Ног ахуыры азмæ цæттæдзинады фарстатæ

0
149

 

Куыд иннæ азты, афтæ та ныр дæр августы боны фæткы æрлæууыд ног ахуыры азмæ цæттæдзинады фарста. Министрадтæ æмæ ведомствотæ, стæй иннæ цæстдарæг оргæнтæ æркæсынц, ахуырадон кусæндæттæ 1 сентябрьмæ куыд цæттæ сты, уымæ.

Уыцы фарстамæ йæ æмбырды æркаст Дзæуджыхъæуы муниципалон арæзты æхсæнадон совет дæр. Æмæ æрмæст кæсгæ нæ, фæлæ æмбырды агъоммæ советы минæвæрттæ бабæрæг кодтой горæты æппæт скъолатæ дæр æмæ сын сбæрæг кодтой сæ цæттæдзинады къæпхæн.

Михаил Шаталов сæрдариуæг кæм кодта, уыцы æмбырды архайджытæ ныр хатдзæгтæ скодтой уыцы цæстдарæн куыстæн. Æмбырды боны фæткы сæйраг фарстайы фæдыл бындурон доклад скодта советы сæрдары хæдивæг Сæлбиты Зитæ. Йæ ныхасмæ гæсгæ, горæты æппæт 43 скъолайы дæр цæуынц цалцæггæнæн куыстытæ. Куыд загъд уыд, афтæмæй, зæгъæм, 8-æм, 11-æмæ 13-æм скъолаты цалцæггæнæн куыстытæ ахицæн сты, иннæ ахуырадон кусæндæттæй дæр бирæты цæттæгæнæн куыстытæ кæронмæ фæхæццæ кæнынц.

Уый хорз, фæлæ советы уæнгтæ фылдæр æргом аздæхтой, цæстдарæн мадзæлтты рæстæг цы хъуагдзинæдтæ рабæрæг кодтой, уыдонмæ. Зæгъæм, кæцыдæр скъолаты раивинаг сты хъармгæнæнтæ, канализаци æмæ вентиляцийы хæтæлтæ, бакæнын сæ хъæуы æндæр куыстытæ дæр. Æппæт уыцы фарстатыл советы уæнгтæ аздæхтой горæты ахуырады управленийы хицау Гозымты Раманы æргом.

Советы уæнгтæ куыд бауынаффæ кодтой, афтæмæй ног ахуыры азмæ цæттæдзинады фарстайыл ногæй ныхас цæудзæн ахуыргæнджыты августы иумæйаг æмбырды.

Горæты æхсæнадон советы уæнгтæ æрдзырдтой æндæр ахсджиаг фарстатыл дæр.

Владимир ИВАНОВ

 

ОСТАВЬТЕ ОТВЕТ

Please enter your comment!
Please enter your name here