СПОРТ

0
117

 

Хъæбæлотæм — дыууæ уæлахиздзауы

 

Мæскуыйы облæсты, горæт Одинцовойы ивгъуыд къуыри уæгъдибар æмæ грекъаг-ромаг хъæбысхæстæй цы Уæрæсейы чемпионат цыди, уым фæстаг бонты фесгуыхтысты Хъæбæлоты дыууæ æфсымæры. ХЪÆБÆЛОТЫ Витали æмæ Зауыр архайдтой грекъаг-ромаг хъæбысхæстæй

Кæстæр æфсымæр Витали хæцыди Кæсæг-Балхъары республикæйы номæй æмæ фыццаг бынат рамбылдта 55 кг онг уæзы ерыс кæнгæйæ. Цæмæхъуаты Нарты хъомылгæнинаг Зауыр та хæрзæрыгонæй фæстæмæ хъахъхъæны Цæгат Ирыстоны спортивон кад. Уый у дунеон къласы спорты мастер. Уæрæсейы чемпионаты 67 кг онг уæзы ерыс кæнгæйæ, уый гауызмæ рацыд фондз хатты, æмæ фондз хатты дæр тæрхонгæнджытæ уæлахиздзауыл банымадтой Зауыры. Æмæ куыд нæ, кæд æмæ уый йе ‘ппæт ныхмæлæуджытыл дæр фæуæлахиз æнæкъуылымпыйæ . Зауыры тренер Цæмæхъуаты Нарт зæгъы: «Одинцовойы гауызыл Зауыр йæхи равдыста хъомысджынæй. Махæн Зауыримæ нæ нысан у дунеон чемпионатмæ бахауын. Уый тыххæй йæ рахæцын хъæудзæн, Сербийы цы дунеон турнир Гран-при цæудзæн мæйы кæрон, уым».

Ирон богæлттæй ма грекъаг-ромаг хъæбысхæстæй Уæрæсейы чемпионаты хæрзиуæгджын ссис Хæтæгты Асланы хъомылгæнинаг Джиоты Дмитри. Ерыс кодта 77 кг онг уæзы æмæ бацахста æртыккаг бынат. Уый фæуæлахиз цыппар ныхмæлæууæгыл, фæлæ чемпионаты 1/4 хайы кæй фæкъуылымпы, уый тыххæй ма йын фадат уыди æрмæстдæр æртыккаг бынатыл тох кæнынæн. Уыцы хæс Дмитри сæххæст кодта иттæг æнтыстджынæй æмæ хорзæхджын æрцыд бронзæ майданæй.

Дмитрийы тренер Хæтæгты Аслан зæгъы: «Дмитри Уæрæсейы фæсивæдон иугонд командæйы йæ уæзы (77 кг) у фыццаг æмæ тагъд Минскы хъуамæ хæца дунеон чемпионаты йæ карæнты ‘хсæн. Одинцовойы дæр Джиойы-фырт, мæнмæ гæсгæ, уыди тыхджындæрты æмвæз.

Зæгъæм, фыццаг бынат чи бацахста, Алексей Чихиркин, уыимæ хæцгæйæ, Дмитри ницæмæй лæмæгъдæр уыд. Сæ тохы хыгъд уыди 1:1 æмæ Чихиркин фылдæр архайдта йæхи Джиойы-фырты ныббырстытæй бахъахъхъæныныл. Дмитри размæ куы атындзыдта, уæд æм Чихиркин фæрæвдз æмæ ма дзы дыууæ баллы рамбылдта. Афтæмæй сæ фембæлд ахицæн 3:1 хыгъдæй Чихиркины пайдайæн. Уый фæстæ ма Дмитрийы бахъуыд дыууæ ныхмæлæууæгимæ рахæцын æмæ сыл фæуæлахиз æнæкъуылымпыйæ. Цæуы йыл 21 азы, æмæ мæ уырны, дарддæр йæ фæндаг цымыдисаг кæй уыдзæн, уый».

 

 

Футбол. Уæрæсейы чемпионат. Дыккаг къорд

Дзæуджыхъæуы «Спартак» 11 августы Уæрæсейы чемпионаты йæ радон хъазт акодта йæхи фæзы Назраны «Ангушт»-имæ.

Дзæуджыхъæуккаг футболисттæ ацы фембæлды, кæй зæгъын æй хъæуы, тырныдтой уæлахизмæ. Пурти фылдæр уыди спартаковонтæм, фæлæ «Ангушт»-ы хъазджытæ сæ кулдуармæ бацæуæнтæ къæрцхъусæй хъахъхъæдтой æмæ сæ иварон фæзы уæззау уавæртæ сæвзæрынæй бирæ рæстæг бахызтой.

Дзæуджыхъæуккæгтæн хъазты фыццаг æмбисы уазджыты кулдуармæ пурти саразын нымадæй бантыст цыппар хатты. Фыццаг фæцырд Цæраты Алан. Уый фæсайдта йæ хъахъхъæнджыты, баирвæзт уазджыты иварон фæзмæ æмæ бæргæ хорз ныццавта пурти, фæлæ «Ангушт»-ы дуаргæс йæ арæнтæ бахъахъхъæдта.

