СПОРТ. Ирыстойнаг чызг фесгуыхт Болгарийы

0
181

 

Авиамоделон спортæй болгайраг горæт Пазарджикы цыдысты дунейы фыццаг бынат бацахсыныл ерыстæ æрыгæтты ‘хсæн.

 

Ерысты архайдтой 17 бæстæйы æрыгон авиамоделисттæ. Уæрæсейы иугонд командæимæ чемпионаты архайдта Цæгат Ирыстоны Сывæллæтты техникон сфæлдыстады центры хъомылгæнинаг Полинæ Полякова æмæ ссис ерысты дыууæ хатты уæлахиздзау.

Фыццаг Полинæ фæуæлахиз хицæн спортсменты ерысты, уый фæстæ та фыццаг бынат бацахста командон ерысты дæр. Нæ курдиатджын чызг авиамоделон спортыл фæцалх йæ фыд, зындгонд тренер Илья Поляковы фæрцы. Уый разамындæй Полинæ цæуы иу уæлахизæй иннæмæ. Полинæйы хистæр æфсымæр Максим дæр цалдæр азы размæ ацы техникон спорты хуызæй уыди дунеон ерысты уæлахиздзау, ныр та ахуыр кæны Мæскуыйы Авиацион институты. Ацы фæндаг равзарынмæ хъавы 14-аздзыд Полинæ дæр.

Йæ цоты цоты равзæрст фæндагæй тынг разы у сæ дада, РЦИ-Аланийы адæмон артист æмæ Уæрæсейы сгуыхт артист Николай Поляков: «Максим æмæ Полинæ сты мæ удлæууæнтæ. Чысылæй фæстæмæ сæ фыды фæрцы ныллæууыдысты хорз хъуыддагыл æмæ йыл æнæзивæгæй кусынц. Хистæрæн ма уымæй æхсызгондæр цы вæййы, йæ кæстæртæ царды раст фæндаг куы равзарынц! Уырны мæ, Полинæ ма нæ республикæйы спортивон кæд бирæ хæттыты æнтыстджынæй кæй хъахъхъæндзæн, уый».

БАСКАТЫ Уырызмæг

 

ОСТАВЬТЕ ОТВЕТ

Please enter your comment!
Please enter your name here