Толасты Артур фесгуыхт Петербурджы

0
111

 

Фехтованийæ Санкт-Петербурджы цы дунеон турнир «Аничков Дворец», зæгъгæ, цæуы æрыгæтты ‘хсæн, уым сæ арæхстдзинад æвдисынц цалдæр ирыстойнаг æрыгон спортсмены.

Лæппуты ерысты фесгуыхт Дзуццаты Станислав æмæ Моргуаты Всеславы хъомылгæнинаг Толасты Артур. Уый шпагæйæ хæцгæйæ фæуæлахиз иуæндæс ныхмæлæууæгыл æмæ бацахста фыццаг бынат. Артур амæй размæ цы бæрнон ерысты архайдта, уыдоны дæр уыди æнæкъуыхцы æмæ ныридæгæн балцæг райста, 6-18 октябры Аргентинæйы цы æппæтдунеон фæсивæдон Олимпаг хъæзтытæ цæудзысты, уырдæм.

Артур Санкт-Петербурджы турниры архайдта Мæскуыйы командæйы номæй. Уырдæм хуынд æрцыд дыууæ азы размæ.

Артурæй уæлдай ма турниры ерыс кодтой цалдæр ирыстойнаг чызджы. Уыдонæн сæ архайд куыд рауад, уый сбæрæг знон изæрæй, нæ газеты номыр мыхуырмæ фыст куы æрцыд, уый фæстæ.

БАСКАТЫ Уырызмæг

ОСТАВЬТЕ ОТВЕТ

Please enter your comment!
Please enter your name here