыстдæттыны комитеты (Дзæуджыхъæу, Сабырдзинады проспект, 25), стæй службæйы Дзæуджыхъæуы æмæ районты хайæдты. Комитеты специалисттæ дзуапп ратдзысты ахæм телефонæй дæр: 8 (8672) 64-90-67

 

ОСТАВЬТЕ ОТВЕТ

Please enter your comment!
Please enter your name here