Хуыбылты Ирэна цæуы Олимпаг хъæзтытæм

0
176

 

Аргентинæйы сæйраг горæт Буенос-Айресы 6-18 октябры цæудзысты Æппæтдунеон фæсивæдон Олимпаг хъæзтытæ. Ерыстæ цæудзысты спорты 36 хуызæй. Уыцы стыр ерысты архайдзæн ирон дзюдоисткæ Хуыбылты Ирэнæ дæр.

Буенос-Айресы дзюдойæ фæсивæд ерыс кæндзысты 7-10 октябры. Лæппутæ æмæ чызджытæ хæрзиуджытыл тох кæндзысты фæйнæ цыппар уæзы.

Ацы ерыстæм бахауын уыд стыр зын, уымæн æмæ алы бæстæйæ дæр бар уыдис иу лæппу æмæ иу чызг равзарын. Уæрæсейы спорты разамонджытæ æмæ дзюдойы тренертæ чызджыты ‘хсæн равзæрстой Кæсойты Станиславы хъомылгæнинаг Хуыбылты Ирэнæйы, лæппуты ‘хсæн та — Абрек Нагучевы.

Хуыбылты Ирэнæ ерыс кæндзæн 52 кг онг уæзы, Абрек Нагучев та 66 кг онг уæзы.

Ирэнæ æмæ Абрек дыууæйæ дæр ацы аз систы сæ карæнты ‘хсæн (18-аздзыдты) Европæйы чемпионтæ. Ныр сæ размæ ис стыр бæллиццаг нысан æмæ, Аргентинæйы Олимпиадæйы уыцы бæрзонд уæлахиз сæ къухы куыд бафта, уый сын нæ зæрдæ зæгъы!

 

Нæ уазджытæ — новгородаг тхэквондисттæ

Дзæуджыхъæуы 36-æм скъолайы къорд азы ис тхэквондойы клуб «Легионер». Клубы разамонæг æмæ тренер Баситы Алан ам бацæттæ кодта къорд курдиатджын тхэквондисты. Йæ ахуыргæнинаг Черчесты Аминæ ссис Уæрæсейы чемпион æрыгæтты ‘хсæн, дунеон чемпионаты та бацахста 2-аг бынат. Йæ иннæ хъомылгæнинаг Харебаты Аланæ фыццаг бынат бацахста Уæрæсейы чемпионаты фæсивæды ‘хсæн, Европæйы та рацыд æртыккаг бынатмæ. Хистæр спортсменты ерысты дæр Басийыфырты хъомылгæнинæгтæ æвдисынц хорз æнтыстдзинæдтæ. Зæгъæм, Пагæты Георги Уæрæсейы Кубок рамбулыныл ерысты рамбылдта бронзæ майдан.

Клубы фæсивæдæн сæхи цæттæ кæнынмæ ис хорз фадæттæ. Уый зонгæйæ ардæм ацы бонты горæт Дæллаг Новгородæй сæхи Мæскуыйы цы дунеон турнир цæудзæн, уымæ цæттæ кæнынмæ ссыдысты æртæ спортсмены. Уыдонæй уæлдай ма клуб «Легионер»-ы сæхи фидæны ерыстæм цæттæ кæнынц Беслæны æмæ Дзæуджыхъæуы 43-æм скъолайы секциты минæвæрттæ.

Новгородаг спортсментæ тынг разы сты, цы уавæрты сæхи цæттæ кæнынц, уыдонæй. Новгородаг тхэквондисттæй иуы мад Наталья Зинатулинæ зæгъы: «Нæхи Ирыстоны цæттæ кæныны зонд нæм æрцыди фарон Æппæтуæрæсеон ерысты архайгæйæ. Уæд немæ нæ уыди тренер æмæ нын уым баххуыс кодта Баситы Алан. Мах уымæй уыдыстæм тынг бузныг æмæ балымæн стæм. Нæ кæстæртæ дæр кæрæдзиимæ балымæн сты æмæ ныр тынг æхсызгонæй ссыдыстæм Ирыстонмæ. Мах ам стæм фыццаг хатт æмæ тынг разы стæм, цы нæ уавæртæй, цы амы æрдзы æмæ уæ горæты рæсугъддзинадæй. Уæдæ цы зæгъæн ис, Цъæйы æмæ Фыййагдоны цы æмбисонды бынæттæ федтам, уыдонæй! Мах стыр бузныг зæгъæм Баситы Аланæн æмæ йæ хъомылгæнинæгтæн. Сæ уазæгуарзон мадзæлттæ махæй рох нæ уыдзысты».

Новгородаг æрыгон тхэквондист Эмиль Зинатулин ахуыртæ куыд цæуынц, уый тыххæй зæгъы: «Æз тхэквондойæ архайын æстæм аз. Архайдтон бирæ алыхуызон ерысты. Мæнæ ныр дæр мæхи цæттæ кæнын, Мæскуыйы цы дунеон турнир уыдзæн, уырдæм. Амы ахуыртæй дæн тынг разы. Хуыздæр ма цы вæййы?! Немæ Баситы Алан кусы тынг лæмбынæг æмæ йын йæ амындтæм мах хъусæм къæрцхъусæй. Уæдæ амы тхэквондисттимæ дæр балымæн стæм æмæ ахуырты кæрæдзийæн æххуыс кæнæм. Иу ныхасæй ам æппæт дæр у нывыл арæзт æмæ стыр бузныг зæгъæм нæ фысымтæн».

Уазджытæй тынг разы у Баситы Алан дæр: «Ацы ахуыртæ пайда сты куыд нæ уазджытæн, афтæ нæхи хъомылгæнинæгтæн дæр. Дзæбæх фæсивæд нæм ссыди Дæллаг Новгородæй æмæ уыдонимæ нæ кæстæртæ кæй балымæн сты, уый хорз хъуыддаг у. Ноджы ма ахуырты рæстæг кæрæдзийæн æххуыс кæй кæнынц, уый дæр хъæугæ хъуыддаг у. Фæсивæды зæрдæмæ нæ ахуыртæ афтæ фæцыдысты æмæ алы тренировкæ дæр камерæйæ исынц. Иумæ кæй кусынц, уый та сæ разæнгард кæны æвæллайгæ архайдмæ. Кæй зæгъын æй хъæуы, уый махæн, тренертæн, у æхсызгон хъуыддаг».

БАСКАТЫ Уырызмæг,

УЫРТАТЫ Светланæ

 

ОСТАВЬТЕ ОТВЕТ

Please enter your comment!
Please enter your name here