Цæуынц дунеон чемпионатмæ

0
112

 

Дзюдойæ 20 сентябры Азербайджаны цы дунеон чемпионат райдайдзæн, уым гауызмæ рацæудзысты æхсæз ирыстойнаг лæппуйы.

Уыдонæй дыууæ — Лæппынæгты Аслан æмæ Тасойты Инал хъахъхъæндзысты Уæрæсейы спортивон кад.

Аслан æмæ Иналы тренертæ сты Цæгæраты Хъазыбег æмæ Айларты Ирбег. Цæгæраты Хъазыбег æмæ Беккуызарты Аличы хъомылгæнинаг Коцойты Зелим 100 кг онг уæзы ерысты архайдзæн Азербайджаны номæй. Цæгæраты Хъазыбеджы иннæ ахуыргæнинаг Федор Целиди фæстаг азты дунеон ерысты гауызмæ рацæуы Грецийы номæй æмæ та ныр дæр хъахъхъæндзæн йæ фыдæлты райгуырæн бæстæйы кад 90 кг онг уæзы. Ноджыдæр ма дыууæ ирон лæппуйы — Бестауты Отар (60 кг) æмæ Золойты Владимир (81 кг) дунеон чемпионаты хæцдзысты Хъыргъызстаны номæй. Сæ тренертæ сты Цæгæраты Хъазыбег æмæ Хуыгаты Витали.

Æдæппæт Бакуйы дунеон чемпионаты хæрзиуджытыл тох кæндзысты 130 паддзахады 800 дзюдоисты æмæ уыдоны ‘хсæн нæ лæппутæ æхсæзæй кæй уыдзысты, уый æхсызгон у нæ спортуарзджытæн. Бынтон æхсызгондæр та уыдзæн, уым нæ республикæйы минæвæрттæ хæрзиуæгджынтæ куы суой, уæд. Уыцы хорздзинад сын нæ зæрдæ зæгъы!

Раст уыцы бонты Грецийы цæудзысты æрыгæтты ‘хсæн дунейы фыццаг бынат бацахсыныл ерыстæ джиуджитсуйæ.

Уым Уæрæсейы æрыгæтты (15-аздзыд) иугонд командæйы уæвгæйæ, ерысты архайдзысты Санахъоты Георги (55 кг) æмæ Арслан Гаджиев (55 кг). Георги æмæ Арслан цæмæй дунеон чемпионатмæ бахауой, уый тыххæй сæхи сæрæнæй равдыстой цалдæр бæрнон ерысты. Сæ фæстаг уыди СанктПетербурджы, Уæрæсейы Хъæбатыр Дмитрий Кожемякины номарæн Æппæтуæрæсеон турнир.

Уым Арслан Гаджиев иттæг сæрæн хæст ракодта, «Неваза» кæй хонынц, джиу-джитсуйы уыцы хуызы. Арслан фæуæлахиз йæ фондз ныхмæлæууæгыл дæр æмæ бацахста фыццаг бынат. Джиу-джитсуйы иннæ хуыз «Тохтæ»-йæ цыппар ныхмæлæууæгыл фæуæлахиз Санахъоты Георги. Æрмæст йæ фæндзæм ныхмæлæууæгæн хæрз чысыл кæй фембылд, уый аххосæй рацыд 3-аг бынатмæ.

Георгийы арæхстдзинад фæцыди Уæрæсейы иугонд командæйы тренерты зæрдæмæ æмæ конд æрцыд, дунеон чемпионаты чи ерыс кæндзæн, уыдоны рæнхъытæм. Ацы ерысты ма æртыккаг бынат бацахста Даниил Тягуненко.

Æртæ лæппуйы дæр сты нæ зындгонд тренер Дзитойты Артуры хъомылгæнинæгтæ æмæ сын нæ зæрдæ зæгъы ног сгуыхтдзинæдтæм дарддæр дæр æнæзивæгæй куыд тырной, уый!

БАСКАТЫ Уырызмæг

ОСТАВЬТЕ ОТВЕТ

Please enter your comment!
Please enter your name here