Профессионалон боксы изæр — «Дендрариум»-ы

0
178

 

Нæ республикæйы спортуарзджытæ 12 сентябры æвдисæн уыдзысты профессионалон боксы бæрæгбонæн. Уыцы бон Дзæуджыхъæуы горæты сæрмæ ресторан «Дендрариум»-ы рингмæ рацæудзысты авд бæстæйы минæвар профессионалон боксеры. Æдæппæт боксуарзджытæ фендзысты фараст тохы.

«Боксы изæр”-ы рингмæ чи рацæудзæн, уыдоны ‘хсæн уыдзысты цыппар ирон профессионалон боксеры: Тадтаты Сæрмæт, Моурауты Хетæг, Хуыгаты Алан æмæ Челæхсаты Таир.

«Боксы изæр»-ы сæйраг тох уыдзæн Челæхсаты Таир æмæ украинаг зындгонд боксер Игорь Пилипенкойы ‘хсæн. Пилипенкойы фæсномыг у «Зверь». Ацы фæсномыг Пилипенкойæн дзæгъæлы лæвæрд не ‘рцыд. Уый ринджы йæ ныхмæлæуджытимæ у æгъатыр æмæ фæтырны «нокаут»-æй рамбулынмæ. Йæ ныхмæлæууæг ирон боксер Челæхсаты Таир дæр, тохы чи фæтæрса, уыдонæй нæу, æмæ сæ фембæлд тынг цымыдисаг кæй рауайдзæн, уый дызæрдыггаг нæу.

«Боксы изæр» аразджытæ сты: æхсæнадон змæлд «Ирон легион», РЦИ-Аланийы боксы федераци æмæ промоутерон компани «УралБоксПромоушен».

31 августы ресторан «Дендрариум»-ы «Боксы изæр» аразджытæ æмæ тохы архайджытæ фембæлдысты дзыллон хабархæссæг фæрæзты минæвæрттæ æмæ спортуарзджытимæ. Пресс- конференцийы журналистты æмæ спортуарзджыты фæрстытæн дзуаппытæ лæвæрдтой Уæрæсейы сгуыхт тренер Сланты Витали, промоутерон компани «BMA-China»- йы спортивон директор Александр Игнаткин, тохты чи архайдзæн, уыцы боксертæ Челæхсаты Таир æмæ Китайы чемпион Хе Дзюн Дзюн.

Сланты Витали куыд загъта, афтæмæй ацы тохтæн сæ нысан у профессионалон боксы иу къæпхæнæй иннæмæ хизын. «Тохты чи архайдзæн, уыцы боксертæ амæй размæ архайдтой алыхуызон ерысты æмæ, сæхиуыл куы феууæндыдысты, уæд сфæнд кодтой профессионалон боксмæ рахизын. Мæнæ нæм ныр Китайæ цы цыппар лæппуйы æрбацыд, уыдонæй иу у сæ бæстæйы чемпион, иннæтæ дæр фесгуыхтысты алыхуызон ерысты. Зæгъæм, сæ иу у Китайы чемпионаты æрыгæтты ‘хсæн фыццаг бынат чи бацахста, ахæм, иннæтæ дæр сты цалдæр бæрнон ерысты фæуæлахизуæвджытæ. Нæ китайаг уазджытæ Ирыстоны сты æртæ мæймæ ‘ввахс. Ам сæхи цæттæ кодтой мах лæппутимæ боксы клуб «Арианæ»- йы. Сæхи равдыстой тынг куыстуарзон æмæ лæмбынæгæй хъусæг ахуырдзаутæй. Мæнмæ гæсгæ, цымыдисаг уыдзысты, нæ китайаг уазджытæ цы тохты архайдзысты, уыдон. Уæлдайдæр та Китайы чемпион Хе Дзюн Дзюн æмæ уæрæсейаг боксер Армен Атаевы тох. Уæдæ нæ Ирыстоны минæвæртты тохтæ та уæлдай цымыдисагдæр хъуамæ рауайой. Тыхджын ныхмæлæуджытæ уыдзæн Хуыгаты Алан æмæ

Челæхсаты Таирæн. Хуыгайы-фырт 63,5 кг онг уæзы фембæлдзæн гуырдзиаг боксер Торнике Канделакиимæ, Челæхсаты Таиры ныхмæлæууæг та æппæты уæззаудæр уæзы уыдзæн украинаг боксер Игорь Пилипенко. Ацы тох нымад у изæры сæйраг фембæлдыл. Нæ иннæ лæппуты ныхмæлæуджытæ дæр сæ лæмæгътæй не сты. 72,2 кг онг уæзы Тадтаты Сæрмæт тох кæндзæн уæрæсейаг боксер Замир Зекашевимæ, 91 кг онг уæзы та Моурауты Хетæджы ныхмæ рингмæ рацæудзæн Камеруны минæвар Оливер Дунда Меконго. Иу ныхасæй, спортуарзджытæ цæмæ бакæсой, уый сын уыдзæн».

Челæхсаты Таиры куы бафарстой йæ ныхмæлæууæджы тыххæй, уæд загъта: «Мах ын йæ архайдмæ кастыстæм пленкæйыл фыстæй æмæ нæхи цæттæ кæнæм йæ миниуджытæ йын зонгæйæ. Кæй зæгъын æй хъæуы, мæ ныхмæлæууæг дæр зонгæ уыдзæн мæн архайдимæ. Уымæ гæсгæ алцыдæр сбæрæг кæндзæн ринг». Китайаг боксер Хе Дзюн Дзюны куы бафарстой, Ирыстоны йе ‘мбæлттимæ сæхи куыд хатынц, зæгъгæ, уæд радзырдта: «Махмæ, Китайы, профессионалон бокс нырма ахæм бæрзонд æвæрд нæма у. Уымæ гæсгæ нын фадат куы фæци Ирыстоны тренер Сланты Виталиимæ бакусынæн, уæд цингæнгæйæ рацыдыстæм æмæ фæсмонгонд нæ фестæм. Ам нæхи æнкъарæм тынг хорз. Цы æрдзы рæсугъддзинад, амы адæмы уазæгуарзон цæстæнгас нæ зæрдæтæм тынг цæуынц. Уæдæ, боксæй кæимæ архайæм, уыдонæй та стæм стыр бузныг. Боксы изæры бацархайдзыстæм, цыдæриддæр зонæм, уыдон ринджы равдисыныл».

Журналистты фæрстытыл æргом дзуаппытæ радтой Александр Игнаткин æмæ Хуыгаты Хох дæр. Ныр боксуарзджытæн 12 сентябры фадат уыдзæн 19 сахатæй фæстæмæ ресторан «Дендрариум»-ы кæрты сæ уарзон спорты хуызы лæгæй-лæгмæ тохтæм цымыдисæй бакæсынæн.

БАСКАТЫ Уырызмæг

Къамтæ систа КЪÆБЫСТЫ Харитон

ОСТАВЬТЕ ОТВЕТ

Please enter your comment!
Please enter your name here