0
82

Ирыстоны фæсивæд — æртыккаг бынаты

Уæрæсейы 13 горæты августы дыууæ къуырийы дæргъы цыдысты нæ бæстæйы фæсивæдон спартакиадæйы ерыстæ спорты 42 хуызæй

Спартакиадæйы кæронбæттæны ерысты архайдтой Уæрæсейы 81 регионы командæтæ.

Спорты æппæт хуызтæй архайгæйæ, æмткæй райсгæйæ, бæрæггонд æрцыдысты регионтæй чи цалæм бынат бацахста, уыдон.

2 милуан адæймагæй фылдæр цы регионты цæры, уыдоны ерысты фыццаг бынат бацахста Мæскуыйы командæ 4165-очкоимæ, 2- аг бынатмæ рацыди Мæскуыйы облæст (3446 очкойы), 3-аг та ссис Санкт — Петербурджы командæ (3386 очкойы).

2 милуаны онг цæрджытæ кæм ис, уыцы регионтæй фыццаг бынатмæ рацыди Пензæйы облæст (863 очкойы). 2-аг бынат бацахста Приморскы край (735 очкойы), 3-аг та ссис Ленинграды облæсты командæ (619 очкойы)

1 милуанæй фылдæр кæм нæ цæры, уыцы регионтæй 1-аг бынат рамбылдтой Калининграды облæсты фæсивæд (363 очкойы), 2- аг бынат бацахста Республикæ Мордовийы командæ (280 очкойы), 3-аг бынатыл та æрлæууыдысты РЦИАланийы фæсивæд (224 очкойы).

Кæй зæгъын æй хъæуы, уыйбæрц командæты ‘хсæн 3-аг бынат бацахсын æвзæр бæрæггæнæн нæу. Фæлæ нæ республикæ 1-аг бынаты аккаг кæй у, уый нæ уырны. Уый тыххæй та хъуамæ нæ фæсивæд æмæ сæ разамонджытæ иннæ хатт бацархайой уæлдæр къæпхæнмæ схизынмæ.

 

Нæ чызджытæ фесгуыхтысты Выборджы

Фехтованийæ Ленинграды облæсты город Выборджы цы æппæтуæрæсеон фæсивæдон «Балтикæйы стъалытæ», зæгъгæ, турнир уыди, уым фесгуыхтысты нæ республикæйы фехтованийы скъолайы тренер Хъесаты Иринæйы хъомылгæнинæгтæ Мананæ Саумова æмæ Хъесаты Маринæ.

Мананæ æмæ Маринæ ерыс кодтой шпагæйæ хæцынæй. Æдæппæт «Балтикæйы стъалытæ»-йы уæлахиздзау суæвыныл тох кодтой 118 шпагисткæйы. Цæмæй кæронбæттæнмæ рацæуой, уый тыххæй Мананæ æмæ Маринæйы бахъуыд фæйнæ 14 тохы рамбулын. Сæ дыууæ дæр ацы вазыгджын хæс сæххæст кодтой æнтыстджынæй æмæ кæронбæттæны фембæлдысты кæрæдзиимæ. Сæ тох ахицæн Мананæ Саумовайы пайдайæн 15:10 хыгъдæй. Сæ тренер Хъесаты Иринæ дыууæ чызджы архайдæй разыйæ баззад æмæ зæгъы: «Ахæм бæрнон ерысты фыццаг æмæ дыккаг бынæттæ бацахсын у раппæлинаг хъуыддаг. Ацы турнир у иннæ азы Европæйы æмæ дунейы фæсивæдон чемпионаттæм æвзарæн турниртæй иу æмæ ахæм бæрзонд бынæттæ кæй бацахстой, уый уæлдай æхсызгон уый тыххæй у. Мæнæн мæ зæрдæ æхсайдта Маринæмæ. «Хъуыддаг та уый мидæг ис, æмæ ацы ерыстæм цæттæ кæнæн æмбырды йæ синтæ хъыгдард æрцыдысты æмæ кæронмæ куы нæ бафæраза, уымæй тас уыди. Ахæм уавæры дыккаг бынатмæ кæй рацыд, уый бирæйы аргъ у.

Мананæ æмæ Маринæ гыццыл чызджытæй райдыдтой мæнмæ тренировкæтæм цæуын æмæ ныр дыккаг аз Мананæ кæд Мæскуыйы цæры, уæддæр сæ лымæндзинад нæ фæкъаддæр. Ныртæккæ сыл цæуы нудæсæймаг азтæ æмæ сты тæккæ рæзыны кары.Дыууæ-æртæ азы фæстæ уыдзысты сæ тыхы æмæ нæ нысан у Олимпаг хъæзтытæм бахауын. Мананæ ныртæккæ кæд Мæскуыйы цæры, уæддæр рох нæ кæны, кæм æмæ кæй фæрцы сырæзт спорты мастеры онг уый, æмæ йæ мах дæр раздæрау хонæм нæхи чызг».

Кæй зæгъын æй хъæуы, æхсызгон у нæ чызджытæ сæхи ахæм сæрæнæй кæй равдыстой, уый æмæ сын нæ зæрдæ зæгъы иннæ аз Европæ æмæ дунейы чемпионатты дæр афтæ æнтыстджын уæвын!

БАСКАТЫ Уырызмæг

 

ОСТАВЬТЕ ОТВЕТ

Please enter your comment!
Please enter your name here