Уымæй дæс минуты фæстæдæр та ногæй тæссаг уавæр сарæзтой Михаил Жабкин, Кучиты Георги æмæ Цæраты Алан, фæлæ пурти уазджыты хызмæ батæхын нæ бакуымдта. Уый фæстæ уазджытæ сæхæдæг дæр афæлвæрдтой «Спартачы» дуаргæс Хайманты Аланы батыхсын кæнынмæ, фæлæ Алан дыууæ хатты дæр сарæхст йæ кулдуар бахъахъхъæнынмæ. Хъазты фыццаг хайы ма зæрдыл бадарыны аккаг уыдис, Дыгъуызты Аслан æмæ Гæззаты Руслан иу 30 метры дæрддзæгæй уазджыты кулдуар акъахынмæ кæй хъавыдысты, уый.

Хъазты дыккаг æмбисы дыууæ командæйы архайд фæцырддæр. Уазджытæ 51-æм æмæ 59-æм минуттыл иучысыл батыхсын кодтой нæ дуаргæс Хайманты Аланы, фæлæ уый фæстæ дзæуджыхъæуккæгтæ сæхæдæг сæ архайд фæрæвдздæр кодтой æмæ сарæзтой цалдæр уæззау уавæры «Ангушт»-ы иварон фæзы. 64-æм минутыл нæ æрдæгхъахъхъæнæг Плиты Никæ фæцырд, æмæ йæ цæфы фæстæ пурти уазджыты хызы бæргæ смидæг, фæлæ йæ тæрхонгæнæг нæ банымадта. Цæмæн, уый зын бамбарæн кæд уыди, уæддæр йæ фæнд нал аивта. Æфсонæн та йын уыд, цыма уый хæдразмæ нæ размæбырсæг Михаил Жабкин барæй уазджыты иварон фæзы ахауд, уый. Хъазты фæстæ, ацы уавæр экраныл чи федта, уыдон иууылдæр загътой, тæрхонгæнæг раст кæй нæ уыд.

Спартаковонтæ ма уый фæстæ цалдæр хатты тæссаг уавæртæ сарæзтой уазджыты кулдуармæ бацæуæны, фæлæ Хъæцмæзты Сослан, Дыгъуызты Аслан æмæ Плиты Никæйы цæфты фæстæ пурти хызмæ батæхын нал бакуымдта.

Хъазты кæронмæ хæстæг нæ æрдæгхъахъхъæнæг Тобойты Таймураз пуртийы фæстæ фатау батахт уазджыты иварон фæзмæ, фæлæ йæ ам сæ хъахъхъæнæг афæлдæхта. Бирæтæ æнхъæл уыдысты тæрхонгæнæг Александр Мишлякевич 11-метронæй фæивар кæндзæн уазджыты командæйы, зæгъгæ, фæлæ уый аххосджыныл банымадта Тобойы-фыртæн йæхи æмæ йæ фæивар кодта. Хъазт ахицæн 0:0 хыгъдæй. Кæй зæгъын æй хъæуы, нæ футболисттæ уыцы бон æппæтæй æххæст нæ уыдысты. Афтæ зæгъæн нæй, æмæ уый сæ хуыздæр хъазт уыд, фæлæ уæддæр тæрхонгæнæджы архайд æркæсыны аккаг у.

Хъазты фæстæ прессконференцийы «Ангушт»-ы сæйраг тренер Идрис Мархиев йæ командæйы хъазтæй разыйæ баззад æмæ загъта: «Дыууæ командæйы дæр, фыццаджыдæр, тырныдтой рæдыд ма æруадзынмæ æмæ уымæ гæсгæ къæрцхъус уыдысты сæ кулдуæрттæм æрбацæуæнты. Хæрæгсаст кæй фестæм, уый, æвæццæгæн, раст хыгъд у».

Дзæуджыхъæуы «Спартачы» сæйраг тренер Гæззаты Юри хъазты фæстæ уыди æрхæндæг æмæ загъта: «Кæй зæгъын æй хъæуы, нæ лæппутæ æнæрæдыд нæ уыдысты, фæлæ, тæрхонгæнæг цы рæдыдтытæ æруагъта, уыдон хъазты хыгъдыл кæй фæзындысты, уый дæр бæлвырд у. Хъыгагæн, ныридæгæн тæрхонгæнæджы аххосæй нæ командæ дыккаг хатт скодта хæрæгсаст. Уый та уый амоны, æмæ уыцы хъæзтыты фесæфтам цыппар очкойы. Абон нæ къухы кæд уæлахиз нæ бафтыд, уæддæр æз мæ зæрдæ дарын, нæ лæппутæ куыдфæстæмæ сæ хъазт тыхджынæй-тыхджындæр кæй кæндзысты, ууыл. Æз уынын, сæ кæрæдзиуыл куыд æнувыд сты, куыд сæ фæнды сæ иузæрдион фарсхæцæг футболуарзджыты зæрдæтæ барухс кæнын сæ хъазтæй. Рæхджы ма нæ командæйыл бафтдзысты Хæдарцаты Батрадз æмæ Темури Букия. Уырны мæ, ацы футболистты æрбацыд хорзæрдæм кæй фæзындзæн нæ командæйы хъазтыл, уый. Зæрдиаг арфæ кæнын футболуарзджытæн, сæ зæрдæ ныл кæй нæ ивынц, уый тыххæй!»

БАСКАТЫ Уырызмæг

ОСТАВЬТЕ ОТВЕТ

Please enter your comment!
Please enter your name here