Сæйраг нысан — адæмы риссагдæр фарстатæ лыг кæныныл архайын

0
110

 

Æрæфы районмæ йæ кусæг балцы рæстæг республикæйы Сæргълæууæг БИТАРТЫ Вячеслав фембæлд Цыколайы æмæ Быдыры Дæргъæвсы цæрджытимæ.

Цыколайы Культурæйы хæдзармæ Битарты Вячеславимæ фембæлынмæ æрбацыд тынг бирæ хъæуы цæрæг адæм. Республикæйы Сæргълæууæджы æмæ цыколайæгты ‘хсæн ныхас рауад æргом æмæ бындурон. Ныхасы ма архайдтой республикæйы Хицауады уæнгтæ, стæй РЦИ-Аланийы Сæргълæууæджы æмæ РЦИ-Аланийы Хицауады Администрацийы Адæмы курдиæттимæ кусыны фæдыл управленийы специалисттæ.

Фембæлды райдайæны Битарты Вячеслав арфæ ракодта Цыколайы 3-æм астæуккаг скъолайы 9-æм къласы ахуырдзау Фадзайты Маратæн, æрыгæтты ‘хсæн уæгъдибар хъæбысхæстæй Европæ æмæ Уæрæсейы чемпионаты уæлахиздзау кæй ссис, уый фæдыл. Уымæй уæлдай ма республикæйы Сæргълæууæг арфæ ракодта, æрыгон спортсмены ерыстæм чи бацæттæ кодта, УФ-йы уыцы сгуыхт тренер Махъоты Æхсарæн дæр.

Хъæуы цæрджытимæ комкоммæ ныхас кæнгæйæ, Битарты Вячеслав радзырдта, республикæйы размæ цы фарстатæ лæууы, уыдон алыг кæныны хъуыддаджы, йæ хъуыдымæ гæсгæ, куыд хуыздæр архайын хъæуы, уый тыххæй, радзырдта сын, Уæрæсейы Президентимæ сын цы ныхас уыд, стæй сæ бафарста, цы фарстатæ, цы хъуыддæгтæ сæ тыхсын кæнынц, уый тыххæй дæр.

— Нæ куыст аразæм афтæ, цæмæй нын адæмы риссагдæр фарстатæ уой зындгонд, æмæ архайæм уыцы фарстатæ лыг кæныныл, — загъта республикæйы Сæргълæууæг.

Ныхас цыд æнæниздзинад хъахъхъæнынады, ахуырады, куысты бынæттæ аразыны фарстатыл, стæй социалон инфраструктурæйы объектты арæзтад æмæ реконструкцийыл.

Цыколайы цæрæг Пагæты Хетаг дзырдта, районы центрон рынчындонæн сæрмагондæй саразын кæй хъæуы сыгъдæггæнæнтæ, стæй, Мæцутæйы астæуккаг скъола бындурон цалцæггæнинаг кæй у, уый тыххæй. Йæ хъуыдымæ гæсгæ, æрыгон специалисттæ районмæ куыстмæ цæмæй здæхой, уымæн сын нæй аккаг уавæртæ. Уымæй уæлдай, сагъæссаг у районы хæххон территоритæм фæндæгты уавæр æмæ хæххон хъæутæм газ бауадзыны фарста.

Цыколайы 3-æм астæуккаг скъолайы директор Дзоблаты Эдуарды курдиат уыд, астæуккаг ахуырады бындурыл механизатортæ æмæ автомобилисттæ цæттæ кæныны хъуыддаг Æрыдоны колледжы филиалы цæмæй ма фæкъуылымпы уа, уый фæдыл.

— Ныхас ахуырады фарстатыл кæм рацыд, уым зæгъын хъæуы, иунæг скъола дæр кæй нæ сæхгæндзыстæм. Æрмæст цæттæ кæнын хъæуы, районы тынгдæр цы специалисттæ хъæуы, ахæмты, — бафиппайдта Битарты Вячеслав.

