0
146

 

 

Нæ фæсивæд уæлахиз æрхастой Мæскуыйæн

Пензæйы Æппæтуæрæсеон фæсивæдон спартакиадæйы фесгуыхтысты ирыстойнаг шпажисттæ ФАРДЗИНТЫ Алан, БАГАТЫ Алинæ, ХУЫГАТЫ Анжеликæ æмæ Мананæ САУМОВА.

Ирыстойнаг фæсивæд фехтованийы спартакиадæйы хъахъхъæдтой Мæскуыйы спортивон кад æмæ сæ арæхстдзинадæй сæхимæ æркæсын кодтой спортуарзджыты. Командон ерысты мæскуыйæгтæ фæуæлахиз сты се ‘ппæт ныхмæлæуджытыл дæр æмæ бацахстой фыццаг бынат. Уыцы уæлахизмæ ахъаззаг æвæрæн бахастой не ‘мзæххон фæсивæд.

Афтæ зæгъæн ис, æмæ нæ æртæ чызджы æмæ Фардзинты Алан уыдысты Мæскуыйы командæйы астæуымагъз. Нæ арфæтæ нæ сæрæн фæсивæд æмæ сæ тренертæ Моргуаты Эдуард, Алекси Лазариди, Наталья Шарова, Тотыккаты Идæ æмæ Хъесаты Иринæйæн!

Хуыбецты Алан фесгуыхт Будапешты

Венгрийы сæйраг горæт Будапешты дзюдойæ цыдысты дунеон рейтингон турнир Гран-прийы ерыстæ. Уыцы ран иттæг сæрæн хæст ракодта ЦÆГÆРАТЫ Хъазыбег æмæ БЕККУЫЗАРТЫ Аличы хъомылгæнинаг ХУЫБЕЦТЫ Алан.

Алан, 81 кг онг уæзы хæцгæйæ, фембæлд фондз ныхмæлæууæгимæ, æмæ фондз хатты дæр тæрхонгæнджытæ уæлахиз радтой Хуыбецы-фыртæн. Ацы уæлахизы фæстæ йæ рейтингыл бафтыдта 300 баллы. Уый та уый амоны, цæмæй дунеон чемпионатмæ Уæрæсейы иугонд командæимæ ацæуынмæ балцæг райса. Уый тыххæй йæ гæнæнтæ зынгæ фæфылдæр сты. Аланы тренер Цæгæраты Хъазыбег зæгъы: «Алан Будапешты куыд рахæцыд, уымæй нын нæ зæрдæтæ барухс кодта. Афтæ зæгъæн ис, æмæ иу рæдыд дæр не ‘руагъта. Йæ алы ныхмæлæууæгмæ дæр ссардта фæндаг фæуæлахиз уæвынæн. Ноджы уыди тынг хиуылхæцгæ. Зæгъæм, кæронбæттæны йæ тыхджын япойнаг ныхмæлæууæгимæ сæ фембæлд рауад тынг хъазуатон. Суанг фембæлды кæронмæ дæр иуæн дæр нæ бантыст размæ рацæуын. Уæлахиздзау сбæрæг кæнынæн тæрхонгæнджытæ уæлæмхасæн рæстæг куы снысан кодтой, уæд Алан равдыста стыр уæлахизмæ тырнындзинад. Йæ ныббырстытæй иуы йæ къухы бафтыд япойнаджы йæ быны акæнын æмæ фæуæлахиз «вазари» бæрæггæнæнимæ. Æнæмæнг, уый уыди рæсугъд уæлахиз.

Ныр Алан йæхи цæттæ кæндзæн Уæрæсейы иугонд командæимæ дунеон чемпионатмæ. Уый цæудзæн 25-30 сентябры Бакуйы. Нæ цæст дардзыстæм, цæмæй Аланы мацы бахъыгдара уыцы чемпионатмæ ацæуынмæ».

Мах зæрдæ дæр зæгъы нæ æвзыгъд лæппуйæн ног стыр æнтыстытæ!

 

 

БАСКАТЫ Уырызмæг

ОСТАВЬТЕ ОТВЕТ

Please enter your comment!
Please enter your name here