БИТАРТЫ Вячеслав: “Кæцыфæнды ирыстойнаг дæр кæмфæнды куы уа æмæ царды цыфæнды зын уавæрты куы бахауа, уæддæр Хицауад æдзух уыдзысты йæ фарсмæ”

0
179

РЦИ-Аланийы Сæргълæууæг БИТАРТЫ Вячеслав фембæлд, Дзæуджыхъæуы æфсæддон гарнизоны тæрхондон тæрхон кæмæн рахаста, уыцы сержанттæ ÆЛБЕГАТЫ Зелим æмæ СЛАНТЫ Арсены ныййарджытимæ. Семæ ныхасы ма архайдтой РЦИ-Аланийы Парламенты Сæрдар Алексей МАЧНЕВ, РЦИ-Аланийы адæймаджы бартæ хъахъхъæнæг фарстаты фæдыл æххæстбарджын минæвар УАЛЫТЫ Эльбрус æмæ РЦИ-Аланийы Хицауады Сæрдары хæдивæг ТОМАЙТЫ Ирбег.

Дзæуджыхъæуы æфсæддон гарнизоны тæрхондон рахаста Æлбегаты Зелимæн иумæйаг уавæрты колонийы 3,5 азы фæбадын, Сланты Арсенæн та — 1,5 азы æндæр ран оргæнты цæстдардæй фæцæрыны тæрхон.

Æлбегаты Роберт æмæ Сланты Шота лæмбынæг радзырдтой, сæ фырттыл слест куыд цыд æмæ тæрхондоны сæ хъуыддагмæ куыд æркастысты, стæй дзы цавæр рæдыдтытæ æруагътой, уый тыххæй. Ныййарджытæ æмæ, тæрхонгонд кæмæн æрцыд, уыдоны фарсхæцджыты хъуыдымæ гæсгæ Æлбегаты Зелим æмæ Сланты Арсенæн хаст æрцыд æгæр карз тæрхон, прокуроры ныхасмæ та, Арсен æмæ Зелимæн дзырдæй тæрхон рахæссыны тыххæй, æппындæр каст не ‘рцыд.

— Æз мæ фырты фарс рахæцыны тыххæй никæцы инстанцийы никуы никæмæй куырдтон, æрмæстдæр мæ фæндыд, тæрхоны оргæнтæ раст уынаффæ куы рахастаиккой. Уыимæ сæ курын, политикон хъаугъаты номхыгъдмæ сæ куы нæ хæссикой, уый, — загъта фембæлды рæстæг Æлбегаты Зелимы фыд Роберт.

Битарты Вячеслав загъта, куыд регионы разамонæг, афтæ йæ бон нæу тæрхоны оргæнты куыстыл сахадын.

— Кæцыфæнды ирыстойнаг дæр кæмфæнды куы уа æмæ царды цыфæнды зын уавæрты куы бахауа, уæддæр Хицауад æдзух уыдзысты йæ фарсмæ. Уымæ гæсгæ нæ архайын хъæуы закъоны уагæвæрдыл æнцойгæнгæйæ, цæмæй баххуыс кæнæм сымахæн æмæ уæ кæстæртæн. Фæлæ хъуамæ æмбарат, тæрхондоны уынаффæ аивын нæдæр республикæйы Сæргълæууæджы бон у, нæдæр Президенты, — загъта Битарты Вячеслав.

Уалыты Эльбрусы хъуыдымæ гæсгæ та хорз уаид, ацы хъуыддаг алыг кæныныл куы бацархаиккой Уæрæсейы Федерацийы адæймаджы бартæ хъахъхъæнæг æххæстбарджын минæваримæ. Уымæн ис бар, цæмæй курдиат бадæтта тæрхондонмæ æмæ закъоны бындурыл чи не ‘нцой кæны, уыцы уынаффæ аивой. Фæлæ уал банхъæлмæ кæсын хъæуы, Цæгат Кавказы æфсæддон зылды тæрхондон хъуыддаг куыд равзардзæн, уымæ.

Уголовон хъуыддагмæ дарддæр куыд каст цæудзæн,тæрхоны уæлдæр инстанцийы уый тыххæй дзургæйæ, республикæйы Сæргълæууæг загъта, цæмæй тæрхондон бæрнондæрæй æркæса, уымæ йæхæдæг йæ цæст кæй дардзæн, уый. Битарты Вячеслав республикæйы Хицауады Сæрдары хæдивæг Томайты Ирбег æмæ РЦИ-Аланийы адæймаджы бартæ хъахъхъæнæг æххæстбарджын минæвар Уалыты Эльбрусæн бахæс кодта, цæмæй, тæрхонгонд кæмæн æрцыд, уыцы æфсæддонты ныййарджытæм фæкæсой аппелляци бадæттыны æмæ æндæр хъуыддæгты.

Æлбегаты Роберт æмæ Сланты Шота РЦИ-Аланийы Сæргълæууæгмæ цы курдиат балæвæрдтой, уым дзы курынц, цæмæй арæзт æрцæуа депутатты кусæг къорд, Сланты Арсен æмæ Æлбегаты Зелим, цы æфсæддон хайы службæ кодтой, уым цавæр æгъдаухæлдтытæ æрцыд, уыдон сбæрæг кæныны тыххæй. Фембæлды кæрон Сланты Шота æмæ Æлбегаты Роберт бузныг загътой республикæйы Сæргълæууæгæн, сæ кæстæрты хъысмæтмæ сын куыдфæндыйы цæстæй кæй нæ акаст, уый тыххæй.

РЦИ-Аланийы Сæргълæууæджы æмæ РЦИ-Аланийы Хицауады пресс-службæ

 

ОСТАВЬТЕ ОТВЕТ

Please enter your comment!
Please enter your name here