Токаты Надеждæ республикæйы Сæргълæууæджы æргом аздæхта, Цыколайы æмæ Хæзныдоны сывæллæтты рæвдауæндæттæ саразын кæй хъæуы, уыцы фарстамæ. Хæзныдоны кæфтыты ансамблы аивадон разамонæг та Битарты Вячеславæй ракуырдта, цæмæй бындуронæй цалцæггонд æрцæуа сæ хъæуы Культурæйы хæдзар. Махъоты Батрадзы курдиат та уыд районы спортивон-дзæбæхгæнæн центр саразынæй баххуыс кæнын.

Æппæт ацы фарстатæ алыг кæнын республикæйы Сæргълæууæг бабар кодта профилон министрадтæн æмæ ведомствотæн, районы разамындæн та бауынаффæ кодта куыстытæн проектон-сметон гæххæттытæ бацæттæ кæнын.

Æрæфы районы рынчындоны арæндоны хайад байгом кæныны фарста, сæйраг дохтыры ныхасмæ гæсгæ, баст у районы демографион уавæримæ. Æмæ, Битарты Вячеслав куыд загъта, афтæмæй, сын йæ зæрдæ зæгъы, районы цæрджыты нымæц фылдæр куыд кæна.

Быдыры Дæргъæвсы цæрджытимæ фембæлды рæстæг Битарты Вячеслав арфæ ракодта хъæуы цæрæг, армрестлингæй Европæйы чемпионкæ, Уæрæсейы дыууæ хатты чемпионкæ æмæ республикæйы цыппар хатты чемпионкæ Дзуццаты Миланæйæн, чызджы ныййарæгæн та скодта зæрдылдарæн лæвар.

Быдыры Дæргъæвсы цæрджытимæ ныхас дæр рауад æууæнкджын æмæ æргом. Хъæуы цæрджыты тыхсын кæнынц фæндæгтæ аразыны, зæххы хæйттæй пайда кæныны æмæ адæмы социалон æгъдауæй хъахъхъæныны фарстатæ. Хосгæрдæнтæн сæм зæххытæ фаг кæй нæй, ууыл уыд йæ ныхас хъæуы цæрæг Маргаритæ Читишвилийæн. Исбонады ахастыты фæдыл министр Тедеты Руслан зæрдæ бавæрдта, сæрмагондæй ацы фарстамæ йæ ‘ргом кæй аздахдзæн, уымæй.

Хъæуы цæрæг Фидараты Хъазыбеджы курдиат баст уыд Сечермæ ног фæндаг саразыны фарстаимæ. Уый фæдыл ныхас кæнгæйæ, республикæйы Сæргълæууæг бауынаффæ кодта Фæндæгты хæдзарады комитеты разамонæг Солиты Тариэлæн, цæмæй сæ къух сисой, йæ хæстæ чи не ‘ххæст кæны, уыцы подрядон организацийы лæггæдтыл.

Фембæлды рæстæг ма ныхас цыд, хъæуы сывæллæттæн спортæй архайынæн материалон гæнæнтæ кæй нæй, ууыл. Фидараты Фатимæйы курдиат та уыд Быдыры Дæргъæвсы футболæй хъазыны фæз саразын. Фарста алыг кæныны хъуыддаг йæхимæ райста республикæйы Хицауады Сæрдары хæдивæг Фадзайты Æхсар.

Фембæлды рæстæг цыдæриддæр курдиæттæ уыд, се ‘ппæты дæр сæхимæ фæбæрæг кодтой РЦИ-Аланийы Сæргълæууæджы æмæ РЦИ-Аланийы Хицауады Администрацийы Адæмы курдиæттимæ кусыны управленийы специалисттæ æмæ, фарстатæ лыггонд куыд цæудзысты, уымæ сæ цæст дардзысты.

Республикæйы Сæргълæууæг Битарты Вячеславы хъæппæрисæй цæрджытимæ ахæм фембæлдтытæ арæзт цæудзысты рæстæгæй-рæстæгмæ æмæ алы районты дæр.

Нæ уацхæссæг

ОСТАВЬТЕ ОТВЕТ

Please enter your comment!
Please enter your